1. Ihulagway an inaabat ni Marta ngan an hinungdan hito.

NAHINUNUMDOMAN pa ni Marta an lubnganan han iya bugto nga hi Lasaro, an lungib nga ginsadhan hin bato. An iya kasakit sugad kabug-at hito nga bato. Diri hiya makatoo nga waray na an iya hinigugma nga bugto. Upat ka adlaw na nga patay hi Lasaro; durante hito, okupado hira ha pag-asikaso ha mga bisita nga naduyog ha ira kasubo.

2, 3. (a) Ano an posible nga gin-abat ni Marta han nakita niya hi Jesus? (b) Ano an iginpapakita han ginyakan ni Marta mahitungod ha iya?

² Hito nga takna, aada ha atubangan ni Marta an pinakaduok nga sangkay ni Lasaro. Pakakita kan Jesus, posible nga nagduro an iya kasakit kay ini la nga tawo an makakabulig unta ha iya bugto. Pero naliaw la gihapon hiya ha presensya ni Jesus, nga nakadto ha gawas han gutiay nga bungto han Betania. Diri pa la maiha hira nga magkaupod, kondi naparig-on na liwat hiya han gugma ngan empatiya ni Jesus. Nagbangon hi Jesus hin mga pakiana nga nakabulig ha iya nga magpokus ha iya pagtoo ngan ha paglaom nga pagkabanhaw. Hito nga pag-istorya, ginpahayag ni Marta an usa han pinakaimportante nga mga pulong nga iya ginyakan: “Natoo ako nga ikaw an Kristo nga Anak han Dios, an Usa nga makanhi ha kalibotan.”—Juan 11:27.

³ Iginpapakita hito nga mga pulong nga daku gud an pagtoo ni Marta. Bisan kon gutiay la an rekord han Biblia mahitungod ha iya, may-ada ito importante nga mga leksyon nga magpaparig-on han aton pagtoo. Basi hibaroan ito, aton hisgotan an siyahan nga asoy han Biblia mahitungod kan Marta.

4. Hin-o an kabugtoan ni Marta, ngan ano an ira relasyon kan Jesus?

⁴ Pipira ka bulan antes hito, buhi pa ngan mahimsog hi Lasaro. Makada ha ira balay ha Betania an ira pinakaimportante nga bisita, hi Jesu-Kristo. An magburugto nga hira Lasaro, Marta, ngan Maria naukoy ha usa la nga balay bisan kon adulto na hira. May mga  researcher nga nasiring nga posible nga hi Marta an suhag tungod kay hiya an nag-aasikaso han ira panimalay ngan ha pipira nga higayon, hiya an siyahan nga ginngangaranan. (Juan 11:5) Diri kita maaram kon may nag-asawa ha ira. Anoman an ira kahimtang, nagin duok hira nga kasangkayan ni Jesus. Ngani, durante han ministeryo ni Jesus ha Judea, diin inatubang hiya hin duro nga pagkontra, ha ira balay hiya nahuron. Sigurado nga gin-apresyar gud niya an ira suporta ngan an kamurayawan han ira panimalay.

5, 6. (a) Kay ano nga okupado hi Marta durante han pagbisita ni Jesus? (b) Ano an ginbuhat ni Maria pag-abot ni Jesus ha ira balay?

⁵ Maabiabihon ngan maduruto hi Marta. Kon may bisita, okupado hiya ha pagpanginano basi magin komportable hira. Ngan ito an iya ginbuhat han binisita hi Jesus ha ira. Nagplano dayon hiya hin damu nga espesyal nga pagkaon para ha iya bisita ngan bangin para ha mga kaupod hito. Importante gud hadto an pagin maabiabihon. Kon naabot an bisita, ginhaharokan hiya, ginhuhukasan hin sandalyas, ginhihimsawan, ngan ginhihisoan an ulo hin mahamot nga lana. (Basaha an Lucas 7:44-47.) Gin-aandaman liwat hiya hin makakaturogan ngan pagkaon.

⁶ Okupado gud hira Marta ngan Maria ha pagpangandam para ha pagbisita ni Jesus. Hi Maria, nga usahay gintatagad nga mas interesado mahibaro ha ira nga duha, sigurado nga binulig anay ha iya bugto. Kondi pag-abot ni Jesus, ginbayaan niya an iya buruhaton. Ginsalingabot ni Jesus ito nga higayon basi magtutdo. Diri pariho ha mga lider han relihiyon hito nga panahon, gintahod ni Jesus an kababayin-an ngan gintutdoan mahitungod han Ginhadian han Dios, an tema han iya ministeryo. Hi Maria, nga nalilipay ha sugad nga higayon, liningkod ha may tiilan ni Jesus ngan namati hin maopay.

7, 8. Kay ano nga natarantar hi Marta, ngan paonan-o niya ito iginpahayag?

⁷ Mahahanduraw naton an tensyon nga gin-aabat ni Marta. Tungod han damu nga pagkaon nga kinahanglan lutoon ngan han iba pa nga kinahanglan niya buhaton para ha iya mga bisita, nabaraka ngan natarantar gud hiya. Nasina ba hiya, nanhayhay, ngan nagmurusdot kay nagliliningkod la an iya bugto ngan diri nabulig samtang okupado hiya nga naglalabaylabay? Diri urusahon kon ginbuhat niya ito tungod kay diri niya maaakos an ngatanan!

⁸ Ha urhi, waray na makapugong hi Marta salit nagsiring hiya kan Jesus: “Ginoo, diri ako ginbubuligan han akon bugto ha mga buruhaton, diri mo ba hiya sisidngan? Alayon sidnga hiya nga buligan ako.” (Luc. 10:40) Mabug-at ito nga mga pulong. Ginhubad ito han pipira nga bersyon han Biblia hini nga paagi: “Ginoo, diri ka ba napaid . . . ?” Katapos, ginhangyo niya hi Jesus nga sidngan hi Maria nga buligan hiya.

9, 10. (a) Ano an baton ni Jesus kan Marta? (b) Paonan-o kita nahibaro nga diri ginsasaway ni Jesus an sobra nga pagpangandam ni Marta?

 ⁹ Posible nga nahipausa hi Marta ha baton ni Jesus, sugad la nga nahipausa an damu nga magbarasa han Biblia. Hi Jesus malumo nga nagsiring: “Marta, Marta, nababaraka ngan okupado ka ha damu nga butang. Pero pipira la nga butang an ginkikinahanglan, o usa la ngani. Ginpili ni Maria an maopay nga butang, ngan diri ito kukuhaon ha iya.” (Luc. 10:41, 42) Ano an karuyag sidngon ni Jesus? Iginpapasabot ba niya nga materyalistiko hi Marta? Ginsasaway ba niya hi Marta tungod han sobra nga pagpangandam han ira pagkaon?

¹⁰ Diri man. Matin-aw nga nakita ni Jesus nga maopay an motibo ni Marta. Dugang pa, diri man niya gintatagad nga sayop an sobra nga pagkamaabiabihon. Kinaburut-on nga tinambong hiya ha “daku nga panagtawo” nga gin-andam ni Mateo para ha iya. (Luc. 5:29) An pagpangandam ni Marta diri amo an isyu, kondi an iya prayoridad. Nakapokus hiya ha pagpangandam hin damu nga pagkaon salit waray na niya matagad an pinakaimportante. Ano ito?

11, 12. Paonan-o malumo nga ginsaway ni Jesus hi Marta?

¹¹ Hi Jesus, an bugtong nga Anak ni Jehova nga Dios, aada ha ira balay basi magtutdo han kamatuoran. Waray na mas importante hito, bisan an mga pagpangandam ni Marta ngan an magrasa nga pagkaon. Sigurado nga nasubo hi Jesus kay waray matagad ni Marta inin talagsahon nga higayon nga mapahilarom an iya pagtoo. Bisan pa hito, ginpabay-an la hiya ni Jesus ha pagdesisyon kon ano an iya bubuhaton. * Pero waray hiya katungod ha pagdesisyon para kan Maria.

¹² Salit malumo nga ginsaway ni Jesus hi Marta, mahigugmaon nga gin-uroutro an ngaran ni Marta basi mapakalma hiya, ngan ginpasarig nga diri hiya kinahanglan ‘mabaraka ngan [magin] okupado ha damu nga butang.’ An simple nga pangaon nga may usa o duha nga putahe igo na labi na kon may espirituwal nga butang nga mapapahimulosan. Salit diri gud kukuhaon ni Jesus an “maopay nga butang” nga ginpili ni Maria—an paghibaro tikang ha iya!

13. Ano an aton mahibabaroan tikang ha ginsiring ni Jesus kan Marta?

 ¹³ Damu an aton mahibabaroan tikang hini nga asoy. Diri naton sadang tugotan an bisan ano nga butang nga magin mas importante kay han aton “espirituwal nga panginahanglan.” (Mat. 5:3) Bisan kon karuyag naton subaron an pagin mahinatagon ngan pagin maduruto ni Marta, diri naton karuyag nga sobra nga ‘mabaraka ngan [magin] okupado’ ha diri importante nga mga butang nga tungod hito napapabay-an na an pinakaimportante. Nakikig-upod kita ha mga igkasi-tumuroo diri la basi mag-andam o kumaon hin magrasa nga pagkaon, kondi basi magdinasigay ngan magparig-onay. (Basaha an Roma 1:11, 12.) Ha sugad nga mga okasyon, igo na bisan an simple nga pagkaon.

14. Kay ano nga makakasiguro kita nga maopay nga susbaranan hi Marta ha pagkarawat hin pagsaway?

¹⁴ Ginkarawat ba ni Marta an pagsaway ni Jesus ngan nahibaro tikang hito? Oo. Han gin-unabi ni apostol Juan an makalilipay nga sumat mahitungod kan Lasaro, hiya nagpahinumdom ha aton: “Hinigugma ni Jesus hira Marta, Maria, ngan Lasaro.” (Juan 11:5) Mga bulan na an naglabay tikang han gin-unabi nga pagbisita ni Jesus ha Betania. Matin-aw, hi Marta waray dumulo o magdumot kan Jesus bisan kon ginsaway hiya; lugod, ginkarawat niya ito. Hini liwat nga bahin, nagpakita hiya ha aton hin maopay nga susbaranan ha pagtoo kay kita ngatanan usahay kinahanglan sawayon.

15, 16. (a) Ano an ginbuhat ni Marta han nagkasakit an iya bugto? (b) Kay ano nga napakyas an ginlalaoman nira Marta ngan Maria?

¹⁵ Han nagkasakit hi Lasaro, nagin okupado hi Marta ha pag-ataman ha iya. Ginbuhat ni Marta an ngatanan basi maibanan an iya kasakit ngan mag-opay. Pero, nagtikagrabe la hiya. Ha ngatanan nga panahon, waray gud hiya bayai han iya kabugtoan, lugod gin-ataman hiya. Sigurado nga ginkinita ni Marta an makalolooy nga nawong han iya bugto, samtang nahinunumdoman niya an damu ka tuig han makalilipay ngan makasurubo nga ira pag-upod!

¹⁶ Han baga hin diri na maoopay hi Lasaro, nagpadara hira Marta ngan Maria hin mensahe kan Jesus, nga nagsasangyaw ha lugar nga madadangat hin duha ka adlaw nga pagbaktas. Simple la an ira mensahe: “Ginoo, may sakit an imo pinalangga nga sangkay.” (Juan 11:1, 3) Maaram hira nga hinigugma ni Jesus an ira bugto, ngan natoo hira nga bubuhaton niya an ngatanan basi buligan an iya sangkay. Naglaom ba hira nga maabot hi Jesus antes pa magin urhi an ngatanan? Kon amo, napakyas hira. Namatay hi Lasaro.

17. Kay ano nga nababaraka hi Marta, ngan ano an iya ginbuhat han hinbaroan niya nga tiabot na hi Jesus?

¹⁷ Nagtaguminatay hira Marta ngan Maria, nangandam para ha lubong, ngan gin-asikaso an damu nga bisita tikang ha Betania ngan ha kahirani nga mga lugar. Kondi, waray pa sumat mahitungod kan Jesus. Samtang nalabay an mga adlaw, bangin mas nagduro an kabaraka ni Marta. Paglabay hin upat ka adlaw tikang han kamatay ni Lasaro, hinbaroan niya nga tiabot na hi Jesus. Bisan kon nagtataguminatay, nagdagmit hiya pagtapo kan Jesus nga waray magsumat kan Maria.—Basaha an Juan 11:18-20.

18, 19. Ano nga paglaom an iginpahayag ni Marta, ngan kay ano nga darayawon gud an iya pagtoo?

¹⁸ Han nakita ni Marta an iya Agaron, iya ginyakan an mga pulong  nga pipira ka adlaw na nga nakakagupong ha ira ni Maria: “Ginoo, kon nakanhi ka la, waray unta kamatay an akon bugto.” Bisan pa hito, waray hiya mawad-i hin paglaom ngan pagtoo. Hiya nagdugang: “Pero maaram ako nga bisan yana anoman an imo aroon ha Dios, ihahatag niya ha imo.” Katapos, ginyakan ni Jesus an mga pulong nga magpaparig-on han iya pagtoo: “Mabubuhi an imo bugto.”—Juan 11:21-23.

¹⁹ Kahuna ni Marta nga an tidaraon nga pagkabanhaw an ginhihisgotan ni Jesus, salit hiya binaton: “Maaram ako nga mabubuhi hiya ha pamanhaw ha kataposan nga adlaw.” (Juan 11:24) Darayawon gud an iya pagtoo hito nga katutdoan. May Judio nga mga lider han relihiyon hadto, nga tinatawag nga Saduseo, nga diri natoo ha pagkabanhaw bisan kon matin-aw nga igintututdo ito ha Kasuratan. (Dan. 12:13; Mar. 12:18) Kondi, maaram hi Marta nga igintutdo ni Jesus an paglaom han pagkabanhaw ngan  nagbanhaw pa ngani hiya. Pero diri pariho han iya mga ginbanhaw, upat na ka adlaw nga patay hi Lasaro. Diri maaram hi Marta kon ano an sunod nga mahitatabo.

20. Isaysay an kahulogan han ginsiring ni Jesus ha Juan 11:25-27 ngan an baton ni Marta.

²⁰ Katapos, iginyakan ni Jesus inin diri mangangalimtan nga mga pulong: “Ako an pagkabanhaw ngan an kinabuhi.” Oo, gintagan ni Jehova an iya Anak hin awtoridad nga magbanhaw han mga patay ha bug-os nga tuna ha tidaraon. Ginpakianhan ni Jesus hi Marta: “Natoo ka ba hini?” Katapos, binaton hi Marta ha mga pulong nga mababasa ha tinikangan hini nga kapitulo. Natoo hi Marta nga hi Jesus an Kristo, o Mesias, nga hiya an Anak han Dios nga hi Jehova, ngan hiya an igintagna han mga propeta nga maabot ha kalibotan.—Juan 5:28, 29; basaha an Juan 11:25-27.

21, 22. (a) Paonan-o iginpakita ni Jesus an iya pagbati ha atubangan han mga nagtataguminatay? (b) Ihulagway an pagkabanhaw ni Lasaro.

²¹ Ginpapabilhan ba ni Jehova nga Dios ngan han iya Anak nga hi Jesu-Kristo an pagtoo nga pariho han kan Marta? Ginbabaton ito han sunod nga mga panhitabo nga nakita ni Marta. Nagdagmit hiya pagkadto kan Maria ngan igin-upod hiya ngadto kan Jesus. Katapos hito, nakita niya nga nasusubo gud hi Jesus samtang nakikiistorya kan Maria ngan ha damu pa nga nagtataguminatay. Nakita niya an mga luha ni Jesus tungod han duro nga kasubo ha kamatay ni Lasaro. Hinbatian niya an sugo ni Jesus nga kuhaon an bato ha ganghaan han lubnganan han iya bugto.—Juan 11:28-39.

²² Pero nag-insister hi Marta nga naninimaho na ito kay upat ka adlaw na nga patay hi Lasaro. Kondi, ginpahinumdoman hiya ni Jesus: “Diri ba ginsidngan ko ikaw nga kon tumoo ka makikita mo an himaya han Dios?” Tinoo hiya, ngan nakita gud niya an himaya ni Jehova. Hito mismo nga takna, gintagan ni Jehova an Iya Anak hin gahum ha pagbanhaw kan Lasaro! Handurawa an panhitabo nga sigurado nga waray hingalimti ni Marta ha iya bug-os nga kinabuhi: An sugo ni Jesus nga, “Lasaro, gawas ngadi!”; an haros diri mabatian nga karasikas tikang ha lungib diin ginlubong hi Lasaro samtang nabuhat hiya ngan hinay-hinay nga nagawas nga nakaputos pa; an sugo ni Jesus nga “badbari hiya ngan palakta”; ngan syempre, an sobra nga kalipay nira ni Maria samtang nahangkop ha ira bugto. (Basaha an Juan 11:40-44.) Nawara an sobra nga kasubo ha kasingkasing ni Marta!

23. Ano an karuyag buhaton ni Jehova ngan ni Jesus para ha imo, ngan ano an kinahanglan mo buhaton?

²³ Iginpapakita hini nga asoy nga an pagkabanhaw diri kay  inop la. Usa ito nga nakakaliaw nga katutdoan han Biblia ngan tinuod nga panhitabo. (Job 14:14, 15) Ginbabalosan ni Jehova ngan han Iya Anak an mga tawo nga may pagtoo, pariho kanda Marta, Maria, ngan Lasaro. Makakarawat mo liwat an sugad nga balos kon magkakaada ka marig-on nga pagtoo.

24. Ano an ultimo nga ginsiring han Biblia mahitungod kan Marta?

²⁴ Ha ultimo nga higayon, gin-unabi han Biblia hi Marta ha tinikangan han ultimo nga semana han kinabuhi ni Jesus sugad nga tawo. Maaram hi Jesus han kakurian nga iya maieksperyensyahan, salit kinadto hiya ha balay nira Marta ha Betania. Tikang didto, magbabaktas hiya hin tulo ka kilometro tipakadto ha Jerusalem. Samtang nakaon hira Jesus ngan Lasaro ha balay ni Simon nga sanlahon, gin-unabi hi Marta ha ultimo nga higayon: “Hi Marta nag-aasikaso ha ira.”—Juan 12:2.

25. Kay ano nga daku nga bendisyon ha mga kongregasyon yana an kababayin-an nga pariho kan Marta?

²⁵ Maduruto gud hi Marta! Han siyahan nga gin-unabi hiya ha Biblia, nagtatrabaho hiya; ngan ha ultimo nga rekord, nagtatrabaho la gihapon hiya, ginbubuhat an bug-os nga mahihimo para ha iba. Daku nga bendisyon ha Kristiano nga mga kongregasyon yana an kababayin-an nga pariho kan Marta—maduruto ngan mahinatagon, pirme iginpapakita an ira pagtoo pinaagi ha pagin madasigon ha pag-alagad ngan ha pagbulig ha iba. Padayon ba ito nga ginhimo ni Marta? Posible ito. Ngan kon amo, gumios hiya hin maaramon kay may-ada pa hiya aatubangon nga mga pagsari.

26. Paonan-o nakabulig kan Marta an iya pagtoo?

²⁶ Paglabay hin pipira ka adlaw, nakita ni Marta an masakit nga kamatayon han iya hinigugma nga Agaron, hi Jesus. Dugang pa, gin-ikaparatay liwat hi Lasaro han mga nagpatay kan Jesus tungod kay an iya pagkabanhaw nagparig-on han pagtoo han damu. (Basaha an Juan 12:9-11.) Ngan ha urhi, tungod han kamatayon nautod an ira bugkos sugad nga magburugto. Diri kita maaram kon paonan-o o kon kakan-o ito nahitabo, pero makakasiguro kita nga an marig-on nga pagtoo ni Marta nakabulig ha iya nga makailob tubtob ha kataposan. Salit, maopay gud nga subaron han mga Kristiano yana an iya pagtoo.