Kulop na han Biernes, Nisan 14. Katunod han adlaw, magtitikang an Sabbath han Nisan 15. Patay na hi Jesus, pero buhi pa an duha nga kawatan ha iya sapit. Sumala ha Balaud, an patay nga mga lawas kinahanglan “diri magpabilin ha bug-os nga gab-i ha kahoy,” lugod, kinahanglan ito ilubong “hito ngahaw nga adlaw.”—Deuteronomio 21:22, 23.

Dugang pa, an kulop han Biernes gintatawag nga Pangandam kay an mga tawo nangangandam hin pagkaon ngan gintatapos an bisan ano nga buruhaton nga kinahanglan asikasuhon antes an Sabbath. Katunod han adlaw, magtitikang an doble, o “espesyal,” nga Sabbath. (Juan 19:31) Sugad hito an tawag kay an Nisan 15 an siyahan nga adlaw han pito ka adlaw nga Piyesta han Tinapay nga Waray Libadura, nga an siyahan nga adlaw pirme Sabbath. (Lebitiko 23:5, 6) Hini nga higayon, ito nga siyahan nga adlaw nahituman ha sinemana nga Sabbath, an ikapito nga adlaw.

Salit an mga Judio naghangyo kan Pilato nga dagmiton an pagpatay kan Jesus ngan ha iya duha nga sapit. Paonan-o? Pinaagi ha pagbari han ira mga bitiis. Tungod hito, diri na nira maiduduso tipaigbaw an ira lawas pinaagi han ira mga bitiis basi makaginhawa. Kinadto an mga sundalo ngan ginbari an mga bitiis han duha nga kawatan. Pero nakita nira nga patay na hi Jesus, salit waray nira baria an iya mga bitiis. Katumanan ini han Salmo 34:20: “Binabantayan niya an ngatanan nga mga tul-an hadto: Waray bisan usa nga narurumok.”

Basi masiguro nga patay na gud hi Jesus, usa nga sundalo an nagbuno ha iya kagiliran, dapit ha iya kasingkasing, pinaagi hin bangkaw. “Inawas dayon an dugo ngan tubig.” (Juan 19:34) Katumanan ini han usa pa nga tagna: “Hira matan-aw ha akon nga ira ginbuno.”—Sakarias 12:10.

Nakadto liwat hi Jose nga tikang ha syudad han Arimatea, usa nga “riko” ngan respetado nga membro han Sanhedrin. (Mateo 27:57) Ginhulagway hiya sugad nga ‘maopay ngan matadong nga tawo,’ nga ‘naghuhulat han Ginhadian han Dios.’ Ngani, sugad nga “disipulo ni Jesus pero sekreto la kay nahahadlok hiya ha mga Judio,” waray hiya umuyon ha desisyon han korte kontra kan Jesus. (Lucas 23:50; Marcos 15:43; Juan 19:38) Waray kahadlok nga gin-aro niya kan Pilato an lawas ni Jesus. Iginpatawag ni Pilato an opisyal han mga sundalo, nga nagkompirma nga patay na hi Jesus. Katapos, iginhatag ni Pilato an hangyo ni Jose.

Pinalit hi Jose hin limpyo ngan maopay nga klase hin tela nga lino, ngan iginlusad ha kahoy an lawas ni Jesus. Iya ginputos hin tela an patay basi iandam ha paglubong. Hi Nicodemo, “nga ha siyahan nakigkita kan Jesus hin gab-i,” binulig ha pagpangandam. (Juan 19:39) Nagdara hiya hin 33 ka kilo nga ginsalakot nga marahalon nga mira ngan aloe. Ginputos an lawas ni Jesus hin bendahe upod ini nga mga pahamot, uyon ha kustomre han mga Judio ha paglubong.

Hi Jose may-ada diri pa nagagamit nga lubnganan nga gin-ukab ha bato ha hirani nga dapit, ngan didto iginlubong hi Jesus. Katapos ginsadhan hin daku nga bato an lubnganan. Gindagmit an pagbuhat hini, antes magtikang an Sabbath. Hi Maria Magdalena ngan hi Maria nga nanay han burobata nga Santiago bangin binulig ha pagpangandam han lawas ni Jesus. Salit nagdagmit hira pag-uli “basi mag-andam hin mga pahamot ngan maghamot nga lana” para dugangan hin pahamot an lawas ni Jesus katapos han Sabbath.—Lucas 23:56.

Kinabuwasan, han Sabbath, an punoan nga mga saserdote ngan mga Pariseo kinadto kan Pilato ngan nagsiring: “Nahinumdom kami nga han buhi pa ito nga impostor nagsiring hiya, ‘Paglabay hin tulo ka adlaw babanhawon ako.’ Salit pabantayi hin maopay an lubnganan tubtob ha ikatulo ka adlaw, basi diri makakadto an iya mga disipulo pagkawat ha iya ngan magsumat ha mga tawo, ‘Ginbanhaw na hiya!’ ngan ini nga limbong magigin mas maraot pa kay ha nauna.” Hi Pilato binaton: “Kuha kamo hin mga gwardya ngan pabantayi ito hin maopay.”—Mateo 27:63-65.

Temprano pa han Domingo han aga, hira Maria Magdalena, Maria nga nanay ni Santiago, ngan an iba pa nga kababayin-an nagdara hin mga pahamot para gamiton ha lawas ni Jesus. Hira nag-iristorya: “Hin-o an aton pakukuhaon han bato tikang ha ganggang han lubnganan?” (Marcos 16:3) Pero nagkaada hin linog. Dugang pa, ginpakaliding han anghel han Dios an bato, waray na an mga gwardya, ngan waray na sulod an lubnganan!