AN BUAYA an may pinakamakusog nga kagat nga nasukol ha mga hayop nga nabubuhi yana. Pananglitan, an buaya ha dagat nga makikita hirani ha Australia, tulo ka pilo nga mas makusog kumagat kay ha leon o tigre. Bisan pa hito, sensitibo hinduro an panga han buaya—mas sensitibo pa ngani kay ha durho han tudlo han tawo. Pero paonan-o ito nagin sensitibo nga madakmol man ngan matig-a an panit han buaya?

An panga han buaya may yinukot nga mga sense organ. Katapos pag-adman ini, an parasaliksik nga hi Duncan Leitch nagsiring: “An kada nerve ending naagi ha usa nga buho han bagol-bagol.” Ini nga pagkadisenyo nagpuprotektar ha mga nerve fiber han panga ngan nagpapahinabo nga magin mas sensitibo an pipira nga bahin hito kay han masusukol han mga instrumento. Tungod hini, nahibabaroan han buaya kon an aada ha iya baba pagkaon o diri. Ini liwat an hinungdan nga bisan kon ginbabanga han iroy nga buaya an iya misa, diri niya ito ginkakaon. An panga han buaya urusahon gud nga kombinasyon han kusog ngan pagin sensitibo.

Ano ha imo panhunahuna? An panga ba han buaya produkto han ebolusyon, o may nagdisenyo hito?