Ano an Hitsura ni Jesus?

I-PLAY

Ano an Hitsura ni Jesus?

An baton han Biblia

Waray maaram kon ano gud an hitsura ni Jesus, tungod kay waray ito unabiha ha Biblia. Iginpapakita hito nga diri importante an iya hitsura. Pero an Biblia naghahatag ha aton hin pipira nga ideya kon ano an kabug-osan nga hitsura ni Jesus.

● Hitsura: Hi Jesus usa nga Judio, ngan posible nga napanunod niya tikang ha iya nanay an komon nga Semitico nga hitsura. (Hebreo 7:14) Posible nga diri naiiba an iya hitsura. Ngani, makausa, sekreto nga nakabiyahe hiya tikang ha Galilea ngadto ha Jerusalem nga waray hiya makilal-i. (Juan 7:10, 11) Ngan posible nga diri naiiba an iya hitsura bisan ha iya pinakaduok nga mga disipulo. Hinumdumi nga kinahanglan pa maghatag ni Judas Iscariote hin tigaman ha armado nga mga tawo nga maaresto kan Jesus basi makilala hiya.—Mateo 26:47-49.

● Kahilaba han buhok: Imposible nga hilaba an buhok ni Jesus tungod kay an Biblia nasiring nga an “hilaba nga buhok kaalohan han lalaki.”—1 Corinto 11:14.

● Bungot: Hi Jesus may bungot. Ginsunod niya an balaud han mga Judio nga nagdidiri ha adulto nga kalalakin-an nga ‘ibahon an kurti han mga kataposan han ira bungot.’ (Levitico 19:27; Galacia 4:4) Dugang pa, ha usa nga tagna ha Biblia mahitungod han pag-antos ni Jesus, gin-uunabi liwat an iya bungot.—Isaias 50:6.

● Lawas: Damu an indikasyon nga maskulado hi Jesus. Durante han iya ministeryo, nagbaktas hiya hin damu ka kilometro. (Mateo 9:35) Duha ka beses nga ginlimpyohan niya an templo han mga Judio, iya ginpanbalintong an mga lamesa han mga parabalyo hin kwarta, ngan makausa, iya ginpaiwas an mga hayop gamit an usa nga latigo. (Lucas 19:45, 46; Juan 2:14, 15) An Cyclopedia nira McClintock ngan Strong nasiring: “An ngatanan nga ginsisiring han mga Ebanghelyo nagpapakita nga [hi Jesus] makusog gud ngan mahimsog.”—Volume IV, pahina 884.

● Pamahongpahong: Hi Jesus mahigugmaon ngan mapinairon, ngan sigurado nga nakita ito ha iya pamahongpahong. (Mateo 11:28, 29) Kinadto ha iya an ngatanan nga klase hin tawo basi mangaro hin pagliaw ngan bulig. (Lucas 5:12, 13; 7:37, 38) Bisan an kabataan komportable nga kaupod hiya.—Mateo 19:13-15; Marcos 9:35-37.

Sayop nga mga ideya mahitungod ha hitsura ni Jesus

Sayop nga ideya: An iba nasiring nga sigurado nga may lahi hi Jesus nga Aprikano tungod kay iginpapariho han libro han Pahayag an iya buhok ha barahibo han karnero ngan an iya mga tiil ha “pinainggat nga tumbaga.”—Ginpadayag [Pahayag] 1:14, 15, An Baraan nga Biblia.

Kamatuoran: An libro han Pahayag iginpipresentar pinaagi “hin mga tigaman.” (Pahayag 1:1) Han iginhulagway an buhok ngan mga tiil ni Jesus, naggamit ito hin simboliko nga mga pulong basi ipakita an iya mga kalidad katapos han iya pagkabanhaw, diri basi ihulagway an iya hitsura han nakanhi hiya ha tuna. Han nagsiring an Pahayag 1:14 nga an kan Jesus “ulo ngan . . . buhok mabusag sugad han busag nga barahibo han karnero, sugad han niebe,” gin-uunabi hito an kolor han iya buhok, diri an grano hito. Nagrirepresentar ito han iya kinaadman tungod han iya edad. (Pahayag 3:14) Diri iginkukompara hini nga bersikulo an grano han buhok ni Jesus ha barahibo han karnero ngan diri liwat ito iginkukompara ha niebe.

An mga tiil ni Jesus “pariho hin maopay nga klase hin tumbaga nga nag-iinggat ha hudno.” (Pahayag 1:15) An iya liwat nawong “pariho han adlaw kon nasirak ito hin pinakamalamrag.” (Pahayag 1:16) Tungod kay waray lahi nga sugad hito an kolor han panit, ini nga bisyon sigurado nga simboliko; iginpapakita hini an ginbanhaw nga hi Jesus sugad nga an usa “nga naukoy ha diri nadadaop nga kalamrag.”—1 Timoteo 6:16.

Sayop nga ideya: Hi Jesus maluyahon.

Kamatuoran: Makikita ha mga ginbuhat ni Jesus nga tunay hiya nga lalaki. Pananglitan, waray kahadlok nga nagpakilala hiya ha armado nga mga tawo nga maaresto ha iya. (Juan 18:4-8) Sigurado nga makusog liwat hi Jesus tungod kay nagtrabaho hiya sugad nga panday gamit an mano-mano nga mga garamiton.—Marcos 6:3.

Kon sugad, kay ano man nga nagkinahanglan hi Jesus hin bulig ha pagpas-an han iya pasakitan nga kahoy? Ngan kay ano nga nauna hiya mamatay kay han iba pa nga ginraysang kaupod niya? (Lucas 23:26; Juan 19:31-33) Antes igraysang hi Jesus, maluya na gud an iya lawas. Bug-os-gab-i nga waray hiya katurog, nga an usa nga rason tungod han iya duro nga kasakit ha emosyon. (Lucas 22:42-44) Hito liwat nga gab-i, ginmaltrato hiya han mga Judio, ngan pagkaaga, ginpasakitan hiya han mga Romano. (Mateo 26:67, 68; Juan 19:1-3) Ito nga mga butang posible nga nagin hinungdan nga namatay hiya dayon.

Sayop nga ideya: Hi Jesus pirme masurub-on ngan seryoso kitaon.

Kamatuoran: Perpekto nga ginpakita ni Jesus an mga kalidad han iya langitnon nga Amay nga hi Jehova, nga ginhuhulagway ha Biblia sugad nga “malipayon nga Dios.” (1 Timoteo 1:11; Juan 14:9) Ngani, gintutdoan ni Jesus an iba kon paonan-o magigin malipayon. (Mateo 5:3-9; Lucas 11:28) Iginpapakita hini nga kaurogan nga malipayon an pamahongpahong ni Jesus.