May kalabotan ha rekord ni apostol Juan mahitungod han mga panhitabo ha kinabuhi ni Jesus, hiya nagsurat: “An tawo nga nakakita hito naghahatag hini nga pamatuod, ngan tinuod an iya pamatuod, ngan maaram hiya nga tinuod an iya ginsisiring, basi tumoo liwat kamo.”​—Juan 19:35.

 Usa nga rason nga masasarigan an mga asoy han Ebanghelyo nga iginrekord nira Mateo, Marcos, Lucas, ngan Juan kay iginsurat ini ha panahon nga buhi pa an damu han nakakita hito nga mga panhitabo. Sumala ha pipira nga reperensya, an Ebanghelyo ni Mateo iginsurat walo ka tuig katapos mamatay an Kristo, karuyag sidngon, han mga 41 C.E. Damu nga eskolar an nasiring nga iginsurat ito ha mas urhi pa nga petsa, pero kadam-an an nauyon nga an ngatanan nga libro han Kristiano Griego nga Kasuratan iginsurat ha siyahan nga siglo C.E.

 An mga tawo nga nakakita kan Jesus han nakanhi pa hiya ha tuna ngan testigo han iya kamatay ngan pagkabanhaw makakapamatuod han mga asoy han Ebanghelyo. Kon may mga sayop hito, masayon nira ito ibuhayhag. Hi Propesor F. F. Bruce nagsiring: “Usa han marig-on nga mga argumento ha iginsangyaw han mga apostol amo an pagin uyon gud hito ha hinbabaroan han ira mamarati; diri la kay nagsiring hira, ‘Mga saksi kami hini nga mga butang,’ kondi nagsiring liwat hira, ‘sugad han iyo mismo hinbabaroan’ (Buhat 2:22).”