Hi Jesus waray magnigar kan Pilato nga usa gud hiya nga hadi. Pero an iya Ginhadian diri tarhog ha Roma. Hiya nagsiring: ‘An akon Ginhadian diri dinhi hini nga kalibotan. Kon aanhi ha kalibotan an akon Ginhadian, makikig-away unta an akon mga sumurunod basi diri ako maitubyan ha mga Judio. Pero sugad han ginsiring ko, an akon Ginhadian diri dinhi hini nga kalibotan.’ (Juan 18:36) Oo, hi Jesus may Ginhadian, pero diri dinhi hini nga kalibotan.

Waray makontento hi Pilato. Hiya nagpakiana: “Kon sugad, hadi ka ba?” Basi ipakita nga husto an iya konklusyon, hi Jesus binaton: “Ikaw mismo an nasiring nga hadi ako. Tungod hini natawo ako, ngan tungod hini kinanhi ako ha kalibotan, basi magpamatuod han kamatuoran. An tagsa nga nadapig ha kamatuoran namamati ha akon tingog.”—Juan 18:37.

Diri pa la maiha, ginsidngan ni Jesus hi Tomas: “Ako an dalan ngan an kamatuoran ngan an kinabuhi.” Yana, hinbatian mismo ni Pilato nga ginpakanhi hi Jesus ha tuna basi magpamatuod han “kamatuoran,” labi na an kamatuoran mahitungod han iya Ginhadian. Determinado hi Jesus nga magin matinumanon hito nga kamatuoran bisan pa kon mamatay hiya tungod hito. Hi Pilato nagpakiana: “Ano an kamatuoran?” Pero waray na hiya maghulat hin dugang nga pagsaysay. Para ha iya, igo na an iya hinbatian basi hukman hi Jesus.—Juan 14:6; 18:38.

Binalik hi Pilato ha mga tawo nga naghuhulat ha gawas han palasyo. Posible nga sapit niya hi Jesus han ginsidngan niya an punoan nga mga saserdote ngan an ira mga kaupod: “Waray ako nakikita nga sayop hini nga tawo.” Nasina an mga tawo ha iya desisyon, salit nag-insister hira: “Nagigin hinungdan han kasamok an iya igintututdo ha mga tawo ha bug-os nga Judea, tikang pa ha Galilea tubtob dinhi.”—Lucas 23:4, 5.

Sigurado nga diri makatoo hi Pilato ha sobra nga pagkapanatiko han mga Judio. Samtang padayon nga nagsisininggit an punoan nga mga saserdote ngan katigurangan, ginpakianhan ni Pilato hi Jesus: “Diri ka ba nakakabati nga damu an igin-aakusar ha imo?” (Mateo 27:13) Pero waray bumaton hi Jesus. Nahipausa hi Pilato han iya pagin kalmado bisan pa han magraot nga akusasyon.

Nagsiring an mga Judio nga hi Jesus ‘tikang ha Galilea.’ Salit nasantop ni Pilato nga hi Jesus taga-Galilea. Naghatag ito ha iya hin ideya kon paonan-o malilikyan an responsabilidad ha paghukom kan Jesus. Hi Herodes Antipas (an anak ni Herodes nga Bantogan) nga amo an magmarando ha Galilea nakadto ha Jerusalem ha panahon han Paskua. Salit igintubyan ni Pilato hi Jesus kan Herodes nga nagpapugot kan Juan nga Parabaptis. Ha urhi, han hinbatian niya nga naghihimo hi Jesus hin mga milagro, nabaraka hiya nga bangin hi Jesus an ginbanhaw nga hi Juan.—Lucas 9:7-9.

Yana, nalipay hi Herodes nga makikita na niya hi Jesus. Diri tungod kay karuyag niya buligan hi Jesus o maghimo hin paagi basi hibaroan kon tinuod an mga akusasyon kan Jesus. Karuyag la niya mag-usyuso ngan “naglalaom hiya nga makakita hin milagro ni Jesus.” (Lucas 23:8) Pero, waray buhata ni Jesus an ginlalaoman ni Herodes. Ngani, han ginpakianhan hiya ni Herodes, waray hiya bumaton. Tungod han kasina ni Herodes ngan han mga sundalo, ira “gintamay” hi Jesus. (Lucas 23:11) Ginsul-utan hiya hin magarbo nga bado ngan ginhimo nga pataraw-an. Katapos, iginbalik hiya kan Pilato. Magkaaway hadto hira Herodes ngan Pilato, pero yana nagin maopay na hira nga magsangkay.

Pagbalik ni Jesus, iginpatawag ni Pilato an punoan nga mga saserdote, Judio nga mga opisyal, ngan mga tawo, ngan nagsiring: “Gin-imbistigar ko hiya ha iyo atubangan pero waray ako nakita nga basihan han iyo mga akusasyon ha iya. Ha pagkamatuod, hi Herodes waray liwat nakita ha iya nga sala kay iginbalik hiya ha aton, ngan waray hiya nabuhat nga angay hin kamatayon. Salit sisirotan ko hiya ngan bubuhian.”—Lucas 23:14-16.

Karuyag gud ni Pilato nga buhian hi Jesus kay nasantop niya nga naaawa an mga saserdote salit igintubyan ha iya hi Jesus. Samtang nangangalimbasog hi Pilato nga buhian hi Jesus, may nakaaghat pa ha iya nga buhaton ito. Han nalingkod hiya ha lingkoran ha paghukom, an iya asawa nagpadara hin mensahe: “Ayaw paglabot hiton matadong nga tawo, kay nag-inop ako hin makaharadlok [matin-aw nga tikang ha Dios] mahitungod ha iya yana nga adlaw.”—Mateo 27:19.

Paonan-o bubuhian ni Pilato inin inosente nga tawo, sugad han angay niya buhaton?