Nakita Nira an Gugma nga May Buhat
HI Yomara ngan an iya mga bugto nga lalaki nga hira Marcelo ngan Hiver naukoy ha usa nga gutiay nga baryo ha Guatemala. Hi Yomara nagtikang pagpa-Bible study ha mga Saksi, ngan ha urhi nagpa-study liwat an iya mga bugto. Pero may problema. Buta hira nga tulo, ngan diri hira nakakabasa hin braille. Salit ginbabasa han brother nga nagba-Bible study ha ira an mga parapo ngan mga teksto ha leksyon.
Nakurian liwat hira nga makaatender ha mga katirok. Kon hira la, diri nira kaya an 40 minutos nga biyahe ngadto ha pinakahirani nga Kingdom Hall. Pero ginbuligan hira han kabugtoan ha kongregasyon nga makaatender ha tanan nga katirok. Ngan han nagtikang na hira magkaada bahin sugad nga mga estudyante ha katirok ha midweek, ginbuligan hira han kabugtoan nga mamemorya an ira presentasyon.
Han Mayo 2019, nagkaada na mga katirok ha ira baryo. Hito nga panahon, may binalhin na didto nga mag-asawa nga regular payunir. Diri hira maaram magbasa ngan magsurat hin braille, pero karuyag nira tutdoan inin tulo nga magburugto kon paonan-o ito bubuhaton. Salit kinadto hira ha librarya basi adman an sistema han braille ngan an mga pamaagi nga ginagamit ha pagtutdo hito.
Hi Marcelo nga nagkukomento ha katirok han kongregasyon
Paglabay hin pipira la ka bulan, maopay na magbasa hin braille inin tulo nga magburugto, ngan nakabulig ito ha ira nga mag-uswag pa ha espirituwal. a Mga regular payunir na yana hira Yomara, Marcelo, ngan Hiver. Ministeryal nga surugoon hi Marcelo. Busy gud hira ha espirituwal nga mga buruhaton ha bug-os nga semana. Nakakatapon an ira kadasig.
Mapasalamaton inin tulo nga magburugto ha mahigugmaon nga suporta han kongregasyon. “Tikang ha siyahan gud nga higayon nga nakilala namon an mga Saksi, iginpakita na nira ha amon an tinuod nga Kristiano nga gugma,” siring ni Yomara. “May-ada kami mag-opay gud nga kasangkayan ha amon kongregasyon, ngan api kami ha bug-os-kalibotan nga pamilya nga nagkakaurosa tungod han gugma,” siring naman ni Marcelo. Eksayted hi Yomara ngan an iya mga bugto ha pag-abot han adlaw nga makikita na nira nga magin paraiso an tuna.—Sal. 37:10, 11; Isa. 35:5.
a Usa nga brosyur nga may ulohan nga Learn to Read Braille an gindisenyo basi buligan an usa nga buta o may problema ha pagkita nga mahibaro pagbasa ngan pagsurat hin braille.
Bangin Maruyagan Mo Liwat
KON PAONAN-O GINAGAMIT AN IMO DONASYON
Mga Tuldok nga Nakakagbag-o han Kinabuhi
Labot la nga naghihimo kita hin mga publikasyon ha braille, nagtututdo liwat kita ha mga tawo kon paonan-o magbabasa hin braille.
