Gintatagad Kita han Dios nga Birilhon
Magin Duok ha Dios
Gintatagad Kita han Dios nga Birilhon
‘AN ATON kasingkasing mahimo maghukom ha aton.’ Pinaagi hito nga mga pulong ipinapakita han Biblia nga usahay an aton kasingkasing mahimo sobra nga magpakaraot ha aton. Oo, mahimo kita paabaton hito nga diri kita takos han gugma ngan pagtagad han Dios. Kondi ginpapasarig kita han Biblia: “An Dios daku pa ha aton kasingkasing, ngan maaram ha ngatanan nga mga bagay.” (1 Juan 3:19, 20) Mas kilala kita niya kay han aton pagkilala ha aton kalugaringon. An iya pagkilala ha aton bangin iba gud ha aton pagkilala ha aton kalugaringon. Kon sugad, ano an panhunahuna ha aton ni Jehova nga Dios—an usa nga importante gud an impresyon? An baton mabibilngan ha makapabantad nga ilustrasyon nga gin-gamit ni Jesus ha duha nga magkaiba nga okasyon.
Ha usa nga okasyon, hi Jesus nagsiring nga ‘iginbabaligya an duha nga tamsihay [maya] ha usa nga guti.’ (Mateo 10:29, 31) Sumala ha Lukas 12:6, 7, hiya liwat nagsiring: “Di ba an lima nga mga tamsihay iginbaligya [la] hin upat nga daku [“duha nga sinselyo,” NW]? Ngan bisan an usa ha ira waray hikalimti ha atubangan han Dios. . . . Ayaw kahadlok: kamo maromahal han damu nga mga tamsihay.” Inin simple kondi epektibo nga ilustrasyon nagtututdo kon paonan-o gintatagad ni Jehova an tagsa han iya magsiringba.
An maya usa han pinakabarato nga tamsi nga makaraon. Waray ruhaduha nga naobserbahan ni Jesus an kablas nga kababayin-an—posible nga bisan an iya iroy mismo—ha merkado nga namamalit hinin gudtiay nga tamsi basi may ipakaon ha ira pamilya. Ha usa nga asaryon, nga diri malima ka sentabo an kantidad yana, makakapalit na hin duha nga maya. Barato gud hinduro ini tungod kay ha duha nga sinselyo, diri la upat nga maya an mapapalit, kondi lima, nga an usa pasobra la.
Hi Jesus nagsiring nga waray maya an ‘nahingangalimtan han Dios’ o “nahuhulog ha tuna, nga waray hibaroi” han Amay. (Mateo 10:29) Nakikita ni Jehova an tagsa nga maya nga natugpa ha tuna, bangin tungod kay nasamaran ito o namimiling hin pagkaon. An baga hin waray bili nga tamsi diri minos kan Jehova tungod kay iya ginlarang ito ngan nahanunumdoman pa ngani. Ha pagkamatuod, iya ito ginpapabilhan tungod kay presyoso ito. Hinsasabtan mo ba an leksyon han ilustrasyon ni Jesus?
Kon nagtututdo hi Jesus, agsob hiya maghisgot han kaparihoan han mga butang. Naghihisgot hiya hin gudtiay nga leksyon katapos iya ipinapakita kon paonan-o naaplikar ito ha mas importante nga punto. Pananglitan, hiya liwat nagsiring: ‘An mga uwak diri nagtatanom bisan pagbari, waray hira buhos, bisan himosan; [kondi] an Dios nagtutubong ha ira. Mationan-o an iyo kamaromahal kay han katamsihan?’ (Lukas 12:24) Yana nagin matin-aw an karuyag sidngon ni Jesus mahitungod han mga maya: Kon ginpapabilhan ni Jehova inin gudtiay nga katamsihan, labaw pa gud nga iya papabilhan an mga tawo nga nahigugma ngan nagsisingba ha iya!
Iginpapasabot han mga pulong ni Jesus nga diri kita sadang maghunahuna nga diri gud kita takos han pagtagad ngan pagpaid han Dios nga “daku pa ha aton kasingkasing.” Diri ba nakakaliaw an paghibaro nga nakikita han aton Maglalarang an bangin diri naton nakikita ha aton kalugaringon?
[Ginkuhaan han Retrato ha pahina 9]
Mga maya: © ARCO/D. Usher/age fotostock