HA ESTE nga pangpang han Motoyasu River ha Hiroshima City, Japan, may usa nga bilding nga nagpapabilin nga guba tikang pa han 1945. Kay ano nga bisan kon haros 70 ka tuig na an naglabay, waray pa gihapon ito ayda?

Inin tulo ka andana nga bilding nga hinimo ha briks natapos han 1915. Gin-gamit ini para ha mga eksibit basi mapauswag an komersyo. Pero nabag-o ito han Agosto 6, 1945, han alas–8:15 ha aga. Hito nga takna, an siyahan nga bomba atomika nga para ha girra bumuto ha syudad ha kahitas-on nga mga 1,800 piye ngan haros ha tungod mismo hito nga bilding. Namatay dayon an ngatanan nga nakadto ha sulod. Pero natindog pa gihapon an butnga nga istraktura han bilding.

Inin waray-ayda nga bilding “klaro ngan mapwersa nga simbolo han pinakanakakadaot nga pwersa nga ginhimo han tawo,” siring han usa nga artikulo han UNESCO. * Han 1996, ini nga bilding igindugang ha UNESCO World Heritage List sugad nga Hiroshima Peace Memorial.

Kondi makasurubo, ini nga kagubaan waray makapaundang han girra, nga an kasagaran nga hinungdan amo an kahakog, nasyonalismo, kapungot ha relihiyon, ngan tribo. Kon sugad, magpapadayon ba an mga girra?

Diri an baton han Biblia. ‘Napapaukoy han Dios an mga pag-away tubtob ha kataposan han tuna,’ siring han Salmo 46:9. ‘Iya nababari an pana, ngan nauutod an bangkaw: Ginsusunog niya an mga karomata ha kalayo.’ Sasaliwnan liwat han Dios an gobyerno han tawo han iya mismo gobyerno​—an Ginhadian han Dios ha pagmando ni Jesu-Kristo, nga ginpili nga “Hadi han mga hadi.”​—Pahayag 11:15; 19:16.

Hito nga panahon, diri na pagkikinahanglanon an mga hinumdoman han girra. “An una nga mga butang”​—mga kasubo ngan kasakit yana​—“diri na hinunumdoman, o diri na maabot ha panumdoman,” siring han Isaias 65:17.