Waray pag-iha katapos tambalon ni Jesus an paralisado, nagpabilin hiya ha Capernaum nga hirani ha Dagat han Galilea. Dinaop na liwat ha iya an damu nga tawo ngan gintutdoan niya hira. Samtang naglalakat hiya nakita niya hi Mateo, nga gintatawag liwat nga Levi, nga nalingkod ha opisina para ha pagbuhis. Nagpahayag hi Jesus hin makaruruyag nga imbitasyon ha iya: “Kadi, sunod ha akon.”—Mateo 9:9.

Posible nga pamilyar na hi Mateo ha katutdoan ngan buruhaton nga ginhimo ni Jesus hito nga lugar, sugad han hinbabaroan nira Pedro, Andres, Santiago, ngan Juan. Pariho ha ira, sumunod dayon hi Mateo. Iginhulagway niya ini ha iya Ebanghelyo, ha pagsiring: “Binuhát dayon hi Mateo ngan inupod ha iya.” (Mateo 9:9) Salit ginbayaan ni Mateo an iya mga responsabilidad sugad nga parasukot hin buhis ngan nagin disipulo ni Jesus.

Ha urhi, nag-andam hi Mateo hin daku nga panagtawo ha iya balay, posible nga basi magpasalamat hinin makaruruyag nga imbitasyon ni Jesus. Hin-o an nakadto labot kan Jesus ngan han iya mga disipulo? Nakadto liwat an pipira han kaupod-upod ni Mateo hadto ngan an iba nga parasukot hin buhis. Nanunukot hira hin buhis para ha nasisinahan gud nga mga magmarando han Roma, upod hini an buhis ha mga barko nga naduong ha mga pantalan, ha mga naagi ha mga kalsada, ngan ha mga paraliton tikang ha iba nga nasud. Ano an pagtagad han kadam-an nga Judio hini nga mga parasukot hin buhis? Ginmiminos gud hira han mga tawo tungod kay agsob nga mas daku an ira ginsusukot kay han regular nga buhis. Nakadto liwat an mga “makasasala,” mga tawo nga kilala nga nagbubuhat hin maraot.—Lucas 7:37-39.

Pakaobserbar han nagpapakamatadong nga mga Pariseo nga hi Jesus nakikig-upod ha sugad nga mga tawo, nagpakiana hira ha iya mga disipulo: “Kay ano nga an iyo magturutdo nakikig-upod ha pangaon ha mga parasukot hin buhis ngan magpakasasala?” (Mateo 9:11) Pakabati ni Jesus ha ira, hiya binaton: “An mahimsog diri nanginginahanglan hin doktor, kondi an may sakit. Salit lakat kamo ngan sabota an kahulogan hini: ‘Karuyag ko an kalooy, diri an halad.’ Kay kinanhi ako, diri para ha magtadong, kondi para ha magpakasasala.” (Mateo 9:12, 13; Hosea 6:6) Diri sinsero an mga Pariseo ha pagtawag kan Jesus nga “magturutdo,” pero may mahibabaroan hira ha iya mahitungod ha kon ano an husto.

Posible gud nga gin-imbitar ni Mateo ha iya balay an mga parasukot hin buhis ngan magpakasasala basi makapamati hira kan Jesus ngan makakarawat hin espirituwal nga pagtambal, “kay damu ha ira an nagin sumurunod niya.” (Marcos 2:15) Karuyag ni Jesus nga buligan hira nga magkaada maopay nga relasyon ha Dios. Diri pariho ha nagpapakamatadong nga mga Pariseo, waray minosa ni Jesus an sugad nga mga tawo. Pumaid hiya ha ira ngan nalooy; mahimo hiya magin espirituwal nga doktor ha ngatanan nga may sakit ha espirituwal.

Nagpakita hi Jesus hin kalooy ha mga parasukot hin buhis ngan magpakasasala, diri basi konsinteron hira, kondi basi ipakita an pagbati nga pariho han iya iginpakita ha may sakit ha pisikal. Pananglitan, hinumdumi nga han mapinairon nga ginkaptan niya an tawo nga may liprosi, hiya nagsiring: “Karuyag ko nga matambal ka.” (Mateo 8:3) Diri ba sadang liwat naton kultibaron an sugad nga kalooy ngan buligan an mga nanginginahanglan, labi na ha espirituwal nga paagi?