AN LIBRO nga Pahayag may-ada mga pulong nga diri angay sabuton ha literal nga paagi. (Pahayag 1:1) Pananglitan, gin-uunabi hito an usa nga babaye nga may ngaran nga ‘Babilonya nga Daku’ nga nakasurat ha iya agtang. Ginsisiring nga ini nga babaye nalingkod ha bawbaw han “kadam-an, ngan mga nasud.” (Pahayag 17:1, 5, 15) Tungod kay waray literal nga babaye nga makakahimo hini, sigurado gud nga simboliko an Babilonya nga Daku. Ano kon sugad an ginrirepresentaran hinin simboliko nga puta?

Ha Pahayag 17:18, an amo gihapon nga simboliko nga babaye iginhuhulagway sugad nga “an daku nga bungto [“syudad,” NW], nga naghahadi ha ngatanan nga mga kahadian ha tuna.” An pulong nga “syudad” nagpapasabot hin organisado nga grupo han mga tawo. Tungod kay inin “daku nga syudad” naghahadi ha “kahadian  ha tuna,” an babaye nga ginngaranan nga Babilonya nga Daku sigurado nga maimpluwensya gud nga organisasyon nga internasyonal an nasasakopan. Husto nga matatawag ito nga imperyo ha kalibotan. Ano nga klase hin imperyo? Relihiyoso nga imperyo. Tigamni kon paonan-o an pipira nga mga bersikulo ha libro nga Pahayag nga may kalabotan hito naggigiya ha aton ngada hini nga konklusyon.

An usa nga imperyo mahimo nga politikal, komersyal, o relihiyoso. An babaye nga ginngaranan nga Babilonya nga Daku diri politikal nga imperyo tungod kay an Pulong han Dios nasiring nga “an kahadian ha tuna,” o an mga elemento ha politika hini nga kalibotan, “nakighilawas” ha iya. An iya pakighilawas amo an iya pakig-alyansa ha mga magmarando hini nga tuna ngan nagpapatin-aw ini kon kay ano nga tinatawag ito nga an “daku nga puta.”—Pahayag 17:1, 2; Jakobo 4:4.

An Babilonya nga Daku diri mahimo nga komersyal nga imperyo tungod kay an “mga magbaraligya ha tuna,” nga nagrirepresentar ha mga elemento han komersyo, mabibido hinduro ha panahon han iya kabungkagan. Ha pagkamatuod, an kahadian ngan an mga magbaraligya pariho iginhuhulagway sugad nga nagkikita ha Babilonya nga Daku tikang “ha hirayo.” (Pahayag 18:3, 9, 10, 15-17) Salit, makatadunganon an pagsiring nga an Babilonya nga Daku, diri politikal o komersyal nga imperyo, kondi usa nga relihiyoso nga imperyo.

An relihiyoso nga pangirilal-an han Babilonya nga Daku ginpaparig-on pa gud han asoy nga hiya naglilimbong ha ngatanan nga mga nasud pinaagi han iya “espiritistiko nga buhat.” (Pahayag 18:23, NW) Tungod kay an ngatanan nga klase han espiritismo konektado ha relihiyon ngan giniyahan han mga demonyo, diri urusahon nga ha Biblia tinatawag an Babilonya nga Daku nga “urukyan han mga yawa.” (Pahayag 18:2; Deuteronomio 18:10-12) Ini nga imperyo iginhuhulagway liwat sugad nga aktibo nga nakontra ha totoo nga relihiyon, nga nagpipersigir ha “mga manaragna” ngan ha “mga baraan.” (Pahayag 18:24) Ha pagkamatuod, an Babilonya nga Daku nangangalas hinduro ha totoo nga relihiyon salit madarahog nga ginpipersigir hito ngan ginpapatay pa ngani “an mga testigo ni Jesus.” (Pahayag 17:6) Salit, ini nga babaye nga ginngaranan nga Babilonya nga Daku matin-aw nga nagrirepresentar ha imperyo han palso nga relihiyon ha kalibotan, nga ginkukompwesto han ngatanan nga mga relihiyon nga nakontra kan Jehova nga Dios.