An Ikaduha nga Surat ha mga Taga-Corinto 10:1-18
10 Yana ako mismo, hi Pablo, naghahangyo ha iyo pinaagi han pagkamalumo ngan pagkabuotan han Kristo,+ bisan ubos ako kon kaatubang niyo,+ pero maisugon ha iyo kon waray ako dida.+
2 Nakikimalooy ako nga kon aada ako, diri unta ako magin maisugon ngan maghimo han seryoso nga mga pitad nga akon ginlalaoman kontra ha iba nga naghuhunahuna ha amon nga sugad hin nagkikinabuhi kami ha unudnon nga paagi.
3 Kay bisan kon nagkikinabuhi kami ha unod, diri kami nakikig-away uyon ha unudnon nga paagi.
4 Kay an amon mga armas ha pakig-away diri unudnon,+ kondi gamhanan tungod han Dios+ basi itumba an mga butang nga marig-on an pagkatindog.
5 Kay gintutumba namon an mga pangatadongan ngan an tagsa nga hitaas nga butang nga gintindog kontra ha kahibaro mahitungod ha Dios,+ ngan ginbibihag namon an tagsa nga panhunahuna basi himoon ito nga masinugtanon ha Kristo;
6 ngan andam kami pagpadapat hin sirot ha tagsa nga pagkadiri-masinugtanon,+ katapos gud niyo mapamatud-an an iyo bug-os nga pagkamasinugtanon.
7 Ginkikita niyo an mga butang uyon ha hitsura. Kon an bisan hin-o may kompyansa ha iya kalugaringon nga kanan Kristo hiya, pamalandungon utro niya ini nga kamatuoran: Sugad la nga kanan Kristo hiya, amo man liwat kami.
8 Kay bisan kon medyo magsobra an akon paghambog mahitungod han awtoridad nga iginhatag ha amon han Ginoo basi parig-unon kamo ngan diri basi paluyahon kamo,+ diri ako mahibubutang ha kaarawdan.
9 Kay diri ko karuyag nga baga hin nagsasari ako paghadlok ha iyo pinaagi han akon mga surat.
10 Kay nasiring hira: “An iya mga surat magbug-at ngan mapwersa, kondi an iya presensya maluya ngan an iya ginyayakan waray pulos.”
11 Sadang hunahunaon hito nga tawo nga an amon ginsisiring* pinaagi han mga surat kon waray kami dida, ini liwat an amon bubuhaton* kon aada kami.+
12 Kay diri kami nangangahas nga igpariho an amon kalugaringon o itanding an amon kalugaringon ha iba nga nagrirekomendar han ira kalugaringon.+ Kondi kon ira gin-uusisa an ira kalugaringon uyon ha ira mga suruklan ngan igintatanding an ira kalugaringon ha ira kalugaringon, waray hira pagsabot.+
13 Pero diri kami maghahambog ha gawas han mga tubtoban nga igintoka ha amon, kondi ha sulod han tubtoban han teritoryo nga ginsukol han Dios para ha amon,* nga ginpaabot ito tubtob ha iyo.+
14 Ha pagkamatuod, diri kami nalahos nga sugad hin waray kami makaabot ha iyo, kay kami an siyahan nga nakaabot tubtob ngada ha iyo dara an maopay nga sumat mahitungod han Kristo.+
15 Diri, diri kami naghahambog ha gawas han mga tubtoban nga igintoka ha amon mahitungod han mga buhat han iba, pero naglalaom kami nga samtang an iyo pagtoo padayon nga nagdudugang, an amon nahimo mag-uswag unta, ha sulod han amon teritoryo. Tungod hini damu pa an amon mahihimo,
16 basi maipasamwak namon an maopay nga sumat ha mga nasud nga hirayo ha iyo, para diri namon ighambog an ginbuhat na ha teritoryo han iba.
17 “Kondi hiya nga naghahambog, ighambog niya hi Jehova.”*+
18 Kay an gin-uuyonan diri adton nagrirekomendar han iya kalugaringon,+ kondi adton iginrirekomendar ni Jehova.*+
Mga footnote
^ Lit., “amo man kami ha buhat.”
^ Lit., “kon ano kami ha pulong.”
^ O “ginbahin-bahin ha amon han Dios uyon ha sukol.”
