AN PUNTO DE BISTA HAN BIBLIA
Mga Anghel
An mga anghel mababasa ha mga literatura ngan makikita ha mga retrato ngan pelikula. Pero ano an mga anghel, ngan ano an ira papel?
Ano an mga anghel?
AN GINSISIRING HAN BIBLIA
Antes larangon han Dios an uniberso ngan an siyahan nga tawo, ginlarang na niya an mas hitaas nga klase hin intelihente nga mga linarang. Mas gamhanan hira ha tawo, ngan naukoy hira kaupod han Dios ha lugar nga diri nakikita ngan diri nakakadtoan han tawo. (Job 38:4, 7) Gintatawag hira han Biblia nga mga espiritu ngan “mga anghel.”—Salmo 104:4, Baraan nga Biblia. *
Pira kadamu an mga anghel? Damu hinduro. An mga anghel ha palibot han trono han Dios “yinukot-yukot ka yinukot-yukot,” o “napuplo ka yinukot nga ginmultiplikar hin napuplo ka yinukot ka beses.” (Pahayag 5:11; footnote) Kon literal nga sasabuton ini, karuyag sidngon, ginatos ka milyon an mga anghel!
“Nakita ko . . . [an] damu nga anghel ha palibot han trono . . . , ngan an ira kadamu yinukot-yukot ka yinukot-yukot ngan yinukot ka yinukot.”—Pahayag 5:11.
Ano an mga ginbuhat han mga anghel ha kadaan nga panahon?
AN GINSISIRING HAN BIBLIA
An mga anghel kasagaran nga nag-aalagad sugad nga tagapagyakan o mensahero han Dios. * Iginhuhulagway liwat hira han Biblia sugad nga nagtutuman han milagroso nga mga buruhaton han Dios. Nagpadara an Dios hin anghel basi bendisyonan hi Abraham ngan pugngan hiya ha paghalad han iya anak nga hi Isaac. (Genesis 22:11-18) An usa nga anghel nagpakita kan Moises ha butnga han naglalaga nga kahoy-kahoy basi isumat an mensahe nga mahimo makagbag-o hin kinabuhi. (Eksodo 3:1, 2) Han ginlabog hi propeta Daniel ha lungib han mga leon, an “Dios nagpadara han iya angel, ngan nagguum han mga baba han mga leon.”—Daniel 6:22.
“An angel ni Jehova pinakita [kan Moises] ha laga nga kalayo tikang ha butnga han kasapinitan.”—Eksodo 3:2.
Ano an ginbubuhat yana han mga anghel?
AN GINSISIRING HAN BIBLIA
Diri naton mahibabaroan an ngatanan nga ginbubuhat yana han mga anghel. Kondi, iginpapakita han Biblia nga nakikigbahin hira ha pagbulig ha sinsero nga mga tawo nga mas mahibaro mahitungod ha Dios.—Buhat 8:26-35; 10:1-22; Pahayag 14:6, 7.
Ginpainop ni Jehova an patriarka nga hi Jacob hin mga anghel nga nagsasaka-lusad ha usa nga “hagdan” nga naabot ha langit tikang ha tuna. (Genesis 28:10-12) Tikang hito nga inop, bangin nahunahuna ni Jacob an posible liwat naton mahunahuna—nga nagpapadara hi Jehova nga Dios hin mga anghel nganhi ha tuna para hin mga misyon basi buligan an mga maunungon nga nanginginahanglan han Iya bulig.—Genesis 24:40; Eksodo 14:19; Salmos 34:7.
“Usa nga hagdan nga natindog ha tuna, ngan an katapusan hito naabut ha langit; ngan, kitaa, an mga angel han Dios nananaka ngan nanlulusad dida hito.”—Genesis 28:12.
^ par. 6 Iginpapakita han Biblia nga may mga espiritu nga nagrebelde ha Dios, ngan inin magraot nga anghel gintatawag nga “mga demonyo.”—Lucas 10:17-20.
^ par. 11 Ha pagkamatuod, an orihinal nga Hebreo ngan Griego nga mga pulong ha Biblia para ha “anghel” pariho nangangahulogan hin “mensahero.”
