An pulong nga empatiya nangangahulogan hin “abilidad ha pagsabot han inaabat o naieksperyensyahan han iba pinaagi ha paghanduraw nga sugad hin ikaw an aada hito nga kahimtang.” Hi Dr. Rick Hanson nga espesyalista ha hunahuna an nagsiring nga “iginpanganak kita nga may abilidad ha pagpakita hin empatiya.”

TAGDA: Ini nga kalidad diri mabibilngan ha iba nga linarang, pero kay ano nga puydi naton ito ipakita? An Biblia nasiring nga ginlarang han Dios an tawo uyon ha iya dagway. (Genesis 1:26) Ginlarang kita uyon ha dagway han Dios salit maipapakita naton an iya personalidad ngan mag-opay nga kalidad. Kon naaaghat an mapinairon nga mga tawo nga buligan an iba, ira iginpapakita an empatiya han mapinairon nga Maglalarang, hi Jehova nga Dios.​—Proberbios 14:31.

An Dios may empatiya ha aton ngan nangangalas hiya makita kita nga nag-aantos. May kalabotan ha katawohan han kadaan nga Israel nga nag-antos hin duro nga panalumpigos ha Ehipto ngan 40 ka tuig nga kakurian ha kamingawan, an Biblia nasiring: “Durante han ngatanan nira nga kasakitan nasasakit hiya.” (Isaias 63:9) Tigamni nga diri la kay nakikita han Dios an ira kasakitan. Naaabat liwat niya an ira kasakit. Hiya nagsiring: “Maaram gud ako han mga kaul-ol nga ira gin-aantos.” (Exodo 3:7) “An bisan hin-o nga kumamkam ha iyo,” siring han Dios, “nakamkam han nawotawo han akon mata.” (Zacarias 2:8) Kon nasasakitan kita, nasasakitan liwat hiya.

An Biblia nagpapasarig ha aton nga bisan kon ginhuhukman naton an aton kalugaringon ngan naabat nga diri kita takos han empatiya han Dios, “an Dios mas daku kay ha aton kasingkasing ngan maaram han ngatanan nga butang.” (1 Juan 3:19, 20) Mas kilala kita niya kay ha kilala naton an aton kalugaringon. Maaram gud hiya han aton kahimtang, ginhuhunahuna, ngan gin-aabat. May-ada hiya empatiya ha aton.

 Ginpapasarig kita han Biblia

• “Matawag ka, ngan mabaton hi Jehova; mangangaraba ka para hin bulig, ngan masiring hiya, ‘Aadi ako!’”​—ISAIAS 58:9.

• “‘Kay maaram gud ako han akon mga ginhuhunahuna para ha iyo,’ nasiring hi Jehova. ‘Karuyag ko magkaada kamo hin kamurayawan, diri hin kadaot. Karuyag ko kamo tagan hin kabubuwason ngan hin paglaom. Ngan matawag kamo ha akon ngan madaop ngan mag-aampo ha akon, ngan mamamati ako ha iyo.’”​—JEREMIAS 29:11, 12.

• “Tiroka an akon mga luha ha imo anit nga surudlan. Diri ba nakarekord ito ha imo libro?”​—SALMO 56:8.

Makakabulig ba ha pag-ilob han mga kakurian an paghibaro nga may empatiya an Dios ha aton? Tagda an eksperyensya ni Maria:

“Han maeksperyensyahan ko an duro nga kasakit han mamatay an akon 18 anyos nga anak katapos han iya duha ka tuig nga pag-antos hin kanser, inabat ko nga makuri ngan waray hustisya an kinabuhi. Nasina ako kan Jehova kay waray niya buligi ngan tambala an akon anak!

“Paglabay hin unom ka tuig, usa nga mahigugmaon ngan mapinairon nga bugto ha kongregasyon an namati samtang iginsusumat ko an akon inaabat nga diri ako hinigugma ni Jehova. Katapos ako niya pagpinamatian hin pipira ka oras, nagkotar hiya hin teksto nga nakabantad ha akon, an 1 Juan 3:19, 20, nga nasiring: ‘An Dios mas daku kay ha aton kasingkasing ngan maaram han ngatanan nga butang.’ Hiya nagsiring nga nasasabtan ni Jehova an aton kasakit.

“Bisan pa hito, nasina la gihapon ako! Katapos ginbasa ko an Salmo 94:19, nga nasiring: ‘Han an mga kabaraka nagtabon ha akon, imo ako ginliaw ngan ginpakalma.’ Ha akon pag-abat ito nga mga bersikulo ginsurat para gud ha akon! Paglabay han panahon, naisusumat ko na kan Jehova an akon mga kasakit kay maaram ako nga namamati ngan nasasabtan niya ako.”

Makalilipay gud hibaroan nga nasasabtan ngan naaabat han Dios an aton kahimtang! Pero, kay ano nga may-ada duro nga pag-antos? Tungod ba ito kay ginsisirotan kita han Dios ha aton sayop nga mga buhat? May bubuhaton ba an Dios basi wad-on an tanan nga pag-antos? Ini nga mga pakiana babatunon ha sunod nga mga artikulo.