DIRI ha Biblia nagtikang an popular nga relihiyoso ngan sekular nga mga piyesta nga ginsasaurog ha damu nga mga lugar ha kalibotan yana. Ano, kon sugad, an gintikangan hito nga mga selebrasyon? Kon makakagsaliksik ka ha librarya, magkakaada ka interes ha igin-aasoy han reperensya nga mga libro mahitungod han mga piyesta nga popular ha lugar nga imo inuukyan. Tagda an pipira nga mga ehemplo.

 Pasko han Pagkabanhaw (Easter). “Waray gin-uunabi mahitungod han pagsaurog han Pasko han Pagkabanhaw ha Bag-o nga Testamento,” siring han The Encyclopædia Britannica. Paonan-o nagtikang an Pasko han Pagkabanhaw? Nagtikang ito ha pagano nga pagsingba. Bisan kon ini nga piyesta nagsasaurog kuno han pagkabanhaw ni Jesus, an mga kustomre nga may kalabotan han Pasko han Pagkabanhaw diri kanan Kristiano. Pananglitan, mahitungod han popular nga “kuneho han Pasko han Pagkabanhaw,” an The Catholic Encyclopedia nasiring: “An kuneho usa nga pagano nga simbolo ngan pirme nagsisimbolo han kapas ha pagpanganak.”

Mga Selebrasyon han Bag-o nga Tuig. Iba-iba an petsa ngan mga kustomre may kalabotan ha mga selebrasyon han Bag-o nga Tuig ha magkalainlain nga nasud. Mahitungod han gintikangan hini nga selebrasyon, an The World Book Encyclopedia nasiring: “Han 46 K.P., igindeklara han Romano nga magmarando nga hi Julio Cesar an Enero 1 sugad nga Adlaw han Bag-o nga Tuig. Iginpahinungod han mga Romano ini nga adlaw kan Janus, an dios han mga ganghaan, mga purtahan, ngan mga tinikangan. An bulan han Enero [January] iginsunod ha ngaran ni Janus, nga may-ada duha nga bayhon—an usa nagkikita ha atubangan ngan an usa pa nagkikita ha luyo.” Salit an mga selebrasyon han Bag-o nga Tuig nagtikang ha pagano nga mga tradisyon.

Kalag-kalag (Halloween). An The Encyclopedia Americana nasiring: “An mga bahin han mga kustomre nga may kalabotan ha Kalag-kalag mahimo sulsugon ngadto ha usa nga seremonya han mga Druid [kadaan nga Celtic nga mga saserdote] ha antes-han-Kristiano nga mga panahon. An mga Celt may-ada mga piyesta para ha duha nga nangunguna nga mga dios—usa nga dios nga adlaw ngan usa nga dios han mga patay . . . , nga an iya piyesta ginsasaurog ha Nobyembre 1, an tinikangan han Bag-o nga Tuig han mga Celt. An piyesta han mga patay hinay-hinay nga igintampo ha Kristiano nga rituwal.”

Iba pa nga mga Piyesta. Diri posible paghisgotan an ngatanan nga mga selebrasyon nga ginsasaurog ha bug-os nga kalibotan. Kondi, an mga piyesta nga nagpapasidungog ha mga tawo o ha mga organisasyon han tawo diri nakakalipay kan Jehova. (Jeremias 17:5-7; Buhat 10:25, 26) Hinumdumi liwat nga an gintikangan han relihiyoso nga mga selebrasyon amo an magpapakita kon nakakalipay ba ito ha Dios o diri. (Isaias 52:11; Pahayag 18:4) An mga prinsipyo han Biblia nga gin-unabi ha Kapitulo 16 hini nga libro mabulig ha imo nga masiguro kon ano an panhunahuna han Dios ha pakigbahin ha sekular nga mga piyesta.