Kinabuwasan, han Domingo, Nisan 9, binaya hi Jesus ha Betania upod an iya mga disipulo ngan nagbiyahe hira ngadto ha Jerusalem. Han hirani na hira ha Betfage, ha Bukid han mga Olibo, ginsugo ni Jesus an duha han iya mga disipulo:

“Kadto kamo hito nga baryo nga iyo nakikita ha unhan, ngan makakakita dayon kamo hin nakahigot nga asno upod an nati hito. Badbari niyo ito ngan dad-a ha akon. Ngan kon may magpakiana, sidnga niyo nga ‘Kinahanglanon ini han Ginoo.’ Tungod hito, matugot dayon hiya nga dad-on niyo ito.”—Mateo 21:2, 3.

Waray masantop han mga disipulo nga an sugo ni Jesus may koneksyon ha tagna ha Biblia. Pero ha urhi, nasantop nira nga natuman an tagna ni Sakarias. Nagtagna hiya nga an iginsaad han Dios nga Hadi masulod ha Jerusalem nga “ubos, ngan masakay ha usa nga asno, bisan ha usa nga pulyino, an nati han usa nga asno.”—Sakarias 9:9.

Han inabot na an mga disipulo ha Betfage ngan ginkuha an lalaki nga nati nga asno ngan an iroy hito, an mga tawo nga natindog ha hirani nagpakiana: “Kay ano nga ginbabadbad niyo an higot han nati nga asno?” (Marcos 11:5) Pero han hinbatian nira nga an mga hayop para ha Ginoo, tinugot hira nga dad-on ito kan Jesus. Iginsapin han mga disipulo an ira pantungbaw nga panapton ha asno ngan ha nati hito, pero ha nati sinakay hi Jesus.

Nagtikadamu an tawo samtang hi Jesus nakasakay ha asno tipakadto ha Jerusalem. Iginlatag han damu an ira mga panapton ha dalan. An iba nangutod hin mga sanga han kahoy o “mga dahon han palma ha ligid han dalan” ngan iginlatag ito. Nagsinggit hira: “Nag-aampo kami, talwasa hiya! Bendisyonan unta hiya nga napakanhi ha ngaran ni Jehova! Bendisyonan unta an tiarabot nga Ginhadian han aton amay nga hi David!” (Marcos 11:8-10) Tungod hito, nasina an mga Pariseo nga nakadto. Ira ginsidngan hi Jesus: “Magturutdo, sidnga an imo mga disipulo nga diri mag-inaringasa.” Binaton hiya: “Susumatan ko kamo: Kon maghilom hira, mga bato an masinggit.”—Lucas 19:39, 40.

Han nakita ni Jesus an Jerusalem, nagtangis hiya ngan nagsiring: “Ginhingyap ko gud nga unta nasabtan mo ini nga mga butang nga maghahatag ha imo hin kamurayawan, pero yana diri ka makakakita hito.” Sisirotan an Jerusalem tungod han tinuyo nga pagtalapas. Hi Jesus nagtagna: “An imo mga kaaway magbubutang ha imo palibot hin magtais nga alad, papalibotan ngan aatakehon ka tikang ha ngatanan nga direksyon, bubungkagon ka nira ngan an imo mga anak, ngan waray usa nga bato nga papabay-an nira ha bawbaw han usa nga bato.” (Lucas 19:42-44) Sugad han igintagna ni Jesus, nabungkag an Jerusalem han tuig 70 C.E.

Pagsulod ni Jesus ha Jerusalem, “naukay an bug-os nga syudad. Nagpakianahay hira: ‘Hin-o ini?’” Ngan an mga tawo nagsiniring: “Hiya an propeta nga hi Jesus, nga taga-Nazaret ha Galilea!” (Mateo 21:10, 11) An iba ha ira nga nakakita han ginbanhaw ni Jesus hi Lasaro nagsumat ha iba mahitungod hito nga milagro. Nasubo an mga Pariseo kay waray gud hira nahimo. Hira nag-uruistorya: “Nasunod na ha iya an bug-os nga kalibotan.”—Juan 12:18, 19.

Sugad han nahiaraan ni Jesus kon nabisita ha Jerusalem, kinadto hiya ha templo basi magtutdo. Didto, iya gintambal an mga buta ngan baldado. Han nakita han punoan nga mga saserdote an iya ginbuhat ngan nabatian an kabataan ha templo nga nagsininggit hin, “Nag-aampo kami, talwasa an Anak ni David!” nasina hira. An mga lider han relihiyon nagpakiana kan Jesus: “Nababatian mo ba an ira ginsisiring?” Hiya binaton: “Waray ba niyo mabasa ini: ‘An baba han kabataan ngan mga minasus-an pagigiuson mo nga magdayaw ha imo’?”—Mateo 21:15, 16.

Ginkita ni Jesus an mga butang ha palibot han templo. Tungod kay gab-i na, binaya hiya upod an mga apostol. Antes mag-Nisan 10, binalik hiya ha Betania ngan didto hiya nagpalabay han Domingo han gab-i.