AN Espanya usa nga nasud nga may makapainteres nga palibot ngan mga tawo. Kadak-an nga bahin han nasud an kaumhan hin trigo, ubas, ngan olibo. Ha Sur, mga 14 ka kilometro la hin tubig an nagbubulag han Espanya ha kontinente han Aprika.

Damu an binalhin nganhi hinin sur-weste nga bahin han Europa, upod na an mga Fenisiano, Griego, ngan Cartagano. Pag-abot han mga Romano han ikatulo ka siglo B.C.E., ira gintawag inin ira bag-o nga nasakop nga teritoryo nga Hispania. Katapos, gin-ukyan ito han mga Visigoth ngan mga Moor, nga nagbilin han ira kultura.

Hinin naglabay pa la nga tuig, sobra 68 ka milyon nga turista an binisita ha Espanya. Napakanhi an kadam-an tungod han mapaso nga klima, han baybayon, han  magpakaruruyag nga obra, han kasaysayan, ngan han arkitektura han nasud. Damu liwat nga turista an naruruyag han mga pagkaon ha Espanya. An komon nga pagkaon dinhi nag-uupod hin mga pagkaon nga tikang ha dagat, hamon, damu an sakot nga mga sura, ensalada, ngan utan nga may olive oil. An ira torta, paella, ngan tapa kilala ha bug-os nga kalibotan.

An mga Espanyol makisangkayon ngan makitawo. Kadam-an ha ira an nasiring nga Katoliko hira, kondi diri damu an nasingba. Hinin bag-o la nga mga tuig, may mga taga-Aprika, Asia, ngan Latin Amerika an bumalhin ha Espanya. Damu ha ira an naruruyag pag-inistorya han ira relihiyoso nga gintotoohan ngan kustomre. An mga Saksi ni Jehova nagkaada maopay nga pakig-istorya ha ira ngan nakabulig ha ira nga mahibaro han igintututdo han Biblia mahitungod ha iba-iba nga topiko.

Han 2015, sobra 10,500 nga mga Saksi an nagboluntaryo ha pagtukod o pag-renovate han 70 han ira lugar han pagsingba nga gintatawag nga Kingdom Hall. An iba nga bungto naghatag hin lote para ha pipira hito nga proyekto. Basi mabuligan an mga dayo, gindudumara han mga Saksi ni Jehova an ira mga katirok ha sobra 30 nga yinaknan, labot la han Espanyol. Han 2016, sobra 186,000 an tinambong han ira espesyal nga katirok ha paghinumdom han kamatayon ni Jesu-Kristo.