An Biblia nasiring: “An mga buhi maaram nga mamamatay hira, pero an mga patay diri maaram han bisan ano.” (Eclesiastes 9:5; Salmo 146:4) Salit kon mamatay kita, diri na kita naeksister. An mga patay diri na nakakaghunahuna, nakakagios, ngan nakakaabat hin bisan ano.

“Ha tapotapo ka mabalik”

 Iginsumat han Dios kon ano an mahitatabo ha aton kon mamatay kita han nakiistorya hiya ha siyahan nga lalaki, hi Adan. Tungod kay waray magin masinugtanon hi Adan, an Dios nagsiring ha iya: “Tapotapo ka ngan ha tapotapo ka mabalik.” (Genesis 3:19) Antes larangon han Dios hi Adan “tikang ha tapotapo han tuna,” diri hi Adan naeksister. (Genesis 2:7) Ha pariho nga paagi, han namatay hi Adan, binalik hiya ha pagin tapotapo ngan waray na umeksister.

 Ito liwat an nahitatabo ha mga namamatay yana. May kalabotan ha tawo ngan hayop, an Biblia nasiring: “Hira ngatanan tikang ha tapotapo, ngan hira ngatanan mabalik ha tapotapo.”​—Eclesiastes 3:19, 20.

An kamatayon diri an kataposan han ngatanan

 An kamatayon agsob nga ginkukompara ha pagkaturog. (Salmo 13:3; Juan 11:11-14; Buhat 7:60) An tawo nga hilarom an katurog waray sarabotan ha nahitatabo ha iya palibot. Ha pariho nga paagi, an mga patay diri maaram han bisan ano. Bisan pa hito, igintututdo han Biblia nga mahimo pukawon han Dios an mga patay nga sugad hin nakaturog la ngan buhion hira utro. (Job 14:13-15) Para hadton babanhawon han Dios, diri kamatayon an kataposan han ngatanan.