Salamat han imo pagpakita hin interes nga magreport parte ha mga buruhaton han mga Saksi ni Jehova. An masunod nga giya igin-andam basi makabulig ha ispeling ngan ha kahulogan han mga termino nga ginagamit han amon relihiyoso nga organisasyon. Kon may-ada ka pakiana parte ha usa nga topiko nga waray unabiha dinhi hini nga giya, alayon kontaka an sanga nga opisina han mga Saksi ni Jehova.

An Barantayan Nagsasamwak han Ginhadian ni Jehova. An bug-os nga ulohan han nangunguna nga magasin nga iginpupublikar ngan iginpapanaltag han mga Saksi ni Jehova. Gintatawag liwat nga An Barantayan. Ini nga ngaran tikang ha ideya nga padayon nga magbantay ha kon paonan-o natutuman an mga katuyoan han Dios. (Mateo 24:42) An panpubliko nga edisyon han An Barantayan igintatanyag nga waray bayad ha interesado nga mga tawo. An aradman nga edisyon han An Barantayan ginagamit ha sinemana nga pakiana ngan baton nga mga paghisgot ha mga kongregasyon ha bug-os nga kalibotan. An magasin nga An Barantayan padayon nga iginpupublikar tikang han 1879. Usa ito han pinakadamu nga naipapanaltag nga magasin ha bug-os nga kalibotan.

asembleya. Kitaa:  sirkito nga asembleya.

Assembly Hall of Jehovah’s Witnesses. Daku nga lugar han pagsingba nga gintatag-iya han mga Saksi ni Jehova nga ginagamit para ha mas dagku nga katirok han damu nga kongregasyon tikang ha espisipiko nga mga lugar. Puydi liwat ito tawagon nga “Assembly Hall.”

Bag-o nga Kalibotan nga Hubad han Baraan nga Kasuratan. An bug-os nga ulohan han Hebreo nga Kasuratan (“Daan nga Tugon”) ngan Griego nga Kasuratan (“Bag-o nga Tugon”) nga iginhuhubad ngan iginpupublikar han mga Saksi ni Jehova. Puydi liwat ini tawagon nga Bag-o nga Kalibotan nga Hubad.

Bethel, Bethelite, pamilya han Bethel. An “Bethel” usa nga Hebreo nga termino nga nangangahulogan nga “Balay han Dios.” Bethel an tawag ha mga pasilidad nga ginagamit han mga Saksi ni Jehova basi giyahan ngan suportahan an ira iginbase ha Biblia nga espirituwal nga mga buruhaton ha tagsa nga nasud o rehiyon. An mga Saksi nga nag-aalagad dida hito nga mga pasilidad kaapi han usa nga relihiyoso nga organisasyon ngan gintatawag nga mga “Bethelite.” Waray hira sweldo. Sugad nga grupo, gintatawag hira nga “pamilya han Bethel” kay pariho ha usa nga pamilya, hira urosa nga naukoy, nagsisingba, ngan nagtatrabaho ha sugad nga mga pasilidad. An termino nga “Bethelite” diri ginagamit sugad nga titulo para ha pagpasidungog.

Branch Committee. Kon nag-iestablisar hin sanga nga opisina, may gintutokahan nga Branch Committee nga ginkukompwesto hin tulo o mas damu pa nga tigurang basi manginano ha mga buruhaton ha nasud o mga nasud nga sakop hito nga sanga nga opisina.

brother. Lalaki nga ginbawtismohan sugad nga usa han mga Saksi ni Jehova. Daku an siyahan nga letra hini kon ginagamit antes han apelyido han usa nga lalaki nga Saksi (pananglitan, Brother Smith). Diri ini ginagamit sugad nga titulo para ha pagpasidungog. Puropariho hini an paagi han pagtawag ha usa nga babaye nga Saksi (pananglitan, Sister Smith).

Gilead, Gilead School. Pinahalipot nga porma han Watchtower Bible School of Gilead nga gin-establisar han 1943, ha siyahan para magbansay hin mga misyonero. Ha pagkayana, usa ini nga lima ka bulan nga kurso han pag-aram ha Biblia para ha mga Saksi ni Jehova nga gin-imbitar nga umiskwela. Gutiay nga letra an “school” o “eskwelahan” kon diri ini kasunod han “Gilead.”

 internasyonal nga kombensyon. Tulo ka adlaw nga katirok para ha pagsingba ngan pagkarawat hin pagtutdo tikang ha Biblia nga ginhihikay han mga Saksi ni Jehova ngan ginhihimo hin makausa kada pipira ka tuig ha ginpili nga mga syudad ha bug-os nga kalibotan. An mga Saksi tikang ha iba-iba nga nasud gin-iimbitar nga tumambong sugad nga mga delegado. Ini nga mga kombensyon abrido ha publiko ngan katuyoan hini nga buligan an mga natambong nga magin mas duok ha Dios ngan parig-unon an pagkaurosa han mga Saksi ni Jehova ha bug-os nga kalibotan. An internasyonal nga mga kombensyon kasagaran na nga ginhihimo ha ginpletehan nga mga pasilidad ngan nagtitikang ha Biernes ngan natatapos ha Domingo. Ini nga mga kombensyon waray bayad ngan waray pangolekta nga ginhihimo.

Jehova. An personal nga ngaran han makagarahum-ha-ngatanan nga Dios ngan Maglalarang sugad han iginsusumat ha Kasuratan. (Salmo 83:18) An pulong nga “Jehova” diri dapat gamiton sugad nga pagtawag (pananglitan, “Jehova hiya”) ha usa han mga Saksi ni Jehova.

Jesu-Kristo. An bugtong nga Anak han Dios. (Juan 3:16) Ginhuhunahuna han mga Saksi ni Jehova nga hi Jesu-Kristo an ira Lider, ngan nangangalimbasog hira nga subaron an iya ehemplo ngan magkinabuhi uyon ha iya mga katutdoan. Para ha mga Saksi, hiya an pinakabantogan nga tawo nga nabuhi, an pinakaimportante nga Saksi ni Jehova, ngan an gagamiton ni Jehova nga Dios ha pagtalwas ha katawohan.—Isaias 9:6, 7; Pahayag 1:5.

katirok ha midweek. Sinemana nga katirok han kongregasyon nga kasagaran na nga ginhihimo ha gab-i ha ginpili nga adlaw tikang ha Lunes tubtob ha Biernes. Ini nga katirok may tulo ka bahin ngan gintatawag nga An Aton Kristiano nga Pagkinabuhi Ngan Ministeryo, ngan gindisenyo ini basi buligan an mga Saksi nga magin mas epektibo nga mga ministro han Dios. Pariho han ngatanan nga katirok han mga Saksi ni Jehova, an pagtambong in person man o pinaagi hin videoconference waray bayad ngan waray pangolekta nga ginhihimo.

Kingdom Hall of Jehovah’s Witnesses. Lugar han pagsingba nga ginagamit han usa o mas damu pa nga kongregasyon. Kasagaran na nga gintatawag ini nga “Kingdom Hall.” Alayon likayi an paggamit han pulong nga “singbahan.”

kombensyon. Kitaa:  internasyonal nga kombensyon ngan  regional nga kombensyon.

kongregasyon. Organisado nga grupo han mga Saksi nga regular nga nagkakatirok para ha pagsingba. Usa nga grupo hin mga tigurang an may responsabilidad nga magdumara hin iba-iba nga programa han pagtutdo nga nakabase ha Biblia ngan maghatag hin espirituwal nga giya ha kongregasyon sugad nga grupo ngan sugad nga indibiduwal. An mga katirok han kongregasyon abrido ha publiko. Waray ini bayad ngan waray pangolekta nga ginhihimo.

magwarali. Usa nga nakikigbahin ha ministeryo ha publiko kaupod han usa nga kongregasyon han mga Saksi ni Jehova. Para magin kwalipikado, kinahanglan nasasabtan niya an nangunguna nga mga katutdoan han Biblia ngan natoo hiya hito, ngan nagkikinabuhi hiya uyon ha mga prinsipyo han Dios. An mga magwarali diri ginsusweldohan ha ira pakigbahin ha ministeryo ngan diri mga empleyado han ira kongregasyon o han bisan ano nga korporasyon han mga Saksi ni Jehova. Ini nga termino diri ginagamit sugad nga titulo para ha pagpasidungog.

Memoryal han kamatayon han Kristo. An tinuig nga paghinumdom ha kamatayon ni Jesu-Kristo. Gintatawag liwat nga Panihapon han Ginoo, Kataposan nga Panihapon, Memoryal, o Memoryal han Kamatayon ni Jesus. Para ha mga Saksi ni Jehova, ini an pinakaimportante nga okasyon ha bug-os nga tuig ngan an amo la nga relihiyoso nga seremonya nga espisipiko nga iginsugo han Kristo nga isaurog han iya mga sumurunod.—Lucas 22:19, 20.

 Mga Saksi ni Jehova. Relihiyoso nga grupo han mga Kristiano nga nagsisingba kan Jehova nga Dios ngan aktibo nga igin-aaghat an edukasyon tikang ha Biblia ha iba-iba nga paagi. Ini nga edukasyon tikang ha Biblia nakapokus ha pagpasamwak han maopay nga sumat mahitungod han Ginhadian, o gobyerno, han Dios. (Mateo 24:14) An ngaran nga Mga Saksi ni Jehova nagpapaiba ha ira ha iba nga mga relihiyon, ngan nagtutudlok ito diri la ha kon hin-o an ira ginrirepresentaran kondi pati liwat ha ministeryo nga kinaburut-on nga ira ginbubuhat ha ngaran han Dios. An usa nga tawo matatawag la nga usa han mga Saksi ni Jehova kon may-ada na hiya igo nga pagsabot ha nangunguna nga mga katutdoan ha Biblia, kwalipikado na nga makigbahin ha ministeryo ha publiko kaupod han usa nga kongregasyon han mga Saksi ni Jehova, ngan nabawtismohan na sugad nga simbolo han iya personal nga dedikasyon kan Jehova nga Dios. Ha siyahan nga pag-unabi ha usa nga artikulo, dapat gamiton an opisyal ngan bug-os nga ngaran nga “Mga Saksi ni Jehova.” Daku an siyahan nga letra ha “mga” kon ginagamit kaupod han usa nga pulong nga nagtutudlok hito nga ngaran sugad nga relihiyon o organisasyon (pananglitan, “an relihiyon nga Mga Saksi ni Jehova”). Ha iba pa nga pag-unabi, puydi gamiton an gutiay nga letra nga “mga” (pananglitan, “an mga Saksi ni Jehova”). Puydi liwat gamiton an “mga Saksi.” Diri tama nga tawagon nga “Jehova” an usa nga Saksi.—Isaias 43:10.

ministeryal nga surugoon. Hamtong ha espirituwal nga lalaki nga Saksi nga gintokahan ha pagbulig ha mga tigurang nga atamanon an kongregasyon. Basi magin ministeryal nga surugoon, kinahanglan padayon hiya nga nakakaabot ha mga kwalipikasyon nga gin-uunabi han Biblia ha 1 Timoteo 3:8-10, 12, 13 ngan Tito 2:6-8. An mga ministeryal nga surugoon nanginginano ngan nabulig ha importante nga mga buruhaton ha sulod han kongregasyon. An ministeryal nga surugoon diri ginsusweldohan ha iya mga serbisyo ngan diri empleyado han ira kongregasyon o han bisan ano nga korporasyon han mga Saksi ni Jehova. An kadam-an nga ministeryal nga surugoon may-ada sekular nga trabaho basi masuportahan an ira kalugaringon ngan an ira pamilya. Pag-abot han panahon, an iba nga mga ministeryal nga surugoon mahimo magin kwalipikado ha pagin mga tigurang. Ini nga termino diri ginagamit sugad nga titulo para ha pagpasidungog.

misyonero. Bawtismado nga Saksi nga gin-aasayn han Nagmamando nga Lawas han mga Saksi ni Jehova ngadto ha iba-iba nga lugar ha bug-os nga kalibotan. An mga misyonero andam nga bumaya ha ira balay ngan bangin bumalhin pa ngani ha iba nga nasud basi makabulig ha pagpasamwak han maopay nga sumat han Ginhadian.—Mateo 24:14.

Nagmamando nga Lawas han mga Saksi ni Jehova. Gutiay nga grupo han mga tigurang nga gintokahan basi panginanoon an espirituwal nga panginahanglan han mga Saksi ni Jehova ha bug-os nga kalibotan. Kasagaran na nga gintatawag nga “Nagmamando nga Lawas.” Direkta hira nga nakikigbahin ha pagpangandam han mga publikasyon nga iginbase ha Biblia. Bisan kon an Nagmamando nga Lawas an nangunguna ha pag-organisar han mga buruhaton han mga Saksi ni Jehova ha bug-os nga kalibotan, hi Jesu-Kristo gud la an ira ginhuhunahuna nga Lider han mga Saksi ni Jehova. An mga opisina han Nagmamando nga Lawas nahimumutang ha World Headquarters of Jehovah’s Witnesses ha Warwick, New York, U.S.A.

 pag-alagad ha kanataran. An pagministeryo han mga Saksi ha publiko, sugad nga pagsunod ha sugo ni Jesus nga isangyaw an “maopay nga sumat han Ginhadian” ha mga tawo ha “bug-os nga inuukyan nga tuna sugad nga pamatuod ha ngatanan nga nasud.”—Mateo 24:14; 28:19.

pagminagburugto. An bug-os-kalibotan nga pagminagburugto han mga Saksi ni Jehova (lalaki ngan babaye).—1 Pedro 5:9.

Pagpamata! Magasin nga iginpupublikar ngan iginpapanaltag han mga Saksi ni Jehova. Han 1919, siyahan nga iginpublikar ito sugad nga The Golden Age, ngan han 1937, an ulohan hito ginsaliwnan hin Consolation. Tikang ha isyu han Agosto 22, 1946, gintawag na ito nga Awake! o Pagpamata! Ginpili an ulohan nga Pagpamata! basi pabug-atan ha mga magbarasa nga dapat hira mahibaro han kahulogan han mga panhitabo ha kalibotan. Usa ito han pinakadamu nga naipapanaltag nga magasin ha bug-os nga kalibotan.

pagsangyaw. Kitaa:  pag-alagad ha kanataran.

Panpubliko nga Katirok. Sinemana nga katirok han kongregasyon, nga kasagaran na nga ginhihimo ha weekend, diin iginpipresenta an 30 minutos nga pahayag nga iginbase ha Biblia nga gindisenyo para ha publiko. Kasagaran na nga ginsusundan ini han Pag-aram ha Barantayan, usa ka oras nga pakiana ngan baton nga paghisgot han usa nga topiko nga iginbase ha Biblia gamit an usa nga artikulo ha aradman nga edisyon han An Barantayan. Pariho han ngatanan nga katirok han mga Saksi ni Jehova, an pagtambong in person man o pinaagi hin videoconference waray bayad ngan waray pangolekta nga ginhihimo.

paramangno han sirkito. Eksperyensyado nga tigurang nga nag-aalagad ilarom han paggiya han sanga nga opisina nga (upod an iya asawa, kon inasaw-an) regular nga nabisita ha tagsa nga kongregasyon ha sulod han usa nga sirkito, kasagaran na nga makaduha ha usa ka tuig. Labot pa ha pagdasig ha mga kaapi han tagsa nga kongregasyon, iya liwat gindadasig ngan gintatagan hin instruksyon an mga tigurang ngan mga ministeryal nga surugoon. An mga paramangno han sirkito nag-aandam hin espisipiko nga mga instruksyon uyon ha panginahanglan han tagsa nga kongregasyon. Ini nga termino diri ginagamit sugad nga titulo para ha pagpasidungog.

payunir. An tawag ha usa nga bawtismado nga Saksi nga nangangalimbasog ha paggahin hin espisipiko nga kadamu han oras ha pagministeryo ha publiko. Kasagaran na nga nagtutudlok ito ha “regular payunir,” nga naggagahin hin 600 ka oras kada tuig (50 ka oras kada bulan). Usahay nagtutudlok liwat ito ha “auxiliary payunir,” nga naggagahin hin 15 o 30 ka oras ha usa ka bulan o ha pipira nga sunod-sunod nga bulan. An mga payunir diri ginsusweldohan ha ira pagministeryo ha publiko ngan diri mga empleyado han ira kongregasyon o han bisan ano nga korporasyon han mga Saksi ni Jehova. An kadam-an nga payunir may-ada sekular nga trabaho basi masuportahan an ira kalugaringon. Ini nga termino diri ginagamit sugad nga titulo para ha pagpasidungog.

 regional nga kombensyon. Tulo ka adlaw nga katirok nga ginhihimo kada tuig han damu nga kongregasyon ha espisipiko nga lugar, nga an katuyoan amo an pagbulig ha mga natambong nga magin mas duok ha Dios. Abrido ini ha publiko. An programa nag-uupod hin mga suhestyon nga makakabulig ha mga natambong nga magpahimulos ha sagdon han Biblia anoman an ira edad. May iginpipresenta nga mga panhitabo ha adlaw-adlaw ngan drama nga nakabase ha Biblia, nga nagpapakita kon paonan-o iaaplikar an mga prinsipyo ha Biblia. An mga kombensyon kasagaran na nga ginhihimo ha dagku nga ginpletehan nga mga pasilidad, sugad han mga arena, estadyum, ngan convention center. An mas gudtiay nga regional nga kombensyon puydi liwat himoon ha hirani nga mga Assembly Hall han mga Saksi ni Jehova. An in person nga mga sesyon kasagaran na nga nagtitikang ha Biernes ngan natatapos ha Domingo. Hinin naglabay pa la nga mga tuig, nagkaada mga rekording han programa nga makikita online. Pariho han ngatanan nga katirok han mga Saksi ni Jehova, an pagtambong waray bayad ngan waray pangolekta nga ginhihimo.

sanga nga opisina. An pasilidad nga ginagamit han Branch Committee ha pagsuporta ngan pagpanginano han espirituwal nga mga buruhaton han mga Saksi ni Jehova ha usa o mas damu pa nga nasud. Usahay gintatawag ito nga “branch.”

 sirkito nga asembleya. Usa ka adlaw nga katirok han damu nga kongregasyon han mga Saksi ni Jehova nga ginhihimo makaduha ha usa ka tuig. An sirkito nga mga asembleya abrido ha publiko ngan katuyoan hini nga buligan an mga tawo nga magin mas duok ha Dios. An programa nag-uupod hin mga suhestyon nga makakabulig ha mga natambong nga magpahimulos ha sagdon han Biblia anoman an ira edad. May iginpipresenta nga haglipot nga pasundayag han nahitatabo ha adlaw-adlaw basi ipakita kon paonan-o iaaplikar an mga leksyon ha Biblia. Kasagaran na nga ginhihimo ini ha mga Assembly Hall han mga Saksi ni Jehova. Puydi liwat ini himoon ha ginpletehan nga pasilidad o kitaon online. Kasagaran na nga ginhihimo ini ha weekend. An ngatanan nga sesyon waray bayad ngan waray pangolekta nga ginhihimo.

sirkito. Grupo hin mga kongregasyon han mga Saksi ni Jehova ha espisipiko nga lugar.

sister. Babaye nga ginbawtismohan sugad nga usa han mga Saksi ni Jehova. Daku an siyahan nga letra hini kon ginagamit antes han apelyido han usa nga babaye nga Saksi (pananglitan, Sister Smith). Diri ini ginagamit sugad nga titulo para ha pagpasidungog. Puropariho hini an paagi han pagtawag ha usa nga lalaki nga Saksi (pananglitan, Brother Smith).

tigurang. Hamtong ha espirituwal nga lalaki nga Saksi nga gintokahan ha pagtutdo ngan pagpanginano ha kaopayan han kongregasyon. An usa nga tigurang kinahanglan padayon nga nakakaabot ha mga kwalipikasyon nga gin-uunabi han Biblia ha 1 Timoteo 3:1-7; Tito 1:5-9; Santiago 3:17, 18; ngan 1 Pedro 5:2. An mga tigurang diri sweldado nga mga ministro ngan diri mga empleyado han ira kongregasyon o han bisan ano nga korporasyon han mga Saksi ni Jehova. An kadam-an nga tigurang may-ada sekular nga trabaho basi masuportahan an ira kalugaringon ngan an ira pamilya. An mga tigurang diri mga klero ngan diri hira labaw ha iba nga mga kaapi han kongregasyon. Ini nga termino diri ginagamit sugad nga titulo para ha pagpasidungog.

PAHINUMDOM: Kon nagrireport parte ha mga Saksi ni Jehova, alayon gamita an kompleto nga ngaran ha siyahan nga pag-unabi hini. Para ha dugang nga impormasyon, kitaa:  Mga Saksi ni Jehova.