Nabasa mo ba hin maopay an bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

Kon umabot an kataposan, ano an pipira nga butang nga matatapos?

Matatapos an pakyas nga mga gobyerno han tawo, girra ngan kawaray-hustisya, mga relihiyon nga nagpapakyas ha Dios ngan ha mga tawo, ngan an diri-diosnon nga katawohan.—7/1, p. 3-5.

Hin-o an Gog han Magog nga gin-unabi ha libro han Esekiel?

Diri ito nagtutudlok kan Satanas kondi ha grupo han mga nasud nga mangangalimbasog pagpoo ha katawohan han Dios katapos magtikang an daku nga kasakitan.—5/15, p. 29-30.

Ano an unom nga butang nga makakabulig ha usa nga malagas nga malipayon?

An Biblia nagrirekomendar nga kinahanglan kita magin (1) mapainubsanon, (2) timbang, (3) positibo, (4) mahinatagon, (5) makisangkayon, ngan (6) mapasalamaton. Kon ipapakita ito nga mga kalidad, makakabulig ito ha usa nga malagas nga malipayon.—7/1, p. 10-12.

Paonan-o iginpakita ha mga milagro nga ginhimo ni Jesus an iya pagin mahinatagon?

Ha usa nga kasal ha Cana, ginhimo ni Jesus nga bino an mga 100 ka galon (380 L) nga tubig. Ha usa pa nga higayon, milagroso nga ginpakaon niya an sobra 5,000 nga tawo. (Mat. 14:14-21; Juan 2:6-11) Hito nga mga milagro, ginsubad niya an pagin mahinatagon han iya Amay.—6/15, p. 4-5.

Bisan kon diri kita perpekto, kay ano nga makakasiguro kita nga mahimo naton mapalipay an Dios?

Hira Job, Lot, ngan David nakasala. Pero karuyag nira nga mag-alagad ha Dios, nagbasol hira ngan nagbag-o. Gin-uyonan hira han Dios, salit mahimo liwat kita uyonan niya.—7/1-E, p. 12-13.

Mamamatay ba an ngatanan nga membro han buwa nga relihiyon kon bungkagon na an Babilonya nga Gamhanan?

Diri. Iginpapakita han Sakarias 13:4-6 nga an mga lider han relihiyon magpapakunokuno nga diri hira relihiyoso ngan magdidiwara nga nagin bahin hira han buwa nga relihiyon.—7/15, p. 15-16.

Kay ano nga nagsiring hi Barak nga makikig-away la hiya kon upod niya hi Debora?

Hi Barak may daku nga pagtoo. Imbes nga mangaro kan Jehova hin dugang nga armas, karuyag niya makaupod an representante han Dios, hi Debora, basi parig-unon hiya ngan an iya katawohan. (Huk. 4:6-8; 5:7)—8/1-E, p. 13.

Ano an pipira nga butang nga mahimo pamalandungon han usa nga Kristiano?

An pipira hito amo an mga linarang ni Jehova, an kapulsanan han iya giniyahan nga Pulong, an aton pribilehiyo nga pag-ampo, ngan an lukat nga iya mahigugmaon nga tagana para ha katawohan.—8/15, p. 10-13.

Kay ano nga an paglikay ha maraot nga mga kaupod aplikado liwat ha pakig-date?

Buotan kita ha mga diri-tumuroo. Pero sayop gud nga makig-date ha indibiduwal nga diri dedikado ngan diri matinumanon ha mga suruklan han Dios. (1 Cor. 15:33)—8/15, p. 25.

Kay ano nga nagluya an pagtoo ni Pedro, kondi paonan-o naibalik an iya marig-on nga pagtoo?

Tungod han pagtoo ni apostol Pedro, nakaglakat hiya ha bawbaw han tubig tipakadto kan Jesus. (Mat. 14:24-32) Kondi han nagkita hi Pedro ha subasko, nahadlok hiya. Katapos, nagpokus hiya utro kan Jesus ngan ginkarawat an Iya bulig.—9/15, p. 16-17.

An Buhat 28:4 nasiring nga an mga taga-Malta naghunahuna nga kriminal hi apostol Pablo. Kay ano?

Han ginkagat hi Pablo hin halas, posible nga sayop nga naghunahuna hira nga ginsirotan hiya ni Dike, an diosa han hustisya.—10/1-E, p. 9.

Ano nga leksyon an aton hibabaroan ha pagpaulang ni Marta ha damu nga buruhaton?

Makausa, naulang hi Marta tungod ha pagpinangandam hin damu nga pagkaon. Hi Jesus nagsiring nga ginpili han bugto ni Marta an mas maopay nga butang pinaagi ha pagpamati ha iya igintututdo. Kinahanglan likyan naton an diri ginkikinahanglan nga mga butang nga makaulang ha aton espirituwal nga mga buruhaton.—10/15, p. 18-20.