1, 2. Ano an ginbuhat ni Jesus katapos niya isaurog an Paskua han 33 C.E. kaupod an iya matinumanon nga mga apostol?

NISAN 14 adto han tuig 33 C.E., ngan hilarom na an gab-i. Ginsaurog pa la ni Jesus ngan han iya pinakaduok nga kasangkayan an Paskua, nga nagpahinumdom ha ira kon paonan-o gintalwas han Dios an ira mga kaapoy-apoyan tikang ha pagkauripon ha Ehipto. Kondi labaw pa gud nga katalwasan an maieksperyensyahan han mga disipulo ni Jesus—an ‘pagtalwas ha kadayonan.’ Kinabuwasan, an ira waray-sala nga Lider papatayon han iya mga kaaway. Kondi inin maraot hinduro nga buhat magigin bendisyon. An paghalad ni Jesus han iya hingpit nga kinabuhi an magigin basihan han pagtalwas ha katawohan ha sala ngan kamatayon.—Heb. 9:12-14.

² Basi masiguro nga diri naton hingangalimtan inin mahigugmaon nga tagana, gintikangan ni Jesus an bag-o nga tinuig nga pagsaurog nga kasaliwan han Paskua. Ginbuhat niya ito pinaagi han pagtipik-tipik hin tinapay nga waray ipaturubo, ngan han iginpapasa niya ito ha tagsa han iya 11 nga matinumanon nga apostol, hiya nagsiring: “Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.” Nagpasa liwat hiya hin kopa nga may mapula nga bino ngan nagsiring: “Ini nga kopa nagsisimbolo han bag-o nga kasabotan nga ginhimo pinaagi han akon dugo nga igpapaagay para ha iyo.”—Luc. 22:19, 20.

3. (a) Ano nga daku nga pagbag-o an nahitabo katapos mamatay hi Jesus? (b) Ano nga mga pakiana an sadang naton hunahunaon may kalabotan ha pag-ampo ni Jesus nga nakarekord ha Juan kapitulo 17?

³ Hirani na matapos an daan nga Balaud nga kasabotan butnga han Dios ngan han nasud han Israel. Sasaliwnan ito han usa nga bag-o nga kasabotan butnga ni Jehova ngan han dinihogan nga mga sumurunod ni Jesus. Nababaraka gud hi Jesus ha kaopayan hinin bag-o nga espirituwal nga nasud. An mga Israelita diri nagkakaurosa ha ira pagsingba ha Dios, ngan nagpasipara ini ha ngaran han Dios. (Juan 7: 45-49; Buh. 23:6-9) Ha kabaliktaran, karuyag ni Jesus nga an iya mga sumurunod urosa nga magbuhat basi makaghatag hira hin kadayawan ha ngaran han Dios. Salit ano an ginbuhat ni Jesus? Nag-ampo hiya, ngan ito an pinakamaopay nga pag-ampo nga pribilehiyo gud nga mabasa han bisan hin-o. (Juan 17:1-26; kitaa an retrato ha tinikangan hini nga artikulo.) Samtang gin-uusisa naton ini nga pag-ampo, hunahunaon naton ini nga mga pakiana, “Ginbaton ba han Dios an pag-ampo ni Jesus? Nagios ba ako uyon hito?”

4, 5. (a) Ano nga leksyon an aton hibabaroan ha tinikangan han pag-ampo ni Jesus? (b) Paonan-o ginbaton ni Jehova an ginhangyo ni Jesus para ha iya kalugaringon?

⁴ Tubtob ha hilarom nga kagab-ihon, gintutdoan ni Jesus an iya mga disipulo hin damu nga importante nga butang mahitungod ha Dios. Katapos hinangad hiya ha langit ngan nag-ampo: “Amay, inabot na an oras; himayaa an imo anak, basi himayaon ka han imo anak, kay sugad la nga gintagan mo hiya hin awtoridad ha ngatanan nga tawo, mahatagan unta niya hin kinabuhi nga waray kataposan hira ngatanan . . . Ginhimaya ko ikaw ha tuna ngan gintapos ko an buruhaton nga imo iginsugo ha akon. Salit yana Amay, himayaa ako kaupod mo sugad han paghimaya mo ha akon han kaupod mo pa ako antes magtikang an kalibotan.”—Juan 17:1-5.

⁵ Tagda kon ano an prayoridad ni Jesus ha tinikangan han iya pag-ampo. An pinakaimportante ha iya amo an paghimaya ha iya langitnon nga Amay, ngan uyon ini ha siyahan nga hangyo nga gin-unabi ha iya modelo nga pag-ampo: “Amay, pagbaraanon an imo ngaran.” (Luc. 11:2) An sunod nga importante kan Jesus amo an iya mga disipulo, nga ‘mahatagan unta niya hira hin kinabuhi nga waray kataposan.’ Katapos hito, may ginhangyo hi Jesus para ha iya kalugaringon, nasiring: “Amay, himayaa ako kaupod mo sugad han paghimaya mo ha akon han kaupod mo pa ako antes magtikang an kalibotan.” Ginbalosan ni Jehova an Iya matinumanon nga Anak hin labaw pa kay han iya ginhangyo pinaagi ha paghatag kan Jesus hin “ngaran nga mas ekselente” kay han ngaran han ngatanan nga anghel.—Heb. 1:4.

6. Basi makarawat han mga apostol an kinabuhi nga waray kataposan, ano an kinahanglan nira buhaton? Kay ano nga masisiring naton nga naglampos hira ha pagbuhat hini?

⁶ Ha pag-ampo ni Jesus, iya liwat gin-unabi an kinahanglan naton buhaton basi makarawat an regalo nga kinabuhi nga waray kataposan. (Basaha an Juan 17:3.) Nagsiring hiya nga kinahanglan padayon nga ‘kilalahon’ naton an Dios ngan an Kristo. Paonan-o naton ini mahihimo? Siyahan, kinahanglan buhaton naton an ngatanan nga aton mahihimo basi mas mahibaro mahitungod kan Jehova ngan ha iya Anak. Ikaduha, kinahanglan iaplikar naton an aton hinbaroan. Ginbuhat na han mga apostol inin duha nga butang, kay hi Jesus nag-ampo: “Iginsumat ko ha ira an imo iginsumat ha akon. Ginkarawat nira ito.” (Juan 17:8) Kondi basi makarawat an kinabuhi nga waray kataposan, kinahanglan padayon nga pamalandungon nira an Pulong han Dios ngan iaplikar ito ha ira adlaw-adlaw nga pagkinabuhi. An matinumanon ba nga mga apostol naglampos ha pagbuhat hini tubtob nga natapos an ira kinabuhi dinhi ha tuna? Oo. Maaram kita hito kay an tagsa nira nga ngaran permanente nga nakasurat ha 12 nga bato nga pundasyon han Bag-o nga Jerusalem.—Pah. 21:14.

7. Ano an iginpapasabot han “pagkilala” ha Dios, ngan kay ano nga importante gud ito?

⁷ Kon karuyag naton mabuhi ha waray kataposan, kinahanglan padayon nga ‘kilalahon’ naton an Dios. Ano an iginpapasabot hini? Padayon nga nahibabaro kita hin dugang pa mahitungod ha iya. Kondi labaw pa an iginpapasabot hini kay han paghibaro han iya mga kalidad ngan katuyoan. Kinahanglan higugmaon gud  naton hiya ngan magin duok niya nga sangkay. Kinahanglan magpakita liwat kita hin gugma ha aton kabugtoan. An Biblia nasiring: “An diri nahigugma diri nakilala ha Dios, kay an Dios gugma.” (1 Juan 4:8) Salit an pagkilala ha Dios nag-uupod hin pagin masinugtanon ha iya. (Basaha an 1 Juan 2:3-5.) Daku gud nga pribilehiyo nga magin usa han mga nakilala kan Jehova! Kondi sugad han nahitabo kan Judas Iscariote, inin birilhon nga relasyon mahimo mawara. Salit pangalimbasogan naton nga matipigan ito. Kon bubuhaton naton ito, ihahatag ni Jehova ha aton an makaruruyag nga regalo nga kinabuhi nga waray kataposan.—Mat. 24:13.

8, 9. Ano an pinakaimportante kan Jesus durante han iya ministeryo ha tuna, ngan ano nga tradisyon an sigurado nga iya ginkangalasan?

⁸ Katapos basahon an pag-ampo ni Jesus nga nakarekord ha Juan kapitulo 17, may magruruhaduha ba nga hinigugma gud ni Jesus diri la an iya mga apostol nga kaupod niya hito nga panahon kondi an iya liwat magigin mga disipulo ha tidaraon? (Juan 17:20) Kondi diri an aton kaluwasan an pinakaimportante kan Jesus. An iya nangunguna nga katuyoan tikang ha tinikangan tubtob ha kataposan han iya ministeryo dinhi ha tuna amo an pagbaraan ngan paghimaya han ngaran han iya Amay. Pananglitan, han iginpahibaro ni Jesus didto ha sinagoga ha Nasaret an sugo ha iya, ini an iya ginbasa ha linukot nga basahon ni Isaias: “An espiritu ni Jehova aadi ha akon kay ginpili niya ako ha pagpasamwak han maopay nga sumat ha mga pobre.” Waray ruhaduha nga han ginbasa ini ni Jesus, iya ginluwas hin matin-aw an ngaran han Dios.—Luc. 4:16-21.

⁹ Sumala ha tradisyon han mga Judio, maiha na antes pa kumanhi hi Jesus ha tuna, gintutdoan han mga lider han relihiyon an mga tawo nga diri gamiton an ngaran han Dios. Makakasiguro kita nga nangalas gud hi Jesus hito nga diri-Kasuratanhon nga tradisyon. Hiya nagsiring ha mga nakontra ha iya: “Kinanhi ako ha ngaran han akon Amay, pero diri kamo natoo ha akon; kon may iba nga umabot ha iya kalugaringon nga ngaran, matoo kamo ha iya.” (Juan 5:43) Katapos, pipira ka adlaw antes mamatay hi Jesus, iya iginpahayag an pinakaimportante ha iya han hiya nag-ampo: “Amay, himayaa an imo ngaran.”  (Juan 12:28) Ngan ha bug-os nga pag-ampo ni Jesus nga ginhihisgotan naton yana, matin-aw liwat nga an pinakaimportante ha iya kinabuhi amo an paghimaya han ngaran han iya Amay.

10, 11. (a) Paonan-o iginpakilala ni Jesus an ngaran han iya Amay? (b) Kay ano nga iginpapasamwak han mga disipulo ni Jesus an ngaran ni Jehova?

¹⁰ Hi Jesus nag-ampo: “Iginpahayag ko an imo ngaran ha mga tawo nga iginhatag mo ha akon tikang ha kalibotan. Imo hira, ngan iginhatag mo hira ha akon, ngan gintutuman nira an imo pulong. Mabalik ako ha imo ngan babayaan ko na ini nga kalibotan, pero aanhi hira ha kalibotan. Baraan nga Amay, alayon panalipdi hira tungod han imo ngaran nga iginhatag mo ha akon, basi magin usa hira sugad nga kita uusa.”—Juan 17:6, 11.

¹¹ Han “iginpahayag,” o iginpakilala ni Jesus ha iya mga disipulo an ngaran han iya Amay, labaw pa an iya ginbuhat kay han pagluwas la hito nga ngaran. Ginbuligan liwat hira ni Jesus nga mahibaroan an ginrirepresentaran han ngaran han Dios, karuyag sidngon, an makaruruyag nga mga kalidad han Dios ngan an iya paagi han pagtratar ha aton. (Eks. 34:5-7) Dugang pa, tikang ha mahimayaon nga katungdanan ni Jesus ha langit, padayon nga ginbubuligan niya an iya mga disipulo ha pagpasamwak han ngaran ni Jehova ha bug-os nga tuna. Ano an katuyoan hito? Basi mas damu pa nga disipulo an matirok antes matapos inin maraot nga sistema. Ngan pag-abot hito nga panahon, tatalwason ni Jehova an iya maunungon nga mga saksi, ngan mahibabaroan han ngatanan an mahimayaon nga ngaran ni Jehova!—Esek. 36:23.

12. Ano an tulo nga kinahanglan naton buhaton basi maglampos ha aton buruhaton nga nagluluwas han kinabuhi?

¹² Han nakanhi ha tuna hi Jesus, nangalimbasog gud hiya pagbulig ha iya mga disipulo nga malamposan an ira mga kaluyahan. Ginkinahanglan nira ito basi matapos an buruhaton nga gintikangan ni Jesus. Hiya nag-ampo: “Sugad la nga ginsugo mo ako ha kalibotan, ginsugo ko liwat hira ha kalibotan.” Basi maglampos hira hini nga buruhaton nga nagluluwas han kinabuhi, ginpabug-atan ni Jesus an tulo nga kinahanglan nira buhaton. Siyahan, nag-ampo hiya nga an iya mga disipulo diri magin bahin han kalibotan ni Satanas. Ikaduha, nag-ampo hiya nga an iya mga disipulo magpabilin nga baraan pinaagi ha pag-aplikar han kamatuoran han Pulong han Dios. Ikatulo, naghangyo hi Jesus nga an iya mga disipulo magkaurosa, sugad la nga hiya ngan an iya Amay nagkakahiusa. Nagkikinahanglan ini hin pag-usisa ha kalugaringon. An tagsa ha aton kinahanglan magpakiana, ‘Nagios ba ako uyon ha tulo nga ginhangyo ni Jesus?’ Pinaagi ha pagbuhat hini nga mga butang, iginpahayag ni Jesus an iya pagsarig nga ‘matoo an kalibotan nga ginsugo mo ako.’—Basaha an Juan 17:15-21.

13. Paonan-o ginbaton an pag-ampo ni Jesus han siyahan nga siglo?

¹³ Makikita naton nga ginbaton an pag-ampo ni Jesus kon aton pag-aadman an libro han Mga Buhat. Hunahunaa an posibilidad nga magkabahin-bahin an siyahan nga mga Kristiano, nga ginkukompwesto han mga Judio ngan Hentil, riko ngan pobre, uripon ngan agaron. Kondi hira ngatanan nagkaurosa gud salit maipapariho hira ha iba-iba nga bahin han lawas han tawo nga hi Jesus an ira ulo. (Efe. 4:15, 16) Urusahon gud ito nga kalamposan dinhi hinin nagkakabahin-bahin nga kalibotan ni Satanas! Hi Jehova gud la an sadang kumarawat han ngatanan nga kadayawan, kay nagin posible ini pinaagi han iya gamhanan nga baraan nga espiritu.—1 Cor. 3:5-7.

14. Paonan-o ginbaton an pag-ampo ni Jesus ha aton panahon?

¹⁴ Makasurubo nga inin urusahon nga pagkaurosa waray magpadayon han namatay an mga apostol. Lugod, sugad han igintagna, nagkaada daku nga apostasya, nga nagresulta ha nagkakabahin-bahin nga mga sekta han Kakristianohan. (Buh. 20:29, 30) Kondi han 1919,  ginpagawas ni Jesus an iya dinihogan nga mga sumurunod tikang ha pagin uripon han buwa nga relihiyon ngan gintirok hira ha “hingpit nga bugkos han pagkaurosa.” (Col. 3:14) Ano an epekto han ira pagsangyaw nga buruhaton ha bug-os nga kalibotan? Sobra pito ka milyon nga “iba nga mga karnero” tikang ha “ngatanan nga nasud, tribo, katawohan, ngan pinulongan” an gintirok ngadto ha usa nga nagkakaurosa nga panon upod han mga dinihogan han Dios. (Juan 10:16; Pah. 7:9) Maopay gud ito nga baton ha pag-ampo ni Jesus nga “basi mahibaro an kalibotan nga ginsugo mo [Jehova] ako ngan hinigugma mo hira sugad la nga hinigugma mo ako”!—Juan 17:23.

15. Ano an espesyal nga ginhangyo ni Jesus para ha iya dinihogan nga mga disipulo?

¹⁵ Temprano ha gab-i han Nisan 14, ginpasidunggan ni Jesus an iya mga apostol pinaagi ha paghimo hin kasabotan ha ira nga magmamando hira upod niya ha iya Ginhadian. (Luc. 22:28-30; Juan 17:22) Salit may kalabotan ha ngatanan nga magigin dinihogan nga mga sumurunod ni Jesus, hiya nag-ampo: “Amay, karuyag ko nga kon hain ako, kaupod ko liwat hira nga iginhatag mo ha akon, basi makita nira an himaya nga iginhatag mo ha akon tungod kay hinigugma mo ako antes pa han tinikangan han kalibotan.” (Juan 17:24) An iba nga mga karnero ni Jesus nalilipay hini, diri naaawa, ngan dugang ini nga pamatuod nga nagkakaurosa gud an ngatanan nga tinuod nga Kristiano yana.

16, 17. (a) Ano nga determinasyon an iginpahayag ni Jesus ha konklusyon han iya pag-ampo? (b) Ano an sadang naton magin determinasyon?

¹⁶ Tungod han impluwensya han mga lider han relihiyon, ginpipili han kadam-an nga tawo ha kalibotan nga igbalewaray an matin-aw nga ebidensya nga hi Jehova may nagkakaurosa nga katawohan nga nakilala gud ha iya. Nahitabo liwat ito ha panahon ni Jesus. Salit gintapos niya an iya pag-ampo pinaagi hinin makaruruyag nga mga pulong: “Matadong nga Amay, diri gud nakilala ha imo an kalibotan, pero nakilala ako ha imo ngan maaram an mga disipulo nga ginsugo mo ako. Iginpakilala ko ha ira an imo ngaran ngan padayon nga igpapakilala ko ito, basi magpakita hira hin gugma sugad han paghigugma mo ha akon ngan basi magin kahiusa ako nira.”—Juan 17:25, 26.

¹⁷ May makakasiring ba nga hi Jesus waray gumios uyon ha iya pag-ampo? Sugad nga Ulo han kongregasyon, padayon nga ginbubuligan kita niya nga ipasamwak an ngaran ngan katuyoan han iya Amay. Hinaot padayon nga magpasakop kita ha iya pagkaulo pinaagi ha madasigon nga pagsunod ha iya sugo nga magsangyaw ngan maghimo hin mga disipulo. (Mat. 28:19, 20; Buh. 10:42) Hinaot mangalimbasog liwat kita nga tipigan an aton birilhon nga pagkaurosa. Ha pagbuhat hini, magios kita uyon ha pag-ampo ni Jesus, para ha himaya han ngaran ni Jehova ngan ha aton waray kataposan nga kalipay.