An Dios ba Presente ha Bisan Diin?

I-PLAY

An baton han Biblia

Nakakakita an Dios han ngatanan ngan nagbubuhat hiya ha bisan diin nga iya karuyag. (Proberbios 15:3; Hebreo 4:13) Pero waray igtutdo han Biblia nga an Dios presente ha bisan diin ngan ha ngatanan nga butang. Lugod, iginpapakita hito nga usa hiya nga persona ngan may-ada hiya lugar nga gin-uukyan.

Kon ano nga persona an Dios: An Dios espiritu nga persona. (Juan 4:24) Diri hiya nakikita han mga tawo. (Juan 1:18) An mga bisyon mahitungod ha Dios nga mababasa ha Biblia pirme nagpapakita nga aadto hiya ha usa nga lugar. Waray gud kita mababasa ha Biblia nga nagpapakita nga presente hiya ha bisan diin.—Isaias 6:1, 2; Pahayag 4:2, 3, 8.
Kon diin naukoy an Dios: An Biblia nasiring nga an Dios may “urukyan ha langit.” (1 Hadi 8:30) Karuyag sidngon hini nga an Dios naukoy ha langit, diri ha tuna o ha uniberso. May okasyon nga gin-uunabi ha Biblia nga an espiritu nga mga linarang “sinulod basi tumindog ha atubangan ni Jehova,” a sugad hin iginpapakita hini nga an Dios naukoy ha espisipiko nga lugar.—Job 1:6.

Kon an Dios diri presente ha bisan diin, interesado gud ba hiya ha akon sugad nga indibiduwal?

Oo. An Dios interesado gud ha kada indibiduwal. Bisan kon an Dios naukoy ha langit, nakikita niya an mga aanhi ha tuna nga naruruyag nga lipayon hiya, ngan nabulig hiya ha ira. (1 Hadi 8:39; 2 Cronicas 16:9) Hibaroi kon paonan-o iginpapakita ni Jehova nga hinigugma niya an mga sinsero nga nagsisingba ha iya:

Kon nag-aampo ka: Nababatian ni Jehova an imo pag-ampo ha panahon mismo nga nag-aampo ka.—2 Cronicas 18:31.
Kon nadidepres ka: “Hi Jehova hirani ha mga ruba an kasingkasing; iya gintatalwas an mga rumok an espiritu.”—Salmo 34:18.
Kon nagkikinahanglan ka hin giya: Hi Jehova ‘maghahatag ha imo hin hilarom nga pagsabot ngan tututdoan ka’ niya pinaagi han iya Pulong, an Biblia.—Salmo 32:8.

Sayop nga mga panhunahuna mahitungod ha pagin presente han Dios ha bisan diin

Sayop: An Dios presente ha bisan diin niya nga linarang.

Tinuod: An Dios diri naukoy ha tuna ngan diri liwat ha bisan diin ha uniberso. (1 Hadi 8:27) Tinuod nga an mga bitoon ngan iba pa nga mga linarang “nagpapahayag han himaya han Dios.” (Salmo 19:1) Pero an Dios diri naukoy ha iya linarang sugad la nga an usa nga painter diri naukoy ha iya painting. Bisan pa hito, an painting may maisusumat ha aton mahitungod ha painter nga naghimo hito. Ha pariho nga paagi, an mga linarang ha kalibotan nagsusumat ha aton mahitungod han “diri nakikita nga mga kalidad” han Maglalarang, sugad han iya gahum, kinaadman, ngan gugma.—Roma 1:20.

Sayop: An Dios kinahanglan magin presente ha bisan diin basi hibaroan niya an ngatanan nga butang ngan magin makagarahum ha ngatanan.

Tinuod: An baraan nga espiritu, o aktibo nga pwersa han Dios, amo an gahum nga ginagamit han Dios. Pinaagi han iya baraan nga espiritu, an Dios nahibabaro ngan nakakagbuhat hin bisan ano, ha bisan diin, ngan ha bisan ano nga oras nga diri kinahanglan nga magin aadto hiya mismo.—Salmo 139:7.

Sayop: An Salmo 139:8 nagtututdo nga an Dios presente ha bisan diin kay nasiring ito: “Kon masaka ako ha langit, aadto ka, ngan kon maglatag ako han akon higdaan ha Lubnganan, kitaa! aadto ka.”

Tinuod: Ini nga teksto diri naghihisgot mahitungod han lokasyon han Dios. Pinaagi hin siday, igintututdo hini ha aton nga waray lugar nga diri maaabot han Dios basi buligan kita.

a Ha Biblia, Jehova an ngaran han Dios.