Ikatarapos na han tuig 32 C.E., mga tulo ka tuig tikang han ginbawtismohan hi Jesus. Diri pa la maiha, hiya ngan an iya mga disipulo kinadto ha Piyesta han mga Tabernakulo ha Jerusalem. Posible nga hirani pa hira hito nga lugar. (Lucas 10:38; Juan 11:1) Ngani, an kadak-an han nahibibilin nga unom ka bulan ni Jesus ha pagministeryo ginamit niya ha Judea o ha tabok han Salog Jordan ha distrito han Perea. Kinahanglan liwat sangyawan ini nga mga lugar.

Han naglabay, kahuman han Paskua han 30 C.E., pipira ka bulan nga nagsangyaw hi Jesus ha Judea ngan inagi ha Samaria. Katapos, han Paskua han 31 C.E., gin-ikaparatay hiya han mga Judio ha Jerusalem. Han sumunod nga usa ngan tunga ka tuig, nagpokus hi Jesus ha iya pagtutdo ha norte, ha Galilea. Hito nga panahon, damu an nagin iya mga sumurunod. Ha Galilea, iya ginbansay an iya mga apostol ngan gintagan hin instruksyon: “Pagsangyaw kamo: ‘An Ginhadian han langit hirani na.’” (Mateo 10:5-7) Yana gin-organisar niya an pagsangyaw ha Judea.

Basi tikangan ini nga pagsangyaw, nagpili hi Jesus hin 70 nga disipulo ngan ginsugo hira nga padis-padis. Salit, may-ada 35 ka padis nga magsarangyaw han Ginhadian ha teritoryo diin “damu an aranihon, kondi gutiay an mag-arani.” (Lucas 10:2) Mag-uuna hira pagkadto ha mga lugar nga bangin kadtoon ni Jesus. Mananambal hira hin mga may sakit ngan magpapasamwak han mensahe nga pariho han iginsasangyaw ni Jesus.

Ini nga mga disipulo diri magpupokus ha pagtutdo ha mga sinagoga. Ginsidngan hira ni Jesus nga kumadto ha balay han mga tawo. Ginsugo niya hira: “Bisan diin nga balay kamo sumulod, siring anay: ‘Hinaot magkaada kamurayawan ini nga balay.’ Ngan kon may mamurayawon nga tawo didto, an iyo kamurayawan magpapabilin ha iya.” Ano an ira mensahe? Hi Jesus nagsiring: “Sumati hira: ‘An Ginhadian han Dios hirani na ha iyo.’”—Lucas 10:5-9.

An mga instruksyon nga iginhatag ni Jesus ha 70 nga disipulo puropariho han iya iginhatag han ginsugo niya an 12 nga apostol mga usa ka tuig na an naglabay. Ginpahamangnoan niya hira nga may-ada diri makarawat ha ira. Pero an ira pangalimbasog mag-aandam ha mga makinarawaton para kon umabot na hi Jesus, damu an malilipay pagtapo ha Agaron ngan mahibaro tikang ha iya.

Waray pag-iha, an 35 ka padis nga magsarangyaw han Ginhadian binalik kan Jesus. Malipayon hira nga nagsumat ha iya: “Ginoo, bisan an mga demonyo nasugot ha amon pinaagi ha paggamit namon han imo ngaran.” Ini nga maopay nga sumat sigurado nga nakapalipay kan Jesus, kay hiya nagsiring: “Nakita ko hi Satanas nga nahulog na sugad hin kidlat tikang ha langit. Kitaa! gintagan ko kamo hin awtoridad ha pagtamak ha mga halas ngan mga iskorpyon.”—Lucas 10:17-19.

Salit ginpasarig ni Jesus an iya mga sumurunod nga madadaog nira an nakakadaot nga mga butang, simboliko nga tatamakan nira an mga halas ngan mga iskorpyon. Makakasiguro liwat hira nga ha tidaraon ilalabog hi Satanas tikang ha langit. Ginbuligan liwat ni Jesus an 70 nga masabtan kon ano gud an importante ha kamaihaan. Hiya nagsiring: “Ayaw kamo pagkalipay tungod kay nasugot ha iyo an magraot nga espiritu, lugod magkalipay kamo kay an iyo mga ngaran nahisurat na ha langit.”—Lucas 10:20.

Nalipay gud hi Jesus ngan dayag nga gindayaw an iya Amay tungod ha paggamit han iya mapainubsanon nga mga surugoon ha sugad nga gamhanan nga paagi. Katapos iya ginsidngan an iya mga disipulo: “Malipayon an mga mata nga nakakakita han iyo nakikita. Susumatan ko kamo: Damu nga propeta ngan mga hadi an naghingyap nga makit-an an iyo nakikita kondi waray nira makita, ngan naghingyap nga mabatian an iyo nababatian kondi waray nira mabatii ito.”—Lucas 10:23, 24.