Igin-ilustrar pa la ni Jesus an disposisyon nga kinahanglan kultibaron han iya mga sumurunod. Nagsiring hi Jesus nga, ‘an bisan hin-o nga nakarawat ha usa nga bata tungod han iya ngaran, nakarawat liwat ha iya.’ (Mateo 18:5) Sadang tagdon han mga disipulo an ira kalugaringon sugad nga kabataan, mapainubsanon ngan diri naghuhunahuna nga labaw hira.

Diri pa la maiha nga nagdiniskusyon an mga apostol kon hin-o ha ira an gilalabawi, salit bangin gintagad nira nga pagsaway an ginsiring ni Jesus. Hini nga takna, nag-unabi hi apostol Juan hin usa nga butang nga nahitabo pa la: “Nakakita kami hin tawo nga nagpapagawas hin mga demonyo pinaagi han imo ngaran, ngan gindid-an namon hiya kay diri naton hiya kaupod.”—Lucas 9:49.

Ginhunahuna ba ni Juan nga an mga apostol la an may katungod nga manambal o magpagawas hin mga demonyo? Kon oo, kay ano man nga ito nga tawo, nga usa nga Judio, nakakapagawas hin magraot nga espiritu? Baga hin para kan Juan, ito nga tawo diri angay maghimo hin mga milagro kay diri hiya kaupod ni Jesus ngan han mga apostol.

Nahipausa hi Juan han nagsiring hi Jesus: “Ayaw hiya pagdid-i, kay waray makakahimo hin gamhanan nga buhat pinaagi han akon ngaran nga makakagyakan dayon hin maraot mahitungod ha akon, kay an diri nakontra ha aton, nadapig ha aton. Bisan hin-o nga nahatag ha iyo hin usa ka baso nga irimnon nga tubig tungod kay disipulo kamo han Kristo, ha pagkamatuod susumatan ko kamo, diri gud hiya mawawad-an hin balos.”—Marcos 9:39-41.

Hito nga panahon, ito nga tawo diri kinahanglan mag-inupod ha Kristo basi magin dapig ha Iya. Waray pa maorganisar an Kristiano nga kongregasyon, salit bisan kon diri hiya nagbibiyahe kaupod ni Jesus, diri ito nagpapasabot nga nakontra hiya o nag-aaghat hin buwa nga relihiyon. Sigurado nga natoo hiya kan Jesus, ngan an ginsiring ni Jesus nagpapasabot nga diri hiya mawawad-an hin balos.

Ha luyo nga bahin, seryoso gud kon ito nga tawo mapakdol ha ginsiring ngan ginbuhat han mga apostol. Hi Jesus nagsiring: “An bisan hin-o nga nakakapakdol ha usa hini nga mga ubos nga may pagtoo, mas maopay pa nga higtan hiya ha liog hin daku nga gilingan nga bato pariho ha ginbibirik han asno ngan ilabog hiya ha dagat.” (Marcos 9:42) Katapos hi Jesus nagsiring nga sadang kuhaon han iya mga sumurunod bisan an mga butang nga sugad kapresyoso han kamot, tiil, o mata kon nakakapakdol ito ha ira. Mas maopay nga mawad-an han sugad kaimportante nga mga butang ngan makasulod ha Ginhadian han Dios kay ha tipigan ito ngan mahingadto ha Gehenna (Walog han Hinom). Posible nga nakikita han mga apostol ini nga walog hirani ha Jerusalem diin ginsusunog an mga basura, salit nasasabtan nira nga nagrirepresentar ito han permanente nga kabungkagan.

Nagpahamangno liwat hi Jesus: “Ayaw gud niyo pagtamaya an usa hini nga mga ubos, kay susumatan ko kamo nga an ira mga anghel ha langit pirme aadto ha atubangan han akon Amay.” Mationan-o kapresyoso ito nga “mga ubos” para ha iya Amay? Nag-istorya hi Jesus mahitungod hin tawo nga may 100 nga karnero pero nawara an usa. Ginbayaan han tawo an 99 basi pamilngon an usa nga nawara, ngan han nabilngan niya ito mas nalipay hiya hito kay han 99 nga karnero. Hi Jesus nagdugang: “Diri karuyag han akon Amay ha langit nga mawara an bisan usa la hini nga mga ubos.”—Mateo 18:10, 14.

Bangin ginhunahuna ni Jesus an pagdiskusyon han mga apostol kon hin-o ha ira an magigin gilalabawi, salit ginsagda niya hira: “Magkaada kamo asin ha iyo kalugaringon, ngan makigmurayaw kamo ha usa kag usa.” (Marcos 9:50) An asin mas nakakaparasa han pagkaon. An simboliko nga asin nabulig basi magin mas masayon karawaton an ginsisiring han usa salit natitipigan an kamurayawan, nga diri nahihimo han pagdiskusyon.—Colosas 4:6.

Usahay nabangon an seryoso nga mga problema, ngan nagsaysay hi Jesus kon paonan-o ito susulbaron. Hiya nagsiring: “Kon an imo bugto nakasala, kadtoa hiya ngan isaysay an iya sayop nga kamo la nga duha. Kon mamati hiya ha imo, nabuligan mo hiya nga buhaton an husto.” Kumusta man kon diri hiya mamati? Hi Jesus nagsagdon: “Pag-upod hin usa o duha pa, basi an ngatanan nga ginsiring mapamatud-an han duha o tulo nga testigo.” Kon diri hito masulbad an problema, makikiistorya hira “ha kongregasyon,” karuyag sidngon, ha responsable nga mga tigurang nga makakahimo hin desisyon. Kumusta man kon diri la gihapon mamati an nakasala? “Tagda hiya sugad nga tawo han mga nasud ngan sugad nga parasukot hin buhis,” mga tawo nga ginlilikyan han mga Judio.—Mateo 18:15-17.

Kinahanglan sundon han mga paramangno han kongregasyon an Pulong han Dios. Kon mapamatud-an nira nga salaan an usa ngan kinahanglan disiplinahon, an ira desisyon “gin-gapos na ha langit.” Pero kon mapamatud-an nira nga inosente hiya, “ginbadbaran na [ito] ha langit.” Makakabulig gud ini nga mga giya kon maorganisar na an Kristiano nga kongregasyon. Hiton seryoso nga paghisgot, hi Jesus nagsiring: “Kon may duha o tulo nga nagkakatirok ha akon ngaran, aada ako ha butnga nira.”—Mateo 18:18-20.