An Punto de Bista han Biblia

Ano Gud ba an Ginpapasabot han Pagkaulo ha Pag-asawa?

HA DAMU nga lugar, an mga seremonya ha kasal kasagaran na nga nag-uupod han panumpa diin an karaslon nga babaye nagsasaad nga susugton niya an iya bana. Bisan pa hito, damu nga babaye an diri naruruyag han ideya nga an ira bana amo an ira ulo. Pansina an igintututdo han Biblia parte hini nga topiko. Mahibabaroan mo nga an ginsisiring hito makatadunganon ngan praktikal.

An Ginsisiring han Dios Parte ha Pagkaulo

An paghulagway han Biblia parte ha pagkaulo makikita ha Efeso 5:22-24: “An mga asawa magpasakop ha ira bana sugad han ira pagpasakop ha Ginoo, kay an bana amo an ulo han iya asawa sugad la nga an Kristo amo an ulo han kongregasyon . . . Ha pagkamatuod, sugad la nga an kongregasyon nagpapasakop ha Kristo, an mga asawa sadang liwat magpasakop ha ira bana ha ngatanan nga butang.” Sugad nga “ulo han iya asawa,” an bana an mangunguna ha pamilya, ngan an asawa masunod ha iya pagpanguna ngan marespeto ha iya pagkaulo.—Efeso 5:33.

An awtoridad han bana may limitasyon kay kinahanglan liwat hiya magpasakop ha Dios ngan ha Kristo. Waray hiya awtoridad nga sugoon an iya asawa nga talapason an mga balaud han Dios o ikompromiso an iya konsensya nga binansay ha Biblia. Pero bisan pa hini nga mga limitasyon, gintagan han Dios an bana hin responsabilidad nga maghimo hin importante nga mga desisyon para ha pamilya.—Roma 7:2; 1 Corinto 11:3.

An Biblia nagsusugo ha bana nga sugad nga ulo, dapat magin andam hiya magsakripisyo ngan unahon an kaopayan han iya asawa. An Efeso 5:25 nasiring: “Mga bana, padayon nga higugmaa an iyo asawa, sugad la nga hinigugma liwat han Kristo an kongregasyon ngan iginhatag an iya kalugaringon para hito.” An bana nga nasubad ha maopay gud nga ehemplo han Kristo ha pagpakita hin gugma diri makikalugaringon ha iya pagpanguna.

Dugang pa, an Biblia nagsusugo ha lalaki nga mag-ukoy kaupod an iya asawa “uyon ha kahibaro.” (1 Pedro 3:7) Nag-uupod ini diri la han basta paghibaro han pisikal ngan emosyonal nga kaibahan han lalaki ngan babaye. Dapat masabtan liwat han bana an mga panginahanglan han iya asawa.

“Hiya an Imo Padis”

An pagpasakop ba han asawa nagpapasabot nga diri gud hiya puydi magpahayag han iya panhunahuna ngan inaabat? Pansina hi Sarah, nga gin-uunabi ha Biblia sugad nga ehemplo han pagin masinugtanon ha iya bana nga hi Abraham. (1 Pedro 3:5, 6) Nagpasakop hiya kan Abraham ha dagku ngan gudti nga butang, tikang ha pagbaya ha komportable nga balay basi magburobalhin ngan umukoy ha mga tolda ngadto ha pag-andam hin pagkaon para ha diri ginlalaoman nga mga bisita. (Genesis 12:5-9; 18:6) Pero han may importante nga butang nga nakapabaraka ha iya, pauroutro nga ginpahayag niya an iya panhunahuna nga iba han kan Abraham. Nahitabo ini han karuyag ni Sarah nga paiwason ni Abraham ha ira panimalay an iya babaye nga hi Hagar ngan an iya suhag nga anak nga hi Ismael. Imbes nga sawayon hi Sarah, an Dios nagsiring kan Abraham nga ‘mamati kan Sarah.’ Pero hi Sarah padayon la gihapon nga nagpasakop kan Abraham pinaagi ha paghulat ha iya bana nga gumios imbes nga hiya mismo an magpaiwas kanda Hagar ngan Ismael.—Genesis 21:8-14.

An ehemplo ni Sarah nagpapakita nga imbes nga basta na la sumunod ha iya bana, an asawa may dungganon nga toka; “padis” hiya han iya bana. (Malakias 2:14) Sugad nga padis, naghahatag hiya hin mapulsanon nga mga suhestyon parte ha mga desisyon han pamilya ngan may awtoridad liwat hiya ha pamilya, kasagaran na ha pagpanginano han damu nga buruhaton ha balay ngan bisan han pipira nga pinansyal nga mga butang. Syempre, sugad nga ulo han pamilya, an bana an may responsabilidad ha paghimo han ultimo nga mga desisyon.—Proberbios 31:10-31; 1 Timoteo 5:14.

Respeto ha Maglalarang

Ginlarang ni Jehova nga Dios an lalaki ngan babaye, ngan ginhimo niya an pag-asawa sugad nga sagrado nga paghiusa nira nga duha. (Genesis 2:18-24) Naghatag liwat hiya hin espisipiko nga mga papel para ha bana ngan asawa nga makakapalipay gud ha ira.—Deuteronomio 24:5; Proberbios 5:18.

Tungod kay hi Jehova an nagpatikang han pag-asawa, may-ada hiya katungod ngan kapas ha paghimo hin mga suruklan para ha kahikayan han pag-asawa. An mga mag-asawa nga nagtutuman han ira tagsa nga papel ngan nagsusunod han kahikayan han Dios ha pagkaulo, diri la tungod kay praktikal ito pero tungod liwat kay ginrirespeto nira an awtoridad han Dios, nakakakarawat han iya pag-uyon ngan bulig.

NAHUNAHUNA MO BA?

◼ Hin-o an nagpakita han perpekto nga ehemplo han pagkaulo?—Efeso 5:25.

◼ May ginhatag ba an Dios nga limitasyon ha awtoridad han bana?—1 Corinto 11:3.

◼ Ano an katuyoan han pag-asawa ngan han kahikayan han pagkaulo?—Proberbios 5:18.

[Piktyur ha pahina 28]

Kon ginsusubad an ehemplo han Kristo han pagpakita han pagkaulo, nagigin malipayon ngan kontento an mag-asawa