Pero may mga mag-asawa nga sayop an paggamit han teknolohiya, salit . . .

• nawawad-an hira hin panahon ha usa kag usa.

• nagtatrabaho la gihap hira bisan diri na kinahanglan.

• nagsususpetsa na hira o nagigin diri maunungon pa ngani ha usa kag usa.

PANAHON HA USA KAG USA

Hi Michael, nga usa nga bana, nasiring: “Usahay kon magkaupod kami han akon asawa, baga hin waray hiya dida. Busy hiya ha pagkinita ha iya celfon ngan nasiring, ‘Yana ko pa la ini nakaptan.’” An bana nga hi Jonathan nasiring nga ha sugad nga sitwasyon “an mag-asawa magkaupod pero baga hin aada ha magkaiba nga lugar.”

HUNAHUNAA INI: Ano kaagsob makaulang an tawag, text, o notification ha panahon nga angay ko unta ihatag ha akon padis?​—EFESO 5:33.

TRABAHO

May mga tawo nga kinahanglan bumaton ha mga tawag o email bisan gab-i na tungod han klase han ira trabaho. Pero an iba nga diri sugad hito an trabaho, kon aada ha balay nagamit la gihap hin daku nga panahon ha pagtrabaho. “Nakukurian ako nga diri kitaon an tagsa nga tawag o text may kalabotan ha trabaho ha panahon nga akon iginlain para makaupod an akon asawa,” siring han bana nga hi Lee. Hi Joy, nga usa nga asawa, nagsiring: “Ha balay ako nagtatrabaho, salit makuri mahibaroan kon san-o maundang pagtrabaho. Kinahanglan an paningkamot para magin balanse.”

HUNAHUNAA INI: Namamati ka ba hin maopay ha imo padis kon nakikiistorya hiya ha imo?​—LUCAS 8:18.

PAGKAMAUNUNGON

Nahibaroan ha usa nga surbey nga an pagsuspetsa ha mga iginpu-post han usa nga padis ha social media usa nga komon nga hinungdan han away han mag-asawa. Dyes porsyento han mga ginsurbey an nag-amin nga may-ada hira iginpu-post online nga diri nira karuyag mahibaroan han ira padis.

Salit damu an natoo nga an social media peligroso gud ha mga mag-asawa ngan mas ginpapasayon pa ngani hito an pag-adulteryo. Diri urusahon nga an mga abogado ha diborsyo nasiring nga daku an papel han social media ha pagbulag han damu nga mag-asawa yana.

HUNAHUNAA INI: Gintatago mo ba ha imo padis an imo pakigkomunikar ha usa nga diri mo kapariho an sekso?​—PROBERBIOS 4:23.

PAGHIMO HIN MGA PRAYORIDAD

An tawo nga diri nakaon diri magpapabilin nga mahimsog. Sugad man, an tawo nga diri nahatag hin panahon ha iya padis makukurian ha pagkaada maopay nga pag-asawa.​—Efeso 5:28, 29.

Ipakiistorya an mga suhestyon nga karuyag mo buhaton, o isurat an imo ideya kon paonan-o malilikyan nga makaulang an teknolohiya ha imo pag-asawa.

• Mangaon nga magkaupod bisan makausa la kada adlaw

• Magkaada panahon nga diri gamiton an amon mga gadyet

• Mag-eskedyol hin date o iba pa nga espesyal nga panahon nga magkaupod

• Parungon an amon mga gadyet ha gab-i, ngan ihirayo ito ha amon ginkakaturogan

• Maggahin hin 15 minutos kada adlaw ha pakiistorya ha usa kag usa nga waray mga gadyet nga makakadisturbo

• Ig-off an Internet ha espisipiko nga oras kada adlaw