INABAT mo na ba nga kinahanglan mo atubangon an imo mga problema nga ikaw la? Nagkikinabuhi kita ha “peligroso nga mga panahon nga makuri pakiangayan,” tungod hito mahimo kita manluya ngan umabat nga nag-uusahan. (2 Tim. 3:1) Pero diri naton kinahanglan mag-usahan ha pag-atubang ha mga problema. Ginpapabug-atan han Biblia an pagkaimportante han pagkaada tinuod nga kasangkayan ha “mga panahon han kasakitan.”​—Prob. 17:17.

Nagpahimulos hi apostol Pablo ha iya pakigsangkay ha mga nakaupod niya ha pagbiyahe. (Col. 4:​7-11) Han priso hi Pablo ha Roma, ginbuligan hiya han iya mga sangkay nga himoon an mga buruhaton nga diri niya kaya. Pananglitan, gindad-an ni Epafrodito hi Pablo han iya mga ginkikinahanglan nga mga butang nga tikang ha kabugtoan ha Filipos. (Fil. 4:18) Gindul-ong naman ni Tiquico ha iba-iba nga kongregasyon an mga surat ni Pablo. (Col. 4:7; kitaa an study note.) Pinaagi ha suporta han kasangkayan ni Pablo, natuman niya an iya ministeryo bisan kon priso hiya ha balay o nag-uusahan la ha prisohan. Salit paonan-o ka magigin tinuod nga sangkay yana?

Iginpapakita han mga ehemplo ha moderno nga panahon an pagkaimportante han pagin tinuod nga sangkay. Pananglitan, iginsaysay ni Elisabet, usa nga regular payunir ha Spain, kon paonan-o hiya ginbuligan han usa nga sister ha makuri nga mga panahon. Han nadayagnos an iya nanay hin diri na matatambal nga kanser, nag-text an sister kan Elisabet hin damu nga makaparig-on nga mensahe nga basado ha Biblia. Hi Elisabet nagsiring: “Naparig-on ako hini nga mga mensahe nga maatubang an kada adlaw, nga diri naabat nga nag-uusahan la ako.”​—Prob. 18:24.

Mapaparig-on ta an aton pakigsangkay ha aton mga igkasi-tumuroo pinaagi ha pagbulig ha ira ha mga buruhaton ha kongregasyon. Pananglitan, puydi mo ba sundoon ngan updan an edaran nga bugto pagkadto ha katirok o paggawas ha ministeryo? Kon bubuhaton mo ito, posible gud nga maparig-on niyo an usa kag usa. (Roma 1:12) Pero an iba nga Kristiano diri nakakabaya ha ira balay tungod han ira kahimtang. Paonan-o kita magigin tinuod nga sangkay ha ira?

An iba naton nga igkasi-tumuroo may mga problema ha kahimsog o iba pa nga kahimtang salit diri hira nakakaatender hin in-person ha mga katirok. Pansina an ehemplo ni David nga nadayagnos nga may kanser nga lymphoma. Ha sulod hin sobra unom ka bulan nagpa-chemotherapy hiya. Samtang nagpapatambal hi David, naatender hira han iya asawa nga hi Lidia ha mga katirok pinaagi hin videoconference.

Ano nga bulig an ira nakarawat ha ira kasangkayan ha kongregasyon? Katapos han kada katirok, naniningkamot an iba ha Kingdom Hall nga makaistorya  hira David ngan Lidia pinaagi hin videoconference. Dugang pa, katapos han katirok kon nagkomento hira David ngan Lidia, nakakakarawat hira hin makaparig-on nga mga text tikang ha kabugtoan. Ano an resulta? Inabat nira David ngan Lidia nga may-ada hira kaupod.

Puydi ba naton iapi ha aton ministeryo adton aada na la ha ira balay? Pinaagi hin gudtiay nga mga pagbag-o, maipapakita naton nga diri naton nangangalimtan an may sugad nga mga limitasyon. (Prob. 3:27) Puydi kita maggahin hin panahon nga makaupod hira ha pag-letter writing o pagsangyaw pinaagi ha telepono. Adton mga aada na la ha ira balay puydi liwat makakonektar ha mga katirok ha pagsangyaw pinaagi hin videoconference. Naapresyar nira David ngan Lidia ini nga kahikayan. Hi David nagsaysay, “Nakakapadasig gud ha amon bisan kon madali la nga nakakaupod namon an kabugtoan ha halipot nga pakighisgot ngan pag-ampo.” Dugang pa, ha panapanahon kon igintutugot han kahimtang ngan talwas an pagbuhat hito, puydi mo iupod an imo Bible study ha magwarali nga aada na la ha ira balay basi didto mag-study.

Kon gin-uupdan naton an aton mga kabugtoan nga aada na la ha ira balay ngan nakikita mismo an ira makaruruyag nga mga kalidad, mas nagigin duok kita ha ira. Pananglitan, kon gin-aapi mo ha imo ministeryo an sugad nga mga magwarali ngan nakikita mo an ira paagi ha paggamit han Pulong han Dios basi maabot an kasingkasing han usa, posible gud nga magin mas duok ka pa ha ira. Kon bubuligan mo an imo mga igkasi-tumuroo ha espirituwal nga mga buruhaton, mas mapapadamu mo pa an imo mga sangkay.​—2 Cor. 6:13.

Naliaw hi Pablo han binisita ha iya an iya sangkay nga hi Tito. (2 Cor. 7:​5-7) Ini nga rekord nagpapahinumdom ha aton nga puydi naton maliaw an mga nanginginahanglan diri la ha pagpakita hin simpatiya pero pati liwat ha pag-upod ha ira ngan ha pagbuhat han aton kaya basi mabuligan hira.​—1 Juan 3:18.

Ginpakita han aton kabugtoan ha Russia an maopay nga ehemplo ha pagbinuligay. Pansina an eksperyensya nira Sergey ngan han iya asawa nga hi Tatyana. Katapos ig-raid han mga pulis an ira apartment, gindara hira ha estasyon han pulis basi imbistigaron. Hi Tatyana an ira una nga ginpauli. Hi Sergey nagsiring: “Pakauli gud la ni Tatyana, usa nga maisugon nga sister an binisita dayon ha iya. Waray pag-iha, damu liwat ha amon kasangkayan an binisita ngan binulig ha paglimpyo han amon apartment katapos han raid.”

Nagsiring pa hi Sergey: “Maiha ko na nga paborito an Proberbios 17:17 nga nasiring: ‘An tinuod nga sangkay nahigugma ha ngatanan nga panahon ngan usa nga bugto nga natawo para ha mga panahon han kasakitan.’ Hinin panahon han pagtimaraot, nagin mas tinuod ha akon ini nga mga pulong han waray ko na makaya an sitwasyon nga ako la. Gintagan ako ni Jehova hin maisugon nga kasangkayan nga binulig ha akon.” a

Maatubang kita hin mas damu pa nga makuri nga sitwasyon, salit kinahanglan naton an bulig han aton kasangkayan. Mas pagkikinahanglanon pa ngani naton hira ha daku nga kasakitan. Salit yana pa la maningkamot na kita nga magin tinuod nga sangkay!—1 Ped. 4:​7, 8.