Hini nga artikulo

•  Kay ano nga importante nga makiistorya hin personal?

•  Kon paonan-o magtitikang ha pakiistorya

•  An ginsisiring han imo mga igkasi-batan-on

 An iba nasiring nga an pakiistorya hin personal makuri ngan nakaka-istres. Salit, para ha ira, mas maopay nga mag-text na la.

 “Mas nakakapresyur an pakiistorya hin personal tungod kay diri mo na mai-edit o madi-delete an bisan ano nga imo ginsiring.”—Anna.

 “An pag-text pariho hin nakarekord na nga programa, pero an pakiistorya hin personal pariho hin live nga programa. Kon nakikiistorya ako, pirme ko ginsisidngan an akon kalugaringon nga maghirot ha akon ginyayakan”—Jean.

 Pero, maabot an panahon nga kinahanglan mo mahibaro kon paonan-o makiistorya hin personal. Pananglitan, kinahanglan mo ini kon karuyag mo magkaada bag-o nga kasangkayan, magkaada trabaho ngan magpabilin dida hito, o kon karuyag mo sumulod ha usa nga relasyon kon andam ka na.

 Ha pagkatinuod, diri man makakurulba an pakiistorya hin personal. Mahihimo mo ito—bisan kon awdanon ka.

 “May mga panahon gud nga makakayakan kita hin sayop ngan maawod tungod hito. Diri man gud kita perpekto.”—Neal.

•   Magpakiana. Paghunahuna hin topiko nga bangin makapainteres ha mga tawo, ngan gamita ito basi makagtikang hin pakiistorya. Pananglitan:

   “Diin ka kumadto han naglabay nga summer?”

   “Maopay ini nga website. Nakita mo na ba ini?”

   “Nabatian mo na ba nga . . . ?”

   Basi magin mas espisipiko, paghunahuna hin mga butang nga bangin pariho niyo ginbubuhat han imo kaistorya. Pananglitan, pariho ba an iyo eskwelahan o trabaho? Katapos, puydi ka magpakiana parte ha butang nga ginkakaparihoan niyo.

   “Paghunahuna hin mga pakiana nga makapainteres ha imo ngan karuyag mo gud mabatian an mga baton hito han mga tawo.”—Maritza.

   Dapat likyan: Likayi an pagin sugad hin imbistigador pinaagi hin pagpakiana hin sunod-sunod nga pakiana. Sugad man, likayi an sobra ka personal nga mga pakiana. Bangin diri magin komportable an imo kaistorya kon papakianhan mo hira sugad han “Ano an imo pinakanahahadlokan?” o “Kay ano nga blue pirme an imo sul-ot?” An ikaduha nga pakiana bangin sugad hin ginkukwestyon naton hira!

   Malilikyan mo liwat an pagin sugad hin imbistigador, kon isusumat mo an imo opinyon parte ha pakiana antes o katapos bumaton an imo kaistorya. Ha iba nga pagkayakan, himoa ito nga pakiistorya—diri interbyu.

   Prinsipyo ha Biblia: “An sagdon ha kasingkasing han tawo pariho hin halarum nga tubig; kondi an tawo nga may sarabutan makakahukad hini.”—Proberbios 20:5, An Baraan nga Kasuratan.

•   Magin maopay nga parapamati. An kalamposan han imo pakiistorya nakadepende gud ha imo abilidad ha pagpamati kay ha imo abilidad ha pagyakan.

   “Naniningkamot ako nga mahibaro hin bag-o nga butang parte ha akon kaistorya. Katapos, nangangalimbasog ako nga hinumdoman an iginsumat niya ha akon basi makahunahuna hin pakiana para ha sunod namon nga pag-istorya.”—Tamara.

   Dapat likyan: Ayaw kabaraka kon ano an imo sunod nga isisiring. Kon mamamati ka hin maopay, mahimo ka makabaton ha ginsisiring han imo kaistorya.

   Prinsipyo ha Biblia: “Magin alisto ha pagpamati, mahinay ha pagyakan.”—Santiago 1:19.

•   Magpakita hin sinsero nga interes. Mas mag-i-enjoy ka ha iyo pag-istorya kon interesado ka gud ha imo kaistorya.

   “Kon ginpapaabat mo ha imo kaistorya nga tinuod nga interesado ka ha iya ginsisiring, magigin makalilipay an iyo pag-istorya—bisan kon may panahon nga naaawod kamo.”—Marie.

   Dapat likyan: Ayaw pagin sobra ka personal. An kumendasyon sugad han “Kaopay man han imo coat. Tagpira ito?” bangin makapasina ha imo kaistorya!

   Prinsipyo ha Biblia: “[Panginanoa] diri la an iyo kalugaringon nga kaopayan, kondi pati liwat an kaopayan han iba.”—Filipos 2:4.

 Paonan-o mo tatapuson an usa nga pakiistorya? “Pangalimbasugi nga tapuson ito ha positibo nga paagi,” suhestyon han usa nga batan-on nga lalaki nga hi Jordan. “An pagsiring sugad han, ‘Nalipay gud ako nga makaistorya ka’ o ‘Enjoy ha imo adlaw’ makakabulig nga magin masayon an iyo pag-istorya kon magkita kamo utro.”