1, 2. Ano an kahimtang han ginkaistorya ni Samuel an mga Israelita, ngan kay ano nga kinahanglan niya hira maaghat nga magbasol?

GINKINITA ni Samuel an iya mga kahimungto. Nagkatirok hira ha bungto han Gilgal tungod kay ginpakadto hira hinin matinumanon nga tawo nga nag-aalagad sugad nga propeta ngan hukom hin mga dekada na. Mga Mayo o Hunyo adto ha aton kalendaryo yana, ngan nagtikang na an katpaso. Hinog na an trigo ha kaumhan ngan aranihon na ito. Mamingaw an mga tawo. Paonan-o matutugkad ni Samuel an ira kasingkasing?

² Diri maaram an mga Israelita kon ano kaseryoso an ira ginhahangyo. Karuyag nira nga magkaada tawhanon nga hadi. Waray nira masantop nga tungod hito, nagpakita hira hin duro nga kawaray-pagtahod kan Jehova nga Dios ngan ha iya propeta. Baga hin ira ginsalikway hi Jehova sugad nga ira Hadi! Paonan-o hira maaaghat ni Samuel nga magbasol?

3, 4. (a) Kay ano nga nag-unabi hi Samuel han iya pagkabatan-on? (b) Kay ano nga mapulsanon ha aton yana an ehemplo han pagtoo ni Samuel?

³ Hi Samuel nagsiring: “Ako lagas na ngan ubanon.” An iya pagin ubanon mas nagpabug-at han iya mga pulong. Katapos nagdugang hiya: “Ako naglakat ha iyo atubangan tikang han akon pagkabatan-on ngada niyan nga adlaw.” (1 Sam. 11:14, 15; 12:2) Bisan kon lagas na, matin-aw pa gihap ha iya hunahuna an iya pagkabatan-on. An iya mga desisyon samtang nagtutubo nakabulig ha iya nga magkinabuhi nga may pagtoo ngan debosyon ha iya Dios, hi Jehova.

⁴ Kinahanglan padayon nga parig-unon ngan tipigan ni Samuel an iya pagtoo kay napapalibotan hiya hin mga diri magtinoohon ngan mga diri maunungon. Yana, makuri liwat an pagparig-on han pagtoo tungod kay nagkikinabuhi kita ha diri matinoohon ngan maraot nga  kalibotan. (Basaha an Lucas 18:8.) Aton kitaon kon ano an aton hibabaroan kan Samuel tikang ha iya pagkabata.

5, 6. Kay ano nga naiiba an kinabuhi ni Samuel han bata pa hiya, ngan kay ano nga sigurado an iya mga kag-anak nga aatamanon hiya ha Shilo?

⁵ Naiiba an kinabuhi ni Samuel han bata pa hiya. Han nalutas hiya, bangin mga tres o kwatro anyos, nagtikang hiya mag-alagad ha baraan nga tabernakulo ni Jehova ha Shilo, mga sobra 30 ka kilometro tikang ha ira balay ha Rama. Iginpahinungod hiya han iya mga kag-anak, hira Elkana ngan Hana, kan Jehova para hin espesyal nga pribilehiyo sugad nga Nasareo ha iya bug-os nga kinabuhi. * Karuyag sidngon ba nga gin-abandona hi Samuel han iya mga kag-anak kay diri hira nahigugma ha iya?

⁶ Diri! Maaram hira nga an ira anak aatamanon ha Shilo. Sigurado nga diri pababay-an hi Samuel han hitaas nga saserdote nga hi Eli tungod kay kaupod-upod hiya ni Eli ha pag-alagad. Ngan may mga kababayin-an liwat nga nag-aalagad ha tabernakulo.—Eks. 38:8; Huk. 11:34-40.

7, 8. (a) Kada tuig, paonan-o ginpaparig-on hi Samuel han iya mga kag-anak? (b) Ano an mahibabaroan han mga kag-anak yana kanda Hana ngan Elkana?

⁷ Dugang pa, diri gud mahingangalimtan nira Elkana ngan Hana an ira hinigugma nga suhag, nga baton han ira pag-ampo. Hi Hana naghangyo ha Dios hin anak nga lalaki ngan nagsaad nga ipapahinungod ito ha pag-alagad ha Iya. Kon nabisita hira kada tuig, gindadad-an ni Hana hi Samuel hin waray pako nga bado nga iya gintahi basi magamit ha pag-alagad ha tabernakulo. Sigurado nga nalilipay hi Samuel kon ginbibisita hiya, ngan nakabulig gud ha iya an mahigugmaon nga pagparig-on ngan giya han iya mga kag-anak samtang igintututdo nira nga daku nga pribilehiyo an pag-alagad kan Jehova ha tabernakulo.

⁸ Damu an mahibabaroan han mga kag-anak yana kanda Hana ngan Elkana. Kasagaran nga napapabay-an nira an espirituwal nga panginahanglan han ira mga anak tungod kay nakapokus hira ha materyal nga panginahanglan hito. Kondi gin-una han mga kag-anak ni Samuel an espirituwal nga mga butang, ngan daku an nagin epekto hito ha pagkatawo han ira anak.—Basaha an Proberbios 22:6.

9, 10. (a) Ihulagway an tabernakulo ngan an inaabat han bata nga hi Samuel mahitungod hiton sagrado nga lugar. (Kitaa liwat an footnote.) (b) Ano an pipira han mga buruhaton ni Samuel, ngan paonan-o daw la masusubad han mga batan-on yana an iya ehemplo?

⁹ Mahahanduraw naton an bata samtang nagtutubo ngan ginlilibot  an kabungtoran han Shilo. Kon nakikita niya an bungto ngan an mga walog ha ubos, posible nga nalilipay hiya nga makita an tabernakulo ni Jehova. Baraan gud nga lugar ito nga tabernakulo. * Gintukod ito haros 400 ka tuig na an naglabay ilarom han pagpanguna ni Moises, ngan ito hadto an sentro han putli nga pagsingba kan Jehova ha bug-os nga kalibotan.

¹⁰ Nagtubo an gugma ni Samuel ha tabernakulo. Ha urhi hiya nagsurat: “Hi Samuel nag-alagad ha atubangan ni Jehova, [sugad] nga bata, nga binagkosan hin epod nga lino.” (1 Sam. 2:18) Iton waray pako nga bado nagpapakita nga nagin kabulig hi Samuel han mga saserdote. Bisan kon diri hiya tikang ha pamilya han mga saserdote, upod han iya buruhaton an pag-abri han mga purtahan tikadto ha bungsaran han tabernakulo kada aga ngan an pagbulig ha edaran na nga hi Eli. Kondi bisan kon nalilipay hiya ha iya pribilehiyo, inabot an panahon nga nasamok an iya inosente nga kasingkasing. May maraot nga nahitatabo ha balay ni Jehova.

11, 12. (a) Ano an nangunguna nga sala nira Opni ngan Pinees? (b) Ano an magraot nga ginbubuhat nira Opni ngan Pinees ha tabernakulo? (Kitaa liwat an footnote.)

¹¹ Bata pa hi Samuel, nakita na niya an duro nga karaotan. Hi Eli may duha nga anak nga lalaki, hira Opni ngan Pinees. An asoy nasiring: “Mga bugoy an mga anak ni Eli. Waray nira pagtahod han Ginoo.” (1 Sam. 2:12, Maopay nga Sumat) Hira Opni ngan Pinees mga “bugoy”—ha literal “mga anak han kawaray-pulos”—tungod kay waray hira pagtahod kan Jehova. Ginbalewaray nira an Iya magtadong nga suruklan ngan mga sugo. Ngan ito an hinungdan han ira iba pa nga sala.

¹² Espisipiko an Balaud han Dios may kalabotan ha buruhaton han mga saserdote ngan ha paagi han ira paghalad. Husto la ito kay ito nga mga halad nagrepresentar han tagana han Dios ha pagpasaylo basi an mga tawo uyonan niya ngan magin takos han iya  bendisyon ngan paggiya. Kondi gin-impluwensyahan nira Opni ngan Pinees an ira mga igkasi-saserdote nga diri tahuron an mga halad. *

13, 14. (a) Ano an epekto ha sinsero nga mga tawo han karaotan ha tabernakulo? (b) Ano an waray buhata ni Eli sugad nga amay ngan sugad nga hitaas nga saserdote?

¹³ Handurawa an bata nga hi Samuel nga nahipapausa samtang nakikita niya an sugad nga pan-abuso nga diri naaaksyonan. Pira nga tawo an iya nakita—upod na an pobre, minos, ngan tinalumpigos—nga napakadto ha tabernakulo basi makakarawat hin espirituwal nga pagliaw ngan pagparig-on kondi nauli nga masurub-on, nasakitan, o naalohan? Ngan ano an iya inabat han hinbaroan niya nga gintatalapas nira Opni ngan Pinees an mga balaud ni Jehova ha moral, han nakighilawas hira ha pipira nga babaye nga nag-aalagad ha tabernakulo? (1 Sam. 2:22) Bangin naglalaom hiya nga aaksyonan ito ni Eli.

¹⁴ Hi Eli an may awtoridad ha pagtadong han nagtitikaduro nga karaotan. Sugad nga hitaas nga saserdote, responsabilidad niya an nahitatabo ha tabernakulo. Sugad nga amay, obligasyon niya nga disiplinahon an iya mga anak kay an ira mga buhat nakakadaot ha ira kalugaringon ngan ha iba. Kondi waray buhata ni Eli ito nga iya mga obligasyon. Ginsaway la niya an iya mga anak. (Basaha an 1 Samuel 2:23-25.) Kondi kinahanglan nira hin mas mabug-at nga disiplina. Takos gud hira sirotan hin kamatayon!

15. Ano an mabug-at nga mensahe ni Jehova nga iginpahayag kan Eli, ngan ano an epekto hito ha iya pamilya?

¹⁵ Nagtikaduro an karaotan salit nagsugo hi Jehova hin “usa nga tawo han Dios”—usa nga propeta nga waray ngarani—ngadto kan Eli basi ipahayag an mabug-at nga paghukom. Hi Jehova nagsiring kan Eli: “Ginpapasidunggan mo an imo mga anak nga kalalakin-an labaw ha akon.” Salit igintagna han Dios nga mamamatay an magraot nga anak ni Eli ha pariho nga adlaw ngan duro nga mag-aantos an ira pamilya, mawawara pa ngani an ira pribilehiyo ha pagkasaserdote. Nagbag-o ba an ira pamilya tungod hini? An asoy nasiring nga waray.—1 Sam. 2:27–3:1.

16. (a) Ano an mga asoy may kalabotan ha pag-uswag han bata nga hi Samuel? (b) Makapadasig ba ha imo ito nga mga asoy? Isaysay.

¹⁶ Ano an epekto hini nga karaotan ha bata nga hi Samuel? Bisan pa hito nga kahimtang, mababasa naton ha asoy an iya pag-uswag  samtang nagtutubo hiya. An 1 Samuel 2:18 nasiring nga hi Samuel matinumanon nga “nag-alagad ha atubangan ni Jehova, [sugad] nga bata.” Bisan kon bata pa, nakapokus hiya ha pag-alagad. Ngan ha bersikulo 21 aton mababasa: “An bata nga hi Samuel tinmubo ha atubangan ni Jehova.” Samtang nagtutubo, nagigin mas marig-on an iya relasyon ha iya langitnon nga Amay. An sugad nga relasyon an pinakamasasarigan nga proteksyon ha bisan ano nga karaotan.

17, 18. (a) Paonan-o hi Samuel masusubad han Kristiano nga mga batan-on kon diri nagpapakita hin maopay nga susbaranan an mga nakapalibot ha ira? (b) Ano an nagpapakita nga husto an ginbuhat ni Samuel?

¹⁷ Puydi unta mangatadongan hi Samuel nga mahimo niya buhaton an tanan nga iya karuyag kay bisan an hitaas nga saserdote ngan an iya mga anak nakakasala man. Kondi an sala han iba, pati na han mga may awtoridad, diri rason ha pagbuhat hin sayop. Yana, damu nga Kristiano nga batan-on an nagsusubad ha ehemplo ni Samuel ngan padayon nga ‘nagtutubo ha atubangan ni Jehova’ bisan kon napapalibotan hadton diri nagpapakita hin maopay nga susbaranan.

¹⁸ Ano an resulta han pagin matinumanon ni Samuel kan Jehova? Aton mababasa: ‘An bata nga hi Samuel nagtubo ha pagpalabi ni Jehova ngan han mga tawo.’ (1 Sam. 2:26) Hinigugma hiya han mga tawo nga matinumanon liwat ngan sigurado nga ginpabilhan hiya ni Jehova. Maaram gud hiya nga tatadungon han Dios an tanan nga karaotan ha Shilo, pero bangin nagpakiana hiya kon san-o. Usa ka gab-i, nabaton ito nga pakiana.

19, 20. (a) Ihulagway an nahitabo kan Samuel ha tabernakulo usa ka gab-i. (b) Paonan-o hinbaroan ni Samuel kon hin-o an nagtatawag ha iya, ngan paonan-o niya gintagad hi Eli?

¹⁹ Masirom pa adto pero tikaaga na, ngan naglalaga pa an daku nga lampara ha tabernakulo. Hiton mamingaw nga takna, nakabati hi Samuel hin tingog nga natawag ha iya. Kahuna niya nga hi Eli ito, nga lagas na ngan haros diri na nakita. Binuhat hiya ngan “dinmalagan” ngadto kan Eli. Nahahanduraw mo ba an bata nga nagdadalagan nga nakatiil basi panginanoon hi Eli? Makapabantad gud nga matinalahuron ngan buotan la gihap hiya kan Eli. Bisan pa han mga sala ni Eli, hiya pa gihapon an hitaas nga saserdote ni Jehova.—1 Sam. 3:2-5.

²⁰ Ginpukaw ni Samuel hi Eli ha pagsiring: “Iini ako; kay ikaw nagtawag ha akon.” Kondi nagsiring hi Eli nga waray hiya magtawag ngan ginpabalik an bata ha pagkaturog. Pero nautro pa ito hin duha ka beses! Ha urhi nasantop ni Eli an nahitatabo. Hito nga panahon, talagsa na la hi Jehova maghatag hin bisyon o matagnaon nga mensahe ha iya katawohan, ngan diri urusahon kon kay ano. Kondi nasantop ni Eli nga hini nga takna nakikiistorya utro hi Jehova—pero hini nga bata! Iya ginpabalik ha higdaan hi Samuel ngan gintutdoan kon paonan-o mabaton kon tawagon hiya utro ni Jehova. Sinugot hi Samuel. Waray pag-iha gintawag na liwat hiya: “Samuel, Samuel.” Hiya binaton: “Pagyakan; kay an imo surugoon namamati.”—1 Sam. 3:1, 5-10.

21. Paonan-o naton mahimo mabatian hi Jehova yana, ngan kay ano nga mapulsanon an pagbuhat hito?

²¹ Maopay na la, may surugoon na hi Jehova ha Shilo nga namamati ha iya. Ito an ginbuhat ni Samuel ha iya bug-os nga kinabuhi. Sugad ka ba ha iya? Diri na kinahanglan maghulat hin tingog tikang ha langit nga makikiistorya ha aton. Yana, mahimo naton mabatian an tingog han Dios pinaagi han iya Pulong, an Biblia. Samtang namamati ngan nasunod kita ha iya, nagigin mas marig-on an aton pagtoo pariho kan Samuel.

22, 23. (a) Paonan-o natuman an mensahe nga iginpahayag ni Samuel kan Eli? (b) Kay ano nga nagpadayon an maopay nga reputasyon ni Samuel?

²² Ito nga gab-i ha Shilo an pinakaimportante nga takna ha kinabuhi ni Samuel tungod kay tikang hito nagkaada hiya espesyal nga relasyon kan Jehova. Hiya nagin propeta ngan paragyakan han Dios. Ha tinikangan, nahadlok hiya pagsumat kan Eli han mensahe ni Jehova kay ito na an ultimo nga kapahayagan han paghukom kontra han pamilya ni Eli. Kondi nagin maisugon hi Samuel, ngan mapainubsanon nga ginkarawat ni Eli an paghukom han Dios. Waray pag-iha, natuman an ngatanan nga ginsiring ni Jehova: An mga Israelita nakig-away ha mga Pilisteohanon, namatay hira Opni ngan Pinees ha pariho nga adlaw, ngan hi Eli namatay liwat han hinbaroan niya nga ginkuha  han mga kaaway an sagrado nga Arka ni Jehova.—1 Sam. 3:10-18; 4:1-18.

²³ Kondi, nagpadayon an maopay nga reputasyon ni Samuel sugad nga matinumanon nga propeta. ‘Hi Jehova inupod ha iya,’ siring han asoy, ngan waray Niya tuguti nga mapakyas an bisan usa nga tagna ni Samuel.—Basaha an 1 Samuel 3:19.

24. Paglabay han panahon, ano an karuyag mahitabo han mga Israelita, ngan kay ano nga seryoso ito nga sala?

²⁴ Ginsunod ba han mga Israelita an pagpanguna ni Samuel ngan nagin matinumanon ha Dios? Waray. Paglabay han panahon, diri na nira karuyag nga propeta la an maghukom ha ira. Karuyag nira magin pariho ha iba nga nasud nga may tawhanon nga hadi. Ha sugo ni Jehova, ginhatag ni Samuel an ira hangyo. Kondi kinahanglan niya isumat ha ira an kadaku han ira sala. An ira ginsasalikway diri la tawo, kondi hi Jehova mismo! Salit ginpakadto niya hira ha Gilgal.

25, 26. Ha Gilgal, paonan-o ginbuligan han edaran na nga hi Samuel an mga Israelita nga masantop an kaseryoso han ira sala kan Jehova?

²⁵ Handurawa utro iton tensyonado nga takna ha Gilgal diin nakikiistorya an edaran nga hi Samuel ha iya mga kahimungto. Ginpahinumdom niya an Israel han iya pagin matinumanon ha bug-os nga kinabuhi. Katapos, aton mababasa: “Hi Samuel nagsangpit kan Jehova.” Naghangyo hiya kan Jehova hin uran ngan mga dalugdog.—1 Sam. 12:17, 18.

²⁶ Uran ngan mga dalugdog ha katpaso? Waray pa gud mahitabo an sugad hito! Kon may-ada man Israelita nga nagruhaduha hito, waray ito pag-iha tungod kay tigda nga nagsirom an kalangitan. Nagtikakusog an hangin, salit natumba an mga trigo ha uma. Nagkaada magkusog ngan nakakabungol nga mga dalugdog. Katapos, bumunok. Ano an reaksyon han mga tawo? “An ngatanan . . . nahadlok hinduro kan Jehova ngan kan Samuel.” Hito nga takna, nasantop nira kon ano kaseryoso an ira sala.—1 Sam. 12:18, 19.

27. Ano an inaabat ni Jehova ha mga nagsusubad han pagtoo ni Samuel?

²⁷ Hi Jehova, diri hi Samuel, an nakatugkad han ira rebelyoso nga kasingkasing. Tikang ha pagkabata ni Samuel tubtob ha iya kalagas, marig-on an iya pagtoo ha Dios salit ginbendisyonan hiya. Waray magbag-o hi Jehova. Ginbubuligan pa gihapon niya an mga nagsusubad han pagtoo ni Samuel.