MAY-ADA KA GUD BA KONTROL KON ANO AN IMO MAGIGIN TIDARAON? Natoo an pipira nga an kapalaran o itinanda na nga daan nga tidaraon, ngan diri personal nga desisyon, an nagkukontrol han ira kinabuhi. Kon napapakyas hira ha pagkab-ot hin tumong, ginhuhunahuna na la nira nga diri ito malilikyan. “Diri ito para ha akon!” siring nira.

An iba nawawarayan paglaom kon nakikita nira nga waray na solusyon an panalumpigos ngan kawaray-hustisya ha kalibotan. Bangin nangangalimbasog hira nga magin maopay an ira kinabuhi, pero pauroutro nga napapakyas an ira mga plano tungod han girra, krimen, kalamidad, ngan sakit. ‘Kay ano nga mangalimbasog pa man?’ nagpapakiana hira.

Oo, an mga panhitabo ha kinabuhi mahimo makaapekto ha aton mga plano. (Eclesiastes 9:11) Kondi may kalabotan han imo ultimo nga dadangatan, may-ada ka gud mahihimo. Ha pagkamatuod, iginpapakita han Biblia nga nadepende ha imo desisyon an imo tidaraon. Tagda an ginsisiring hito.

Hi Moises, an lider han kadaan nga nasud han Israel, nagsiring ha katawohan antes hira sumulod ha Tuna nga Iginsaad: “Akon kamo ginpapapili butnga han kinabuhi o han kamatayon, han bendisyon o han sumpa; ngan kinahanglan pilion mo an kinabuhi basi ka mabuhi, ikaw ngan an imo katulinan, pinaagi han paghigugma kan Jehova nga imo Dios, pinaagi han pagpamati ha iya tingog, ngan pinaagi han pagpabilin nga duok gud ha iya.”—Deuteronomio 30:15, 19, 20.

“Akon kamo ginpapapili butnga han kinabuhi o han kamatayon, han bendisyon o han sumpa; ngan kinahanglan pilion mo an kinabuhi.”—Deuteronomio 30:19

Oo, gintalwas han Dios an mga Israelita tikang ha pagkauripon ha Ehipto, ngan iginhatag ha ira an paglaom nga magkaada malipayon ngan may kagawasan nga kinabuhi ha Tuna nga Iginsaad. Kondi diri nira ito basta la makakarawat. Basi makarawat ito nga mga bendisyon, kinahanglan nira ‘pilion an kinabuhi.’ Paonan-o? ‘Pinaagi han paghigugma ha Dios, pinaagi han pagpamati ha iya tingog, ngan pinaagi han pagpabilin nga duok gud ha iya.’

Yana, naatubang ka hin pariho nga sitwasyon, ngan an imo pagpili magsusumat kon ano an imo magigin tidaraon. Pinaagi ha pagpili nga higugmaon an Dios, mamati ha iya tingog, ngan magpabilin nga duok gud ha iya, sugad hin ginpipili mo an kinabuhi—kinabuhi nga waray kataposan ha paraiso nga tuna. Kondi, ano an nahiuupod ha tagsa hini?

An gugma an nangunguna nga kalidad han Dios. “An Dios gugma,” siring han giniyahan nga hi apostol Juan. (1 Juan 4:8) Salit han ginpakianhan hi Jesus kon ano an pinakaimportante nga sugo, hiya binaton: “Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.” (Mateo 22:37) An tinuod nga relasyon kan Jehova sadang igbasar diri ha kahadlok o ha diri ginhuhunahuna nga pagsugot, kondi ha gugma. Pero kay ano nga sadang naton pilion nga higugmaon hiya?

An gugma ni Jehova para ha katawohan pariho ha gugma han mahigugmaon nga kag-anak ha ira mga anak. Bisan kon diri perpekto, an mahigugmaon nga kag-anak nagtututdo, nag-aaghat, nagsusuporta, ngan nagdidisiplina ha iya mga anak tungod kay karuyag niya hira magin malipayon ngan malampuson. Ano nga balos an karuyag makarawat han mga kag-anak? Karuyag nira nga higugmaon hira han ira mga anak ngan sundon hira para ha kaopayan han ira mga anak. Diri ba makatadunganon nga maglaom an aton perpekto ngan langitnon nga Amay han aton gugma ngan apresasyon tungod han tanan nga ginbuhat niya para ha aton?

Ha orihinal nga pinulongan han Biblia, an pulong nga “pamati” kasagaran nga nag-uupod han kahulogan nga “pagsugot.” Diri ba ini an aton karuyag sidngon kon nasiring kita ha bata, “Pamati ha imo kag-anak”? Salit, an pagpamati ha tingog han Dios nagpapasabot ha paghibaro ngan pagsugot ha iya. Tungod kay diri naton literal nga nababatian an iya tingog, namamati kita ha iya pinaagi ha pagbasa ngan pag-aplikar han aada ha iya Pulong, an Biblia.—1 Juan 5:3.

Basi ipakita an pagkaimportante han pagpamati ha tingog han Dios, makausa hi Jesus nagsiring: “An tawo nabubuhi, diri la ha tinapay, kondi ha tagsa nga pulong nga nagawas ha baba ni Jehova.” (Mateo 4:4) Importante an pisikal nga pagkaon, kondi mas importante an pagkuha hin kahibaro mahitungod ha Dios. Kay ano? An maaramon nga hi Hadi Solomon nagsaysay: “An kinaadman usa nga proteksyon sugad la nga an kwarta usa nga proteksyon, pero an bentaha han kahibaro amo ini: An kinaadman nagtitipig han kinabuhi han nagtatag-iya hito.” (Eclesiastes 7:12) An kahibaro ngan kinaadman nga tikang ha Dios mahimo magpanalipod ha aton yana, ngan makakabulig ito ha aton basi makahimo kita hin maaramon nga desisyon nga magtutugway ha kinabuhi nga dayon ha tidaraon.

Balikon naton an ilustrasyon ni Jesus ha nauna nga artikulo: “Haligot an ganghaan ngan gutiay an dalan tipakadto ha kinabuhi, ngan pipira la an nakakabiling hito.” (Mateo 7:13, 14) Kon magbibiyahe ha sugad nga dalan, sigurado nga magpapahimulos kita kon may kaupod kita nga eksperto nga tour guide, ngan diri kita mabulag ha iya, basi makaabot ha aton destinasyon—an kinabuhi nga dayon. Salit may-ada kita maopay nga rason nga magpabilin nga duok ha Dios. (Salmo 16:8) Kondi paonan-o naton hihimoon ito?

Kada adlaw, damu an aton kinahanglan buhaton ngan damu pa an aton karuyag himoon. Tungod hito, mahimo kita magin sagipo o mawara ha pokus salit gutiay na la o waray na kita panahon ha paghunahuna han iginpapabuhat han Dios ha aton. Ito an hinungdan nga ginpapahinumdoman kita han Biblia: “Padayon nga magbantay hin maopay nga an iyo paglakat diri magin pariho han diri maaramon kondi pariho han maaramon nga mga tawo, nga ginagamit ha pinakamaopay nga paagi an iyo panahon, kay an mga adlaw magraot.” (Efeso 5:15, 16) Nagpapabilin kita nga duok ha Dios pinaagi ha pagtagad han aton relasyon ha iya sugad nga an pinakaimportante ha aton kinabuhi.—Mateo 6:33.

Bisan kon waray na kita mahihimo basi mabag-o an aton naglabay, puydi ka magdesisyon nga magkaada maopay nga tidaraon para ha imo ngan ha imo mga hinigugma. Iginpapakita han Biblia nga an aton langitnon nga Amay nga hi Jehova nahigugma gud ha aton ngan iya iginpapahibaro an karuyag niya buhaton naton. Tagdon naton an ginsiring ni propeta Micas:

“Ginsidngan ka niya, O tawo, kon ano an maopay. Ngan ano an ginkikinahanglan ha imo ni Jehova? An pagpadapat la hin hustisya, an paghigugma ha pagkamaunungon, ngan an paglakat nga mapainubsanon kaupod han imo Dios!”—Micas 6:8.

Kakarawaton mo ba an imbitasyon ni Jehova nga maglakat kaupod niya ngan makakarawat han iya igin-andam nga waray kataposan nga mga bendisyon? Ikaw an magdidesisyon!