Josue 23:1-16
23 Paglabay hin damu ka adlaw katapos ihatag ni Jehova ha Israel an kapahuwayan+ tikang ha ngatanan nga kaaway ha palibot hito, han hi Josue lagas na ngan hilawig na an pangidaron,+
2 iginpatawag ni Josue an bug-os nga Israel,+ an mga tigurang hito, an mga ulo hito, an mga hukom hito, ngan an mga opisyal hito,+ ngan nagsiring hiya ha ira: “Lagas na ako; hilawig na an akon pangidaron.
3 Ngan nakita niyo mismo an ngatanan nga ginbuhat ni Jehova nga iyo Dios hini ngatanan nga nasud para ha iyo kay hi Jehova nga iyo Dios an nakikiggirra para ha iyo.+
4 Kitaa, iginhatag ko ha iyo pinaagi han pagripa*+ an tuna han mga nasud nga nahibilin sugad nga panurundon han iyo mga tribo,+ pati na an tuna han ngatanan nga nasud nga akon ginbungkag,+ tikang ha Jordan tubtob ha Daku nga Dagat* ha weste.*
5 Ngan hi Jehova nga iyo Dios an padayon nga nagtabog ha ira tikang ha iyo atubangan,+ ngan iya hira ginpaiwas para ha iyo, ngan iyo gintag-iya an ira tuna, sugad han iginsaad ha iyo ni Jehova nga iyo Dios.+
6 “Yana kinahanglan magin maisugon gud kamo ha pagsunod ngan pagbuhat han ngatanan nga nahisurat ha libro han Balaud+ ni Moises pinaagi han diri gud pagsimang tikang hito ha too o ha wala,+
7 pinaagi han diri gud pakig-upod hini nga mga nasud+ nga nahibilin kaupod niyo. Diri ngani niyo sadang unabihon an mga ngaran han ira mga dios+ o manumpa ha ira ngaran, ngan diri gud kamo sadang mag-alagad ha ira o yumukbo ha ira.+
8 Kondi kinahanglan magin maunungon kamo kan Jehova nga iyo Dios,+ sugad han iyo ginbubuhat tubtob hini nga adlaw.
9 Paiiwason ni Jehova tikang ha iyo atubangan an dagku ngan gamhanan nga mga nasud,+ kay waray tawo nga nakapirde ha iyo tubtob hini nga adlaw.+
10 Usa la ka tawo dida ha iyo an maglalanat hin usa ka yukot,+ kay hi Jehova nga iyo Dios nakikiggirra para ha iyo,+ sugad han iya iginsaad ha iyo.+
11 Salit pagbantay kamo pirme*+ pinaagi han paghigugma kan Jehova nga iyo Dios.+
12 “Kondi kon bumaya kamo ngan magin maunungon ha kon ano an nahisalin hini nga mga nasud nga nahibilin+ kaupod niyo ngan makig-alyansa kamo ha ira pinaagi han pag-asawa,*+ ngan makig-upod kamo ha ira ngan hira makig-upod ha iyo,
13 sigurado nga mahibabaro kamo nga hi Jehova nga iyo Dios diri magpapadayon ha pagpaiwas hini nga mga nasud para ha iyo.+ Hira magigin lit-ag, bitik, latigo nga naglalapdos ha iyo mga kagiliran,+ ngan mga tunok ha iyo mga mata tubtob nga mapoo kamo tikang hinin maopay nga tuna nga iginhatag ha iyo ni Jehova nga iyo Dios.
14 “Yana kitaa! Hirani na ako mamatay,* ngan maaram gud kamo ha bug-os niyo nga kasingkasing ngan ha bug-os niyo nga kalag* nga waray bisan usa nga pulong ha ngatanan nga mag-opay nga saad nga ginsiring ha iyo ni Jehova nga iyo Dios an napakyas. Natuman ito ngatanan para ha iyo. Waray bisan usa hito nga pulong an napakyas.+
15 Kondi sugad la nga natuman ha iyo an ngatanan nga mag-opay nga saad nga ginsiring ha iyo ni Jehova nga iyo Dios,+ pahihinaboon liwat ni Jehova ha iyo an ngatanan nga kadaot nga iya iginsaad* ngan pupoohon niya kamo tikang hinin maopay nga tuna nga iginhatag ha iyo ni Jehova nga iyo Dios.+
16 Kon talapason niyo an kasabotan ni Jehova nga iyo Dios nga iya iginsugo ha iyo nga tumanon ngan kon lumakat kamo ngan mag-alagad ha iba nga mga dios ngan magyukbo ha ira, maglalarab an kasina ni Jehova ha iyo+ ngan mapupoo dayon kamo tikang ha maopay nga tuna nga iya iginhatag ha iyo.”+
Mga footnote
^ O “ha gintutunoran han adlaw.”
^ Karuyag sidngon, an Mediteraneo.
^ O “iginhatag ko ha iyo sugad nga malon.”
^ O “Salit bantayi hin maopay an iyo kalag.”
^ O “makig-asawa kamo ha ira.”
^ Lit., “Yana nga adlaw makadto ako ha dalan han bug-os nga tuna.”
^ O “ngatanan nga magraot nga pulong.”
