“Gintestingan ko pagbasa an Biblia, pero nahulop ako kay kadakmol hito!”​—Briana, 15.

 Ito ba liwat an imo inaabat? Ini nga artikulo makakabulig ha imo!

•  Kay ano nga sadang basahon an Biblia?

•  Paonan-o ko babasahon an Biblia?

•  An ginsisiring han imo mga igkasi-batan-on

 An pagbasa ba han Biblia baga hin makahurubya? Kon amo, sugad liwat hito an inaabat han iba. Bangin nahuhunahuna mo nga an Biblia usa nga madakmol nga libro, gudti an letra ngan waray mga retrato, salit mas maopay pa magkita hin TV ngan mga video!

 Pero hunahunaa ini: Kon makaagi ka hin daku ngan kadaan nga kahon hin bahandi, diri ba karuyag mo mahibaroan kon ano an sulod hito?

 An Biblia pariho gud hito nga kahon hin bahandi. May-ada ito damu nga hiyas han kinaadman nga mabulig ha imo nga

•   Maghimo hin mag-opay nga desisyon

•   Magkaada maopay nga relasyon ha imo mga kag-anak

•   Makabiling han pinakamaopay nga klase hin kasangkayan

•   Makaya an istres

 Kay ano nga an sugad nga kadaan nga libro praktikal gud ha aton panahon? Tungod kay “an ngatanan nga Kasuratan giniyahan han Dios.” (2 Timoteo 3:16) Karuyag sidngon nga an sagdon ha Biblia tikang ha pinakamaopay nga Surok.

 An usa nga paagi amo an pagbasa han Biblia tikang ha tinikangan tubtob ha kataposan. Tungod hito mahibabaroan mo an kabug-osan nga ideya han mensahe ha Biblia. May damu nga paagi ha pagbasa han Biblia. Ini an duha nga ehemplo:

•    Puydi mo basahon an 66 nga libro han Biblia uyon ha pagkasurunod hito, tikang ha Genesis tubtob ha Pahayag.

•    Puydi mo basahon an Biblia uyon ha kronolohiya​—karuyag sidngon uyon ha pagkasunod-sunod han mga hitabo.

 Tip: Ha Apendise A7 ha Bag-o nga Kalibotan nga Hubad may lista han importante nga mga hitabo ha kinabuhi ni Jesus ha tuna uyon ha pagkasurunod hito.

 An ikaduha nga paagi ha pagbasa han Biblia amo an pagpili hin istorya nga puropariho ha kahimtang nga imo gin-aatubang. Pananglitan:

•   Karuyag mo ba makabiling hin masasarigan nga kasangkayan? Basaha an istorya mahitungod kanda Jonathan ngan David. (1 Samuel, kapitulo 18-20) Katapos, gamita an worksheet nga “Kung Paano Magkakaroon ng Tapat na mga Kaibigan” basi mahibaro hin praktikal nga mga leksyon tikang hini nga istorya.

•   Karuyag mo ba maparig-on an imo abilidad ha pag-ato ha mga pagsulay? Basaha an istorya kon paonan-o gin-atohan ni Jose an pagsulay. (Genesis, kapitulo 39) Katapos, gamita an mga worksheet nga “Kung Paano Lalabanan ang Tukso . . . Jose​—Bahagi 1” ngan “Pinaratangan! Jose​—Bahagi 2” basi mahibaro hin praktikal nga mga leksyon tikang hini nga istorya.

•   Karuyag mo ba mahibaro kon paonan-o an pag-ampo makakabulig ha imo? Basaha an eksperyensya ni Nehemias. (Nehemias, kapitulo 2) Katapos, gamita an worksheet nga “Sinagot ng Diyos ang Kaniyang Panalangin” basi mahibaro hin praktikal nga mga leksyon tikang hini nga istorya.

 Tip: Kon nagbabasa ka han Biblia, siguroha nga mamingaw an imo palibot basi ka makapokus.

 An ikatulo nga paagi ha pagbasa han Biblia amo an pagpili hin asoy o salmo, basaha ito, ngan katapos, hunahunaa kon paonan-o ito naaplikar ha imo. Katapos magbasa, pakianhi an imo kalugaringon:

•    Kay ano nga igin-api ini ni Jehova ha Biblia?

•    Ano an iginsusumat hito mahitungod ha personalidad ni Jehova o ha iya paagi ha pagbuhat han mga butang?

•    Paonan-o ko maiaaplikar ini nga impormasyon ha akon kinabuhi?

 Tip: Paghimo hin tumong! Isurat an petsa nga karuyag mo tikangan an imo programa ha pagbasa han Biblia.