An Ikaduha nga Surat kan Timoteo 2:1-26
2 Salit ikaw anak ko,+ magpadayon ka ha pagkuha hin gahum pinaagi han diri matupngan nga pagkabuotan nga aada kan Kristo Jesus;
2 ngan an mga butang nga imo nabatian ha akon nga ginsuportaran hin damu nga saksi,+ itapod ini nga mga butang ha matinumanon nga kalalakin-an, basi hira liwat magin kwalipikado gud ha pagtutdo ha iba.
3 Sugad nga maopay nga sundalo+ ni Kristo Jesus, antosa an kasakitan.+
4 Waray tawo nga nagsiserbisyo sugad nga sundalo an nasulod* ha mga negosyo* hini nga kinabuhi, basi makarawat an pag-uyon han naglista ha iya sugad nga sundalo.
5 Ngan bisan ha mga pauyag, an bisan hin-o nga kaapi ha kompetisyon nga diri nasunod ha mga surundon diri gintatagan han premyo.*+
6 An maduruto nga parag-uma kinahanglan amo an siyahan nga makaon han mga bunga.
7 Pirme hunahunaa an akon ginsisiring; tatagan ka han Ginoo hin pagsabot* ha ngatanan nga butang.
8 Hinumdumi nga hi Jesu-Kristo ginbuhi tikang ha mga patay+ ngan tulin ni David,*+ uyon ha maopay nga sumat nga akon iginsasangyaw,+
9 nga tungod hito nag-aantos ako ngan ginpriso nga sugad hin kriminal.+ Bisan pa hito, an pulong han Dios diri nakagapos.+
10 Ini an hinungdan nga padayon nga gin-iilob ko an ngatanan nga butang tungod han mga pinili,+ basi makarawat liwat nira an katalwasan pinaagi kan Kristo Jesus, upod an waray kataposan nga himaya.
11 Masasarigan ini nga mga pulong: Ha pagkamatuod, kon mamatay kita kaupod niya, mabubuhi liwat kita kaupod niya;+
12 kon padayon kita nga magpailob, magmamando liwat kita kaupod niya sugad nga mga hadi;+ kon ignigar naton hiya, igninigar liwat kita niya;+
13 kon kita diri matinumanon, nagpapabilin hiya nga matinumanon, kay diri niya igninigar an iya kalugaringon.
14 Pirme hira pahinumdoma hini nga mga butang, igtutdo* ha ira ha atubangan han Dios nga diri mag-araway mahitungod han mga pulong, kay waray gud ito kapulsanan tungod kay nakakadaot ito ha mga namamati.
15 Buhata an imo bug-os nga mahihimo nga ipresentar an imo kalugaringon sugad nga inuyonan han Dios, usa nga magburuhat nga waray iginkakaawod, nga ginagamit an pulong han kamatuoran ha husto nga paagi.+
16 Pero isalikway an waray pulos nga iristorya nga supak ha kon ano an baraan,+ kay magriresulta ito ha ngatanan nga klase han diri diosnon nga panggawi,
17 ngan an ira pulong magsasarang pariho hin ganggrena.* Kaupod nira hira Himeneo ngan Fileto.+
18 Ini hira binaya ha kamatuoran, nga nasiring nga nahitabo na an pagkabanhaw,+ ngan gindadaot nira an pagtoo han iba.
19 Bisan pa hito, an marig-on nga pundasyon han Dios padayon nga natindog, nga may-ada hini nga selyo, “Kilala ni Jehova* kon hin-o an iya,”+ ngan, “Sadang isalikway han ngatanan nga natawag ha ngaran ni Jehova*+ an pagkadiri-matadong.”
20 Ha usa nga daku nga balay may mga garamiton* nga hinimo diri la ha bulawan ngan silber kondi hinimo liwat ha kahoy ngan lapok, ngan an iba para ha dungganon nga paggamit pero an iba para ha diri dungganon nga paggamit.
21 Salit kon an bisan hin-o nagpapahirayo ha urhi nga gin-unabi, magigin instrumento* hiya para ha dungganon nga paggamit, ginbaraan, mapulsanon ha nagtatag-iya ha iya, andam ha tagsa nga maopay nga buhat.
22 Salit palagiw tikang ha mga hingyap han pagkabatan-on, lugod pangalimbasog pirme nga ipakita an katadongan, pagtoo, gugma, kamurayawan, upod han mga natawag ha Ginoo nga may limpyo nga kasingkasing.
23 Dugang pa, isalikway an linurong ngan waray pulos nga mga debate,+ kay maaram ka nga nagriresulta ito hin mga araway.
24 Kay an uripon han Ginoo diri kinahanglan makig-away, lugod kinahanglan magin buotan* ha ngatanan,+ kwalipikado ha pagtutdo, nagpupugong ha kalugaringon kon ginbubuhatan hin maraot,+
25 ngan may pagkamalumo nga nagtututdo ha mga rebelyoso.+ Bangin itugot han Dios nga magbasol hira* basi magkaada hin husto nga kahibaro han kamatuoran,+
26 ngan makapamurubuot hira ngan makapalagiw ha bitik han Yawa, kay iya hira nadakop nga buhi basi magbuhat han iya kaburut-on.+
Mga footnote
^ Lit., “nahibabalighot.”
^ O posible nga “ha adlaw-adlaw nga mga buruhaton.”
^ O “korona.”
^ O “husto nga pagturotimbang.”
^ Lit., “binhi ni David.”
^ Lit., “pagpamatuod hin maopay.”
^ O “samad nga nagkukutkot han unod.”
^ O “mga surudlan.”
^ O “garamiton; surudlan.”
^ O “mataktika.”
^ O “magbag-o an ira hunahuna.”
