1, 2. Ano an posible nga ginlalaoman ni Pedro samtang nagtututdo hi Jesus ha Capernaum, kondi ano an nahitabo?

NABABARAKA nga ginkikinita ni Pedro an nawong han mga mamarati ni Jesus. Hito nga takna, nakada hira ha sinagoga ha Capernaum. Dida hito nga lugar naukoy hi Pedro; aada dida an iya negosyo nga pangisda, ha norte nga baybayon han Dagat han Galilea; damu han iya kasangkayan, paryente, ngan kasosyo an naukoy liwat dida hito nga lugar. Posible nga naglalaom hi Pedro nga kikilal-on liwat han iya mga kahimungto hi Jesus sugad nga Mesias ngan malilipay hira ha paghibaro mahitungod han Ginhadian han Dios tikang ha pinakabantogan nga magturutdo. Kondi iba an nahitabo.

² Damu an umundang pamati kan Jesus. An iba waray umuyon ha iya ginsiring. Kondi, mas nabaraka hi Pedro ha reaksyon han pipira nga disipulo ni Jesus. Diri na hira nalilipay ha bag-o nga mga kamatuoran nga igintutdo ni Jesus. Yana, baga hin nasisina hira, ngan napupungot pa ngani. An iba nagsiring nga makangingirhat an iya mensahe. Tungod kay nadiri na pamati, binaya hira ha sinagoga ngan waray na sumunod ha iya.—Basaha an Juan 6:60, 66.

3. Paonan-o nakabulig kan Pedro an iya pagtoo?

³ Makuri ito nga takna para kan Pedro ngan ha iya mga igkasi-apostol. Waray niya bug-os nga masabti an ginsiring ni Jesus hito nga adlaw. Maaram hiya nga kon sasabton ito hin literal, makangingirhat gud ito. Ano an bubuhaton ni Pedro? Diri ito an siyahan nga higayon nga nasarihan an iya pagkamaunungon ha iya Agaron, ngan diri liwat ito an ultimo. Aton usisahon kon paonan-o an pagtoo ni Pedro nakabulig ha iya nga magpabilin nga maunungon bisan pa hito nga mga pagsari.

4, 5. Ano an mga ginbuhat ni Jesus nga waray laumi han mga tawo?

⁴ Hi Pedro agsob mahipausa kan Jesus. Usahay, an ginbubuhat ngan ginyayakan han iya Agaron diri amo an ginlalaoman han mga tawo. Han naglabay pa la nga adlaw, milagroso nga ginpakaon ni Jesus an yinukot nga katawohan, salit nangalimbasog hira nga himoon  hiya nga hadi. Kondi, nahipausa an damu han nagpahirayo hiya ngan ginsugo an iya mga disipulo nga sumakay ha baluto ngan kumadto ha Capernaum. Pagkagab-i, samtang naglalayag an mga disipulo, nahipausa liwat hira han naglakat hi Jesus ha mabalud nga Dagat han Galilea, nga nagtutdo kan Pedro hin importante nga leksyon mahitungod ha pagtoo.

⁵ Pagkaaga, hinbaroan nira nga an mga tawo sinakay liwat hin baluto ngan ginbiling hira. Kondi matin-aw nga ginbuhat nira ito diri tungod kay karuyag nira mahibaro han kamatuoran, kondi karuyag la nira nga magpakaon utro hi Jesus ha ira ha milagroso nga paagi. Ginsaway hira ni Jesus tungod han ira materyalistiko nga panhunahuna. (Juan 6:25-27) Ito nga paghisgot nagpadayon ha sinagoga ha Capernaum, diin nagtutdo hi Jesus hin importante nga kamatuoran nga makangingirhat para ha mga tawo.

6. Ano nga ilustrasyon an gin-gamit ni Jesus, ngan ano an reaksyon han iya mamarati?

⁶ Karuyag ni Jesus nga kilal-on hiya han mga tawo, diri sugad nga gintitikangan han literal nga pagkaon, kondi sugad nga espirituwal nga tagana han Dios. Pinaagi han iya kinabuhi ngan kamatayon, an katawohan posible makakarawat hin kinabuhi nga waray kataposan. Salit naghatag hiya hin ilustrasyon diin iginpariho niya an iya kalugaringon ha mana, an tinapay nga tikang ha langit ha panahon ni Moises. Han riniwa an iba, ginamit hiya hin ilustrasyon nga nagpapakita nga importante an pagkaon ha iya unod ngan pag-inom ha iya dugo basi magkaada kinabuhi. Dinhi hini nga takna nasina hinduro an mga tawo. An iba nagsiring: “Makangingirhat ini nga mga pulong. Hin-o an makakailob pagpinamati hini?” Damu han disipulo ni Jesus an inundang pagsunod ha iya. *—Juan 6:48-60, 66.

7, 8. (a) Ano an diri pa nasasabtan ni Pedro mahitungod ha papel ni Jesus? (b) Ano an baton ni Pedro ha pakiana ni Jesus ha mga apostol?

⁷ Ano an bubuhaton ni Pedro? Sigurado nga nawurok liwat hiya ha ginsiring ni Jesus. Waray pa niya hisabti nga kinahanglan mamatay hi Jesus basi matuman an kaburut-on han Dios. Kondi naaghat ba liwat hiya nga umundang ha pagsunod kan Jesus pariho ha iba nga disipulo? Waray; iba hi Pedro ha ira. Kay ano?

⁸ Hi Jesus nagpakiana ha iya mga apostol: “Karuyag ba liwat niyo bumaya?” (Juan 6:67) An 12 nga apostol an iya ginpakianhan, kondi hi Pedro an binaton sugad han agsob mahitabo. Posible nga hi Pedro an pinakamagurang ha ira. Tinuod man ito o diri, hiya an pinakaprangka; kasagaran nga diri hiya nag-aalang pagyakan kon ano an iya ginhuhunahuna. Hini nga takna, inin makaruruyag ngan makatirigamnan nga mga pulong an iya ginhuhunahuna: “Ginoo, hin-o pa  man an amon kakadtoan? Ikaw an may mga pulong han kinabuhi nga waray kataposan.”—Juan 6:68.

9. Paonan-o iginpakita ni Pedro an iya pagkamaunungon kan Jesus?

⁹ Diri ba makapabantad an iya ginsiring? An pagtoo ni Pedro kan Jesus nakabulig ha iya nga makultibar an importante gud nga kalidad—an pagkamaunungon. Matin-aw nga nasantop niya nga hi Jesus la an Manluluwas nga igintagana ni Jehova, ngan hi Jesus nagtalwas pinaagi ha iya pulong—an iya mga katutdoan mahitungod ha Ginhadian han Dios. Maaram hi Pedro nga bisan kon may mga nakawurok ha iya, waray hiya iba nga makakadtoan basi makarawat an pag-uyon han Dios ngan an bendisyon nga kinabuhi nga waray kataposan.

10. Paonan-o naton masusubad an pagkamaunungon ni Pedro?

¹⁰ Ito ba liwat an imo inaabat? Makasurubo, damu yana an nag-aangkon nga nahigugma kan Jesus kondi diri maunungon ha iya. Maipapakita naton an pagkamaunungon kan Kristo pinaagi ha paghigugma ha Iya katutdoan, pariho han ginbuhat ni Pedro. Kinahanglan naton ito hibaroan ngan hisabtan, ngan magkinabuhi uyon hito—bisan kon naiiba ito ha aton ginlalaoman o karuyag. Makakarawat la naton an kinabuhi nga waray kataposan nga karuyag ni Jesus para ha aton kon magigin maunungon kita.—Basaha an Salmo 97:10.

11. Diin igin-upod ni Jesus an iya mga sumurunod? (Kitaa liwat an footnote.)

¹¹ Waray pag-iha katapos hito nga panhitabo, gin-upod ni Jesus an iya mga apostol ngan pipira nga disipulo ha hirayo nga paglakaton tipanorte. An napuputos hin yelo nga pungkay han Bukid Hermon, nga nahimumutang ha norte nga giutan han Tuna nga Iginsaad, usahay nakikita tikang ha asul nga katubigan ha Dagat han Galilea. Samtang nagtitikahirani hira hito nga bukid ngan nasagka ha mga baryo hirani ha Cesarea Filipos, nagtitikahitaas ito pagkit-on. * Dida hinin makaruruyag nga dapit, diin nakikita an kadak-an han sur nga bahin han Tuna nga Iginsaad, nagbangon hi Jesus hin importante nga pakiana ha iya mga sumurunod.

12, 13. (a) Kay ano nga nagpakiana hi Jesus ha mga tawo kon hin-o hiya? (b) Ha iya baton kan Jesus, paonan-o nagpakita hi Pedro hin tinuod nga pagtoo?

¹² “Hin-o ako sumala ha mga tawo?” an pakiana ni Jesus. Mahahanduraw naton hi Pedro nga nagkikinita ha mga mata ni Jesus, nakikita na liwat niya an pagkabuotan ngan an hilarom nga kahibaro han iya Agaron. Karuyag ni Jesus hibaroan kon hin-o hiya para ha mga tawo. Binaton an iya mga disipulo pinaagi ha pagsumat han pipira nga sayop nga ideya han mga tawo kon hin-o hiya. Kondi ito ba  liwat an ginhuhunahuna han iya duok nga mga sumurunod mahitungod ha iya? Karuyag niya mahibaroan salit nagpakiana hiya: “Kondi para ha iyo, hin-o ako?”—Luc. 9:18-20.

¹³ Makausa pa, hi Pedro binaton dayon. Iya iginpahayag hin matin-aw an aada ha kasingkasing han damu nga nakadto: “Ikaw an Kristo, an Anak han buhi nga Dios.” Mahahanduraw naton hi Jesus nga nalipay ha baton ni Pedro ngan sinsero nga ginkumendasyonan hiya. Ginpahinumdom ni Jesus hi Pedro nga hi Jehova nga Dios—diri an bisan hin-o nga tawo—an nagpahayag hinin importante nga kamatuoran hadton may tinuod nga pagtoo. Salit, nasabtan ni Pedro an usa han pinakaimportante nga kamatuoran nga iginpahayag ni Jehova—kon hin-o an maiha na nga iginsaad nga Mesias, o Kristo!—Basaha an Mateo 16:16, 17.

14. Ano nga mga responsabilidad an iginhatag ni Jesus kan Pedro?

¹⁴ Ini nga Kristo amo an igintagna nga bato nga isasalikway han mga magturukod. (Sal. 118:22; Luc. 20:17) Ini nga mga tagna an gintutudlok ni Jesus han iginpahayag niya nga hi Jehova mag-iestablisar hin kongregasyon dida mismo hito nga bato, an usa nga ginkilala pa la ni Pedro sugad nga Kristo. Katapos, iya igintapod kan Pedro an pipira nga importante hinduro nga responsabilidad dida hito nga kongregasyon. Waray niya himoa hi Pedro nga labaw kay ha iba nga apostol, sugad han gintotoohan han iba, kondi gintagan niya hi Pedro hin mga responsabilidad. Iya iginhatag kan Pedro “an mga yawi han Ginhadian.” (Mat. 16:19) Responsabilidad ni Pedro an pag-abri han paglaom nga makasulod ha Ginhadian han Dios an tulo nga klase hin tawo—siyahan an mga Judio, sunod an mga Samaritano, ngan an kataposan an mga Hentil, o diri Judio.

15. Kay ano nga ginsaway ni Pedro hi Jesus, ngan ano an ginsiring ni Pedro?

¹⁵ Ha urhi, hi Jesus nagsiring nga adton gintagan hin damu, aaroan man hin damu, ngan nagin totoo ito ha kahimtang ni Pedro. (Luc. 12:48) Nagpadayon hi Jesus ha pagpahayag hin importante nga mga kamatuoran mahitungod han Mesias, upod na an iya tiarabot nga pag-antos ngan kamatayon ha Jerusalem. Nabaraka hi Pedro pakabati hito. Iya gindara hi Jesus ha ligid ngan ginsaway: “Ayaw pagyakan hin sugad hito, Ginoo; diri gud ito mahitatabo ha imo.”—Mat. 16:21, 22.

16. Paonan-o ginsaway ni Jesus hi Pedro, ngan ano an aton mahibabaroan tikang ha ginsiring ni Jesus?

¹⁶ Maopay an motibo ni Pedro, salit sigurado nga nahipausa hiya  ha baton ni Jesus. Tinalikod hi Jesus ha iya, ginkita an iba nga disipulo—nga posible nga naghuhunahuna hin pariho—ngan siniring: “Ayaw ako pag-ulanga, Satanas! Hiparakdolan ka ha akon, kay imo gintatagad an panhunahuna han mga tawo, diri an panhunahuna han Dios.” (Mat. 16:23; Mar. 8:32, 33) May mahibabaroan kita nga leksyon ha ginsiring ni Jesus. Masayon la para ha aton nga tagdon nga mas importante an panhunahuna han tawo kay ha panhunahuna han Dios. Kon tugotan naton ito, bisan kon pagbulig an aton motibo, bangin diri tinuyo nga ginsusuportahan na naton an katuyoan ni Satanas imbes nga an kanan Dios. Kondi ano an reaksyon ni Pedro?

17. Ano an karuyag sidngon ni Jesus han ginsidngan niya hi Pedro nga kumadto ha iya luyo?

¹⁷ Sigurado nga maaram hi Pedro nga diri literal an pagtawag ni Jesus ha iya nga Satanas. Ngani, an ginsiring ni Jesus kan Satanas diri pariho ha iya ginsiring kan Pedro. Kan Satanas hiya nagsiring: “Iwas”; kan Pedro, ginamit hiya hin mga pulong nga ha orihinal nga yinaknan mahimo ihubad nga “Pakadto ha akon luyo.” (Mat. 4:10) Hi Jesus may nakita nga mag-opay nga kalidad kan Pedro. Ngani, waray niya isalikway hi Pedro kondi gintadong la an iya sayop nga panhunahuna. Matin-aw nga hi Pedro kinahanglan umiwas ha atubangan han iya Agaron sugad nga hiparakdolan ngan bumalhin ha luyo sugad nga sumurunod nga nasuporta ha iya.

18. Paonan-o nagpakita hi Pedro hin pagkamaunungon, ngan paonan-o naton hiya masusubad?

¹⁸ Nakiglantugi ba hi Pedro, nasina, o nabido? Waray; mapainubsanon nga ginkarawat niya an pagsaway. Salit makausa pa, nagpakita hiya hin pagkamaunungon. An ngatanan nga sumurunod ni Kristo usahay nagkikinahanglan hin pagsaway. Magigin mas duok la kita kan Jesu-Kristo ngan ha iya Amay, hi Jehova nga Dios, kon mapainubsanon nga karawaton naton an disiplina ngan mahibaro tikang hito.—Basaha an Proberbios 4:13.

19. Ano an urusahon nga ginsiring ni Jesus, ngan ano an bangin ginhunahuna ni Pedro?

¹⁹ Waray pag-iha may-ada na liwat urusahon nga ginyakan hi Jesus: “Ha pagkamatuod, susumatan ko kamo nga an iba nga naninindog dinhi diri mamamatay tubtob nga makita anay nira an Anak han  tawo nga naabot ha iya Ginhadian.” (Mat. 16:28) Ito nga mga pulong sigurado nga nakainteres gud kan Pedro. Ano daw la an karuyag sidngon ni Jesus? Bangin naghunahuna hi Pedro nga diri hiya makakakarawat hin sugad nga espesyal nga pribilehiyo tungod kay ginsaway pa la hiya ni Jesus.

20, 21. (a) Ihulagway an bisyon nga nakita ni Pedro. (b) Paonan-o an pakig-istorya kan Jesus han duha nga lalaki ha bisyon nakabulig kan Pedro nga matadong an iya sayop nga panhunahuna?

²⁰ Kondi paglabay hin haros usa ka semana, igin-upod ni Jesus hira Santiago, Juan, ngan Pedro ngadto ha “hitaas nga bukid”—bangin ha Bukid Hermon, nga pipira la ka kilometro an kahirayo. Posible nga gab-i adto kay ginpipiraw an tulo nga kalalakin-an. Kondi samtang nag-aampo hi Jesus, may nakita hira nga nakawara han ira kapiraw.—Mat. 17:1; Luc. 9:28, 29, 32.

²¹ Nagbag-o an dagway ni Jesus. Naglamrag an iya nawong tubtob nga nagin masilaw ito sugad han adlaw. An iya bado nagsanag  liwat ha kabusag. Katapos may nakita nga duha nga lalaki ha sapit ni Jesus, nga nagrirepresentar kanda Moises ngan Elias. Iton duha nga lalaki nakig-istorya ha iya mahitungod han “iya pagbaya, nga itinanda nga iya tutumanon ha Jerusalem”—nga nagtutudlok han iya kamatayon ngan pagkabanhaw. Sigurado nga nasantop ni Pedro nga sayop gud hiya ha paghunahuna nga diri mag-aantos ngan mamamatay hi Jesus!—Luc. 9:30, 31.

22, 23. (a) Paonan-o hi Pedro nagpakita hin kadasig ngan pagkabuotan? (b) Ano an dugang nga balos nga nakarawat nira Pedro, Santiago, ngan Juan hito nga gab-i?

²² Karuyag ni Pedro nga magin bahin hinin talagsahon nga bisyon, salit han baga hin tibaya na hira Moises ngan Elias, hiya nagsiring: “Magturutdo, maopay kay nakaupod kami nganhi, salit magtitindog kami hin tulo nga tolda, usa para ha imo, usa para kan Moises, ngan usa para kan Elias.” Syempre, diri hira nagkikinahanglan hin tolda kay nagrirepresentar la hira ha duha nga maiha na nga patay nga surugoon han Dios. Waray gud hunahunaa hin maopay ni Pedro an iya ginyakan. Bisan pa hito, diri mo ba naaapresyar an iya kadasig ngan pagkabuotan?—Luc. 9:33.

²³ Hito nga gab-i, nakakarawat hin dugang nga balos hira Pedro, Santiago, ngan Juan. May dampog nga naporma ngan naglandong ha ira ha bukid. Tikang hito nga dampog nakabati hira hin tingog—an tingog ni Jehova nga Dios! Hiya nagsiring: “Ini an akon Anak nga akon pinili. Pamati kamo ha iya.” Dida hito natapos an bisyon, ngan hira na la an nakadto ha bukid upod ni Jesus.—Luc. 9:34-36.

24. (a) Paonan-o nagpahimulos hi Pedro ha bisyon han transpigurasyon? (b) Paonan-o kita mabubuligan han bisyon han transpigurasyon?

²⁴ Bendisyon gud ito nga transpigurasyon kan Pedro—ngan ha aton yana! Paglabay hin mga dekada, nagsurat hiya mahitungod han iya pribilehiyo hito nga gab-i nga patiuna nga makita hi Jesus sugad nga mahimayaon nga Hadi ha langit ngan magin usa han “mga testigo nga nakakita han iya pagkaharangdon.” Ito nga bisyon nagparig-on han damu nga tagna ha Pulong han Dios ngan han pagtoo ni Pedro basi malamposan an mga pagsari nga iya aatubangon. (Basaha an 2 Pedro 1:16-19.) Mapaparig-on liwat kita hito kon pariho kan Pedro, magpapabilin kita nga maunungon ha Agaron nga ginpili ni Jehova, mahibaro tikang ha iya, kumarawat han iya disiplina ngan pagtadong, ngan mapainubsanon nga sumunod ha iya kada adlaw.