Baton ha mga Pakiana Mahitungod ha Biblia / An Yawa Ngan an mga Demonyo / Tinuod ba an Yawa?

An baton han Biblia

Oo, tinuod an Yawa. Hiya “an magmarando han kalibotan.” Usa hiya nga espiritu nga linarang nga nagin maraot ngan nagrebelde ha Dios. (Juan 14:30; Efeso 6:11, 12) Iginpapakita han Biblia an personalidad han Yawa pinaagi hini nga mga ngaran ngan mga diskripsyon:

● Satanas, nga nangangahulogan “Parakontra.”—Job 1:6.

● Yawa, nga nangangahulogan “Parapakaraot.”—Pahayag 12:9.

● Halas, nga gin-gagamit han Biblia basi mangahulogan hin “Paralimbong.”—2 Corinto 11:3.

● Paragsulay.—Mateo 4:3.

● Buwaon.—Juan 8:44.

Diri la basta usa nga maraot nga kinaiya

An iba naghuhunahuna nga hi Satanas nga Yawa usa la nga maraot nga kinaiya nga aadi ha aton. Pero mababasa ha Biblia nga nag-istorya an Dios ngan hi Satanas. An Dios perpekto, salit waray karaotan nga aada ha iya nga mahimo niya makaistorya. (Deuteronomio 32:4; Job 2:1-6) Sugad man, ginsulay ni Satanas hi Jesus, nga waray sala. (Mateo 4:8-10; 1 Juan 3:5) Salit iginpapakita han Biblia nga tinuod an Yawa ngan diri la hiya usa nga personipikasyon han karaotan.

Dapat ba kita mahipausa nga damu an diri natoo nga tinuod an Yawa? Diri, kay an Biblia nasiring nga nanlilimbong hi Satanas basi matuman an iya katuyoan. (2 Tesalonica 2:9, 10) Usa han iya pinakaepektibo nga panlimbong amo an pagbuta ha hunahuna han damu nga tawo basi diri hira tumoo nga tinuod hiya.—2 Corinto 4:4.

Iba pa nga sayop nga mga ideya mahitungod ha Yawa

● Sayop nga ideya: Lucifer an iba nga ngaran han Yawa.

Kamatuoran: An Hebreo nga pulong nga ha pipira nga Biblia ginhubad nga “Lucifer” nangangahulogan hin “nagraranggat nga bitoon.” (Isaias 14:12) Iginpapakita han konteksto nga ini nga termino nagtutudlok ha dinastiya, o linya han mga hadi, han Babilonya, nga papakaalohan han Dios tungod ha pagin mapahitas-on hito. (Isaias 14:4, 13-20) An pulong nga “nagraranggat nga bitoon” gin-gamit basi tamayon an dinastiya han Babilonya katapos mabungkag ito.

● Sayop nga ideya: Hi Satanas nag-aalagad ha Dios sugad nga “paraakusar nga abogado.”

Kamatuoran: An Yawa kaaway han Dios, diri iya surugoon. Ginkukontra ni Satanas nga Yawa ngan sayop nga gin-aakusaran an mga tawo nga nag-aalagad ha Dios.—1 Pedro 5:8; Pahayag 12:10.