Gin-utro pa la ni Jesus an iya mga instruksyon mahitungod ha pag-ampo, pero diri la ito an topiko nga binangon utro durante han iya ministeryo. Han naghimo hiya hin mga milagro ha Galilea, gin-akusaran hiya nga ginbubuhat niya ito pinaagi ha gahum han magmarando han mga demonyo. Yana ha Judea, binangon utro ini nga akusasyon.

Han ginpagawas ni Jesus an demonyo nga nakakapangula ha lalaki, nahipausa hito an mga tawo. Pero diri sugad hito an inabat han iya mga kritiko. Iginbangon nira an pariho nga akusasyon: “Nagpapagawas hiya hin mga demonyo pinaagi kan Beelsebub, an magmarando han mga demonyo.” (Lucas 11:15) An iba namimiling hin dugang nga ebidensya kon hin-o gud hiya, nangaro hira hin tigaman tikang ha langit.

Maaram hi Jesus nga ginsasarihan nira hiya, salit binaton hiya pariho han iya iginbaton ha mga kritiko didto ha Galilea. Nagsiring hiya nga an tagsa nga ginhadian nga nababahin mabubungkag, ngan nangatadongan hiya: “Kon hi Satanas mismo nababahin, paonan-o matindog an iya ginhadian?” Katapos prangka nga nagsiring hi Jesus: “Kon nagpapagawas ako hin mga demonyo pinaagi han tudlo han Dios, waray kamo mahibaro nga an Ginhadian han Dios inabot na.”—Lucas 11:18-20.

An pag-unabi ni Jesus han “tudlo han Dios” nagpahinumdom unta ha iya mga mamarati mahitungod han nahitabo hadto ha Israel. An mga nakadto ha palasyo ni Paraon nga nakakita ha milagro ni Moises nan-gugliat: “Amo ini an tudlo han Dios”! An “tudlo han Dios” liwat an nagsurat han Napulo nga Sugo ha mga papan nga bato. (Eksodo 8:19; 31:18) Ha pariho nga paagi, an “tudlo han Dios”—an iya baraan nga espiritu, o aktibo nga pwersa—an hinungdan nga nakakapagawas hi Jesus hin mga demonyo ngan nakakatambal ha mga may sakit. Salit, waray hibaroi hini nga mga parakontra nga an Ginhadian han Dios inabot na tungod kay an pinili nga Hadi han Ginhadian, hi Jesus, nakada mismo kaupod nira ngan naghihimo hin mga milagro.

An abilidad ni Jesus ha pagpagawas hin mga demonyo ebidensya nga mas gamhanan hiya kay ha kan Satanas, pariho hin mas makusog nga tawo nga inabot ngan nagpirde ha armado nga tawo nga nagbabantay ha palasyo. Gin-utro liwat ni Jesus an ilustrasyon mahitungod ha maraot nga espiritu nga ginawas ha tawo. Kon waray pun-i han tawo hin mag-opay nga butang an ginbayaan han espiritu, ito nga espiritu mabalik ha iya upod an pito pa, salit magigin mas maraot an iya kahimtang kay han siyahan. (Mateo 12:22, 25-29, 43-45) Sugad hito an sitwasyon han nasud han Israel.

An usa nga babaye nga namamati kan Jesus ginuliat: “Malipayon an babaye nga nanganak ngan nagpasuso ha imo!” Naghihingyap an Judio nga kababayin-an nga magin nanay hin propeta, labi na han Mesias. Salit bangin ginhunahuna hini nga babaye nga malipayon gud hi Maria kay hiya an nanay han sugad nga magturutdo. Pero gintadong ni Jesus an panhunahuna han babaye mahitungod han tinuod nga gintitikangan han kalipay: “Diri, lugod, Malipayon an mga namamati han pulong han Dios ngan nagbubuhat hito!” (Lucas 11:27, 28) Waray gud magsiring hi Jesus nga sadang tagan hin espesyal nga pagpasidungog hi Maria. Lugod, an bisan hin-o nga lalaki o babaye magigin tinuod nga malipayon pinaagi ha pagin matinumanon nga surugoon han Dios, diri pinaagi han bisan ano nga relasyon o kalamposan.

Sugad han ginbuhat ni Jesus ha Galilea, ginsaway niya an mga nangangaro hin tigaman tikang ha langit. Nagsiring hiya nga waray tigaman nga ihahatag ha ira labot la han “tigaman ni Jonas.” Nagin tigaman hi Jonas pinaagi han iya kahingadto ha tiyan han isda hin tulo ka adlaw ngan han iya waray kahadlok nga pagsangyaw, nga nagpagios ha mga taga-Ninibe nga magbasol. Hi Jesus nagsiring: “Kondi kitaa, labaw pa kan Jonas an aanhi!” (Lucas 11:29-32) Hi Jesus liwat labaw pa kan Solomon nga gindayo han rayna han Sheba basi makapamati han iya kinaadman.

Hi Jesus nagdugang: “Kon may tawo nga nagdadagkot hin lampara, diri niya ito iginbubutang ha tago nga lugar o diri ito gintatakloban hin taraksan nga basket, kondi iginbubutang ito ha burutangan han lampara.” (Lucas 11:33) Bangin karuyag niya sidngon nga an pagtutdo ngan paghimo hin mga milagro ha atubangan hini nga mga tawo pariho ha pagtago ha kahayag han lampara. Tungod kay an ira mga mata diri nakapokus, nabalewaray nira an katuyoan han iya mga milagro.

Nagpagawas pa la hi Jesus hin demonyo ngan nagtambal hin ngula. Nagpagios unta ito ha mga tawo nga dayawon an Dios ngan isumat ha iba an mga ginbubuhat ni Jehova. Salit ginpahamangnoan ni Jesus an iya mga kritiko: “Pagbantay nga an kalamrag nga aada ha imo diri kasisidman. Salit kon malamrag an imo bug-os nga lawas ngan waray gud masirom nga bahin hito, magigin sugad ito kalamrag han lampara nga naglalawag ha imo.”—Lucas 11:35, 36.