HI Jehova mahinatagon nga Dios. (San. 1:17) An iya mga linarang nagpapakita gud han iya pagin mahinatagon—tikang ha masirom nga kalangitan nga puno hin bitoon tubtob ha tuna nga may magkadurodilain nga tanom.—Sal. 65:12, 13; 147:7, 8; 148:3, 4.

Hilarom gud an apresasyon han salmista ha iya Maglalarang salit napagios hiya nga magkomposo hin kanta nga nagdadayaw han mga linarang ni Jehova. Basaha an Salmo 104, ngan sigurado nga aabaton mo an iya inabat. An salmista nagsiring: “Magkakanta ako ngadto kan Jehova samtang nga buhi pa ako: Magkakanta ako hin pagdayaw ngadto ha akon Dios samtang nga may-ada pa ako kinabuhi.” (Sal. 104:33) Ito ba liwat an imo inaabat?

Karuyag ni Jehova nga subaron naton an iya pagin mahinatagon. Naghahatag liwat hiya hin mag-opay nga rason kon kay ano nga sadang kita magin mahinatagon. Tagda an iya iginpasurat kan apostol Pablo: “Sagdoni an mga riko hini nga sistema nga diri magpahitaas, ngan diri sumarig ha waray-kasigurohan nga karikohan, kondi ha Dios, nga hura nga nagtatagana ha aton han ngatanan nga butang nga aton nalilipayan. Sidnga hira nga buhaton an maopay, magin hura ha mag-opay nga buhat, magin mahinatagon, ngan andam ha pagpaangbit, kay ha pagbuhat hito, nagtitirok hira hin bahandi para ha ira kalugaringon, usa nga maopay nga pundasyon para ha tidaraon, basi makaptan nira hin marig-on an totoo nga kinabuhi.”—1 Tim. 6:17-19.

Ha ikaduha nga surat ni apostol Pablo ha mga taga-Corinto, ginpabug-atan niya an husto nga disposisyon may kalabotan ha paghatag. “An kada tagsa maghatag uyon ha karuyag han iya kasingkasing, nga diri nagrireklamo o napipiritan, kay an Dios nahigugma ha malipayon nga nahatag.” (2 Cor. 9:7) Katapos, gin-unabi niya adton magpapahimulos ha pagin mahinatagon: an mga nakarawat nga natatagbaw han ira mga panginahanglan; ngan an mga nahatag nga hura nga ginbibendisyonan ha espirituwal.—2 Cor. 9:11-14.

Gintapos ni Pablo ini nga bahin han iya surat pinaagi ha pag-unabi han pinakamarig-on nga pamatuod han pagin mahinatagon han Dios. Hiya nagsiring: “Pasalamatan naton an Dios tungod han iya maopay gud nga regalo nga waray bayad.” (2 Cor. 9:15) Matin-aw nga ini nga regalo ni Jehova nag-uupod han ngatanan nga pagkamaopay nga iya iginpapakita ha iya katawohan pinaagi kan Jesu-Kristo. Presyoso gud ito, nga waray pulong nga makakaghulagway han bili hito.

Paonan-o naton maipapakita an aton apresasyon ha ngatanan nga ginbubuhat ni Jehova ngan han iya Anak ngan han ira pagbubuhaton pa para ha aton? Usa nga paagi an pagin andam ha paghatag han aton panahon, kusog, ngan mga panag-iya—gutiay man o daku—basi suportaran an tinuod nga pagsingba kan Jehova.—1 Kron. 22:14; 29:3-5; Luc. 21:1-4.