Alayon sumati kami han imo naglabay.

Natawo ako han 1959 ha Fuzhou City, Jiangxi Province ha Tsina. Han otso anyos ako, naeksperyensyahan han amon nasud an epekto han tinatawag yana nga Kultural nga Rebolusyon. An akon tatay, nga usa nga inhinyero, ginsugo nga magtukod hin riles ha hirayo nga lugar. Ha sulod hin mga tuig, nabibisita la niya kami hin usa ka beses kada tuig. Hito nga panahon, titser ha elementarya hi Nanay, ngan naukoy kami ha eskwelahan mismo diin hiya nagtututdo. Han 1970, kinahanglan namon bumalhin ha Liufang, nga hito nga panahon usa nga pobre nga baryo ha Linchuan District, diin kulang an pagkaon.

Ano an gintotoohan han imo pamilya?

Diri interesado ha relihiyon o politika an akon tatay ngan Budhista an akon nanay. Ha eskwelahan, gintutdoan ako nga an kinabuhi nagtikang pinaagi hin natural nga proseso, ngan tinuod ako hito.

Kay ano nga nagin interesado ka ha matematika?

Interesado ako ha matematika tungod kay pinaagi ha lohikal nga pangatadongan an pagpamiling hito han kamatuoran. Han 1976, kamatay han lider han rebolusyon nga hi Mao Tse-tung, nag-eskwela ako ha unibersidad. Ginpili ko an matematika sugad nga major subject. Han nagkaada ako master’s degree, an akon siyahan nga trabaho amo an pag-analisar ngan pagsaliksik para han disenyo han mga nuclear reactor.

Ano an imo siyahan nga impresyon ha Biblia?

Han 1987, nag-eskwela ako ha Texas A&M University ha Estados Unidos basi magkaada doctorate degree. Maaram ako nga ha Amerika, damu an natoo ha Dios ngan nagbabasa han Biblia. Nabatian ko liwat nga damu an praktikal nga kinaadman ha Biblia, salit nahunahuna ko nga sadang ko ito basahon.

 Baga hin praktikal an katutdoan han Biblia. Kondi nakurian ako pagsabot ha iba nga bahin hito, salit inundang dayon ako pagbasa.

Paonan-o nahibalik an imo interes ha Biblia?

Han 1990, usa nga Saksi ni Jehova an binisita ha balay ngan iginpakita niya an ginsisiring han Biblia mahitungod ha maopay nga tidaraon para ha katawohan. Naghikay hiya nga bisitahon ako hin usa nga mag-asawa basi buligan ako nga masabtan an Biblia. Katapos, an akon asawa nga hi Liping, nga nagtutdo hin physics ha hayskul ha Tsina ngan ateyista liwat, nagtikang pag-aram han Biblia. Hinbaroan namon an ginsisiring han Biblia mahitungod ha gintikangan han kinabuhi. Bag-o gud ha akon an ideya nga may Maglalarang, salit personal nga nagsaliksik ako mahitungod hito.

Ano an imo ginhimo?

Sugad nga matematiko, nabansay ako pagkarkula kon mationan-o kaposible mahitatabo an usa nga butang. Dugang pa, hinbaroan ko nga basi umeksister an kinabuhi, kinahanglan may-ada na naeksister nga protina. Salit ginsarihan ko pagkarkula an posibilidad nga magkaada protina pinaagi hin waray klaro nga proseso. An mga protina usa han pinakakomplikado nga molekula, ngan an buhi nga mga selyula mahimo magkaada hin ginatos nga magkalain-lain nga klase hin protina nga nagios ha husto gud nga mga paagi. Nasayod ako, sugad liwat han hinbaroan han iba, nga an basta na la nga kaporma han usa nga protina imposible gud ngan diri gud mahitatabo! Waray pa gud ako nabasa ha teoriya han ebolusyon nga nakakombinse ha akon nga inin duro kakomplikado nga molekula makakaglarang han ira kalugaringon, asay pa ba han kinabuhi han tawo. Para ha akon, nagpapakita ini nga may Maglalarang.

Ano an nakakombinse ha imo nga an Biblia tikang ha Dios?

Samtang padayon nga gin-aadman ko an Biblia ha bulig han mga Saksi ni Jehova, hinbaroan ko nga nagsusulod ito hin damu nga detalyado nga mga tagna nga natutuman na. Naeksperyensyahan ko liwat an kapulsanan han pag-aplikar han mga prinsipyo ha Biblia. Nahunahuna ko, ‘Paonan-o nakagsurat an mga parasurat han Biblia hin maaramon nga mga pulong nga praktikal tubtob yana bisan kon nabuhi hira yinukot ka tuig na an naglabay?’ Hinay-hinay nga nasantop ko nga an Biblia Pulong han Dios.

Ano pa an nakakombinse ha imo nga may-ada Maglalarang?

Kon nahuhunahuna ko an damu nga elemento ha palibot, diri ko mapugngan nga tumoo nga may Maglalarang. Nagdidisenyo ako yana hin mga software han kompyuter, ngan agsob ako mahipausa ha pagin labaw han aton utok ha mga program han kompyuter. Pananglitan, an abilidad han aton utok nga makaintindi hin mga pulong urusahon gud. Kadam-an ha aton an masayon makasabot han aton nababatian bisan kon diri kompleto an ginyayakan, o may upod nga tawa, pag-ubo, o pag-utal-utal, pati na an karuyag ipasabot han tono, lanog han tingog, o aringasa ha palibot o ha telepono. Bangin hunahunaon mo nga ordinaryo la ini. Pero para ha mga software designer, urusahon gud ini. Bisan an pinakamaopay nga speech-recognition nga application diri gud makakatupong ha utok han tawo.

Diri pariho ha pinaka-high-tech nga kompyuter, an aton utok mahimo makasabot han emosyon ngan tono, ngan makakilala ha nagyayakan pinaagi han kalidad han ira tingog. Ginsasaliksik han mga software designer kon paonan-o masusubad han mga kompyuter ito nga abilidad han utok han tawo. Kombinsido ako nga pinaagi hito, ha pagkamatuod, ira naaadman an linarang han Dios.