Ha ikapito ka adlaw, an ultimo nga adlaw han Piyesta han mga Tabernakulo, hi Jesus nagtutdo ha templo didto ha “lugar han burutangan han bahandi.” (Juan 8:20; Lucas 21:1) Posible nga aadto ito ha Bungsaran han Kababayin-an, diin iginhuhulog han mga tawo an ira donasyon.

Ha gab-i durante han piyesta, ini nga bahin han templo may espesyal nga suga. May-ada didto upat nga dagku nga burutangan hin lampara, an tagsa hito may upat nga dagku nga surudlan nga puno hin lana. Malamrag gud ini nga mga lampara salit haluag an nahahayagan hini. Bangin nahinumdoman ini han mga mamarati ni Jesus han hiya nagsiring: “Ako an kalamrag han kalibotan. An nasunod ha akon diri gud maglalakat ha kasisidman, kondi magkakaada kalamrag han kinabuhi.”—Juan 8:12.

Kinontra an mga Pariseo ha ginsiring ni Jesus ngan nangatadongan: “Nagpapamatuod ka mahitungod ha imo kalugaringon; buwa an imo pamatuod.” Hi Jesus binaton: “Bisan kon ako an nagpapamatuod mahitungod ha akon kalugaringon, totoo an akon pamatuod, kay maaram ako kon diin ako tikang ngan kon makain ako. Pero diri kamo maaram kon diin ako tikang ngan kon makain ako.” Hiya nagdugang: ‘Nakasurat ha iyo Balaud nga “An pamatuod han duha nga tawo kamatuoran.” Nagpapamatuod ako mahitungod ha akon kalugaringon, ngan an Amay nga nagsugo ha akon nagpapamatuod liwat mahitungod ha akon.’—Juan 8:13-18.

Waray karawata han mga Pariseo an iya pangatadongan, salit nagpakiana hira: “Hain an imo Amay?” Hi Jesus prangka nga binaton: “Diri kamo nakilala ha akon ngan ha akon Amay. Kon kilala niyo ako, kilala liwat unta niyo an akon Amay.” (Juan 8:19) Bisan kon karuyag pa gihapon han mga Pariseo nga arestuhon hi Jesus, waray nag-aresto ha iya.

Gin-utro ni Jesus an iya ginsiring: “Mabaya ako, ngan bibilngon ako niyo. Pero mamamatay kamo ha iyo sala. Diri kamo makakakadto ha akon kakadtoan.” Sayop gud an pagsabot han mga Judio ha ginsiring ni Jesus salit naghunahuna hira: “Mag-uunay ba hiya? Kay nasiring hiya, ‘Diri kamo makakakadto ha akon kakadtoan.’” Waray nira masabti an karuyag sidngon ni Jesus kay diri hira maaram kon diin hiya tikang. Hiya nagsaysay: “Kamo tikang ha ilarom; ako tikang ha igbaw. Kamo tikang hini nga kalibotan; ako diri tikang hini nga kalibotan.”—Juan 8:21-23.

Gin-uunabi ni Jesus an iya pag-eksister ha langit antes hiya magin tawo ngan an iya pagin an iginsaad nga Mesias, o Kristo, nga sadang unta pamulaton hini nga mga lider han relihiyon. Bisan pa hito, nakakatamay gud nga nagpakiana hira: “Hin-o ka?”—Juan 8:25.

Han ginsalikway ngan ginkontra hi Jesus han mga tawo, hiya nagsiring: “Kay ano nga nakikiistorya pa ako ha iyo?” Bisan pa hito, iginpokus la gihapon niya an ira atensyon ha iya Amay ngan iginsaysay kon kay ano nga sadang mamati an mga Judio ha Anak: “An nagsugo ha akon pirme nagyayakan han kamatuoran, ngan an akon nabatian ha iya iginsusumat ko ha kalibotan.”—Juan 8:25, 26.

Katapos nagpahayag hi Jesus hin pagsarig ha iya Amay, nga waray ha mga Judio: “Kon bitayon na niyo an Anak han tawo, makakasabot kamo nga ako amo hiya. Diri ako nagbubuhat han akon la karuyag, kondi an igintutdo ha akon han Amay amo an akon ginyayakan. An nagsugo ha akon kaupod ko; waray niya ako pabay-i nga nag-uusahan, kay ginbubuhat ko pirme an nakakalipay ha iya.”—Juan 8:28, 29.

Pero an iba nga Judio natoo kan Jesus, salit ginsidngan niya hira: “Kon pirme niyo ginbubuhat an akon ginsisiring, mga disipulo ko gud kamo, ngan mahibabaro kamo han kamatuoran, ngan an kamatuoran maghahatag ha iyo hin kagawasan.”—Juan 8:31, 32.

Para ha iba, ini nga iginsaysay mahitungod ha kagawasan baga hin diri katoohan. Kinontra hira: “Katulinan kami ni Abraham ngan waray pa kami magin uripon han bisan hin-o. Kay ano nga nasiring ka, ‘Magkakaada kamo kagawasan’?” Maaram an mga Judio nga may panahon nga ginsakop hira han iba nga nasud, pero nadiri hira nga tawagon nga mga uripon. Kondi, ginpabug-atan ni Jesus nga mga uripon la gihapon hira: “Ha pagkamatuod susumatan ko kamo, An nagbubuhat hin sala uripon han sala.”—Juan 8:33, 34.

An diri pagkarawat han mga Judio nga mga uripon hira han sala peligroso gud. Hi Jesus nagsaysay: “An uripon diri padayon nga naukoy ha balay han agaron; pero an anak padayon nga naukoy.” (Juan 8:35) An uripon waray katungod ha panurundon ngan ha anoman nga oras, puydi hiya paiwason. An anak la o ampon an “padayon” nga maukoy ha balay samtang buhi hiya.

Salit, an kamatuoran mahitungod ha Anak amo an kamatuoran nga naghahatag ha mga tawo hin permanente nga kagawasan tikang ha sala nga nagriresulta hin kamatayon. Hi Jesus nagsiring: “Kon an Anak maghatag ha iyo hin kagawasan, magkakaada gud kamo kagawasan.”—Juan 8:36.