Subara an Ira Pagtoo

Nangalimbasog ha Paglampos han Kahadlok Ngan Pagruhaduha

HI Pedro nangusog ha pagbinugsay ngan namamalandong samtang nagkikinita ha hirayo ha kagab-ihon. An sidlit ba nga iya nakita ha este nga kasidsiran han langit tigaman nga hirani na an kaagahon? An iya kaunoran ha likod ngan sugbong maul-ol na tungod han maiha nga pagbinugsay. Nagtikakusog an hangin nga nahuyop ha iya buhok ngan nagin mabalud an Dagat han Galilea. Ha dulong han iya sakayan, napusak an mga balud ngan nahuhulos hiya. Kondi, nagpadayon hiya ha pagbugsay.

Han nakadto pa hi Pedro ngan an iya mga kaupod ha baybayon, ginbayaan nira hi Jesus nga nag-uusahan. Hito nga adlaw, nakita nira hi Jesus nga nagpakaon hin yinukot nga nagugutom nga katawohan pinaagi la hin pipira nga tinapay ngan isda. Tungod hito, nangalimbasog an mga tawo nga himoon hiya nga hadi, kondi diri niya karuyag magin bahin ha politika. Determinado liwat hiya nga buligan an iya mga sumurunod nga diri mag-ambisyon hin sugad. Basi malikyan an mga tawo, ginsugo niya an iya mga disipulo nga sumakay ha sakayan ngan kumadto ha kaluyo nga baybayon samtang nag-uusahan nga makadto hiya ha bukid basi mag-ampo.—Markos 6:35-45; Juan 6:14, 15.

An bulan nga haros kadayaw na, nakada na gud ha igbaw han kalangitan han sinakay an mga disipulo ha sakayan; kondi hito nga takna nagtikatunod na ito ha weste. Pero, waray pa hira makahirayo. An ira pangusog ha pagbinugsay ngan an aringasa han makusog nga hangin ngan balud, nagin hinungdan han ira diri paghibatiay. Ngan posible nga hilarom an ginhuhunahuna ni Pedro.

Damu gud an mahuhunahuna ni Pedro. Ha sulod han sobra duha ka tuig nga hiya nagsinunod kan Jesus nga taga-Nasaret, damu an nahitabo. Damu na an iya hinbaroan, kondi damu pa an iya mahibabaroan. An iya pagin andam ha pangalimbasog nga malamposan an mga ulang sugad han pagruhaduha ngan kahadlok, nakahimo ha iya nga susbaranan para ha aton. Paghisgotan naton ini.

“Amon Hin-agian an Mesias”!

Diri gud mahingangalimtan ni Pedro an adlaw nga iya nakilala hi Jesus. An iya bugto nga hi Andres an siyahan nga nagsumat ha iya han makaruruyag nga sumat: “Amon hin-agian an Mesias.” Pinaagi hito nga mga pulong, nagtikang magbag-o an kinabuhi ni Pedro.—Juan 1:41.

Hi Pedro naukoy ha Kapernaum, an syudad ha baybayon han danaw nga gintatawag nga Dagat han Galilea. Hiya ngan hi Andres ngan hira Jakobo ngan Juan, nga mga anak ni Sebedeo, magkaupod ha negosyo nga pangisda. An kaupod ni Pedro ha balay diri la an iya asawa kondi pati an iya ugangan ngan bugto nga hi Andres, ngan iya ginsusuportahan hira pinaagi ha pangisda nga nagkikinahanglan hin maduruto nga pagtrabaho, kusog, ngan abilidad. Mahahanduraw naton an mga gab-i han ira duro nga pangalimbasog—ira ginhuhulog an mga pukot ha butnga han duha nga sakayan ngan ginbubutong kon may nadakop na ito. Mahuhunahuna liwat naton an ira makapoy nga trabaho ha adlaw ha pagsiguro nga waray gisi ngan limpyo an mga pukot samtang ira ginkaklase-klase an mga isda ngan ginbabaligya ito.

An Biblia nasiring nga hi Andres disipulo ni Juan nga Parabawtismo. Sigurado nga interesado nga namati hi Pedro ha sumat han iya bugto mahitungod han mensahe ni Juan. Usa ka adlaw,  nakita ni Andres nga gintutudlok ni Juan hi Jesus ngan siniring: “Kitaa, an Karnero han Dios.” Hito mismo nga takna, hi Andres nagin sumurunod ni Jesus ngan nagsumat dayon kan Pedro hinin makalilipay nga sumat: Inabot na an Mesias! (Juan 1:35-40) Katapos han pagrebelde ha Eden mga 4,000 ka tuig na an naglabay, nagsaad hi Jehova nga Dios nga may espesyal nga indibiduwal nga maabot ha pagtagana hin tinuod nga paglaom ha katawohan. (Genesis 3:15) Nakilala ni Andres ini nga Paratalwas, an Mesias mismo! Ngan nag-apura liwat hi Pedro ha pagkilala kan Jesus.

Tubtob hito nga adlaw, kilala hi Pedro ha ngaran nga Simon. Kondi, hi Jesus siniring: “Ikaw hi Simon, nga anak ni Juan; ikaw pagngangaranan nga hi Kepas (nga kon hubaron, hi Pedro).” (Juan 1:42) An “Kepas” komon nga pronombre nga nangangahulogan hin “bato.” Matin-aw nga matagnaon an mga pulong ni Jesus. Maaram hiya nga hi Pedro magigin sugad hin bato—diri nagbuburubag-o, marig-on, ngan masasarigan nga impluwensya ha iya mga sumurunod. Ito ba liwat an pagkilala ni Pedro ha iya kalugaringon? Baga hin diri. Bisan an pipira nga magbarasa han Ebanghelyo yana naghuhunahuna nga gutiay la an iya kalidad nga pariho han kalidad han bato. An iba nasiring nga hiya pabag-o-bag-o ngan diri marig-on.

May-ada mga kaluyahan hi Pedro. Ngan maaram hito hi Jesus. Kondi pariho ha iya Amay nga hi Jehova, pirme maopay an iya ginkikita ha mga tawo. Nakita niya an damu nga kaopayan kan Pedro ngan nangalimbasog hiya nga buligan hi Pedro nga makultibar ito. Ginkikita liwat ni Jehova ngan ni Jesus yana an mag-opay ha aton. Bangin makurian kita ha pagtoo nga may-ada damu nga maopay ha aton nga ira makikita. Kondi, kinahanglan sumarig kita ha ira ngan pamatud-an nga andam nga mabansay ngan mamolde pariho kan Pedro.—1 Juan 3:19, 20.

“Ayaw Kahadlok”

Posible nga inupod hi Pedro kan Jesus ha sunod nga lugar nga iya ginsangyawan. Salit, bangin nakita niya an siyahan nga milagro nga ginbuhat ni Jesus, an paghimo han tubig nga alaksiw ha kasal ha Kana. Labaw ha ngatanan, nabatian niya an urusahon ngan puno hin paglaom nga mensahe ni Jesus mahitungod han Ginhadian han Dios. Bisan pa hito, binaya hiya ngan binalik ha iya negosyo. Kondi, paglabay hin pipira ka bulan, nagkita utro hi Pedro ngan hi Jesus, ngan hini nga takna ginhangyo hiya ni Jesus nga magin bug-os panahon nga sumurunod.

Tikang pa la hi Pedro ha nakakapanluya nga trabaho ha naglabay nga gab-i. Pauroutro nga ginhuhulog han mga parapangisda an ira mga pukot, kondi waray hira nadakop. Sigurado nga gin-gamit ni Pedro an iya mga eksperyensya ngan abilidad, nangalimbasog pa ngani hiya ha pagsari ha iba-iba nga dapit ha danaw diin posible nangangaon an mga isda. Waray ruhaduha, pariho ha damu nga parapangisda, may mga takna nga naghingyap hiya nga makita an ilarom han masirom nga tubig basi hibaroan kon hain an mga isda o mapasulod ito ha iya pukot. Syempre, an sugad nga panhunahuna nakadugang la han iya panluya. Diri la pahalibway para ha iya an pangisda; may-ada mga nadepende han iya mga dakop. Ha kataposan, binalik hiya nga waray dakop. Bisan pa hito, kinahanglan limpyohan an mga pukot. Salit, sagipo hiya han dinaop hi Jesus.

Napapalibotan hi Jesus han mga tawo nga atentibo nga namamati ha iya. Tungod hito, sinakay hiya ha sakayan ni Pedro ngan naghangyo nga magpahirayo hin gutiay tikang ha baybayon. Han matin-aw na nga hinbabatian an iya tingog, nagtutdo hiya. Atentibo nga namati hi Pedro, pati an mga tawo ha baybayon. Waray gud hiya mauyam ha pagpinamati samtang iginsasaysay ni Jesus an nangunguna nga tema han iya pagsangyaw—an Ginhadian han Dios. Daku gud nga pribilehiyo an pagbulig kan Kristo ha pagpasamwak hini nga  mensahe han paglaom ha iba-iba nga lugar! Kondi praktikal ba ito? Paonan-o nira masusuportahan an ira kalugaringon? Bangin naghunahuna utro hi Pedro han naglabay pa la nga hilawig nga gab-i diin waray hira nadakop.—Lukas 5:1-3.

Katapos magtutdo ni Jesus, iya ginsidngan hi Pedro: “Pakadto ha kahiladman, ngan bitara an iyo mga pukot.” Nagruhaduha gud hi Pedro. Hiya nagsiring: “Magturutdo, ha bug-os nga gab-i kami nagkabudlay, ngan waray pakadakop; kondi ha imo pulong akon tutunuron an mga pukot.” Sigurado nga diri na gud karuyag ni Pedro nga itunod na liwat an mga pukot—labi na hito nga takna nga posible nga diri na ngani panahon han pangaon han isda. Bisan pa hito, sinugot hiya, posible nga iya ginsinyasan an iya mga kaupod ha ikaduha nga sakayan nga itunod liwat an pukot.—Lukas 5:4, 5.

Inabat ni Pedro an diri ginlalaoman nga kabug-at samtang iya ginbubutong an pukot. Waray hiya makatoo, kondi nangusog ha pagbutong, ngan waray pag-iha nakita niya an damu hinduro nga nagkikisikisi nga isda ha pukot! Natarantar nga ginsinyasan niya an iya mga kaupod ha ikaduha nga sakayan nga bumulig. Han binulig hira, hinbaroan nira nga diri makakarga han usa la nga sakayan an ira dakop. Ginpuno nira an duha nga sakayan, kondi damu pa an nahibilin ngan an mga sakayan nagtikang lumunod. Nahipausa gud hi Pedro. Nakita na niya an gahum ni Kristo, kondi hini nga takna, para ha iya ngan ha iya pamilya an kapulsanan hito! Napasulod pa ngani ni Jesus an mga isda ha mga pukot! Nahadlok hi Pedro. Linuhod hiya ngan nagsiring: “Pahirayo dinhi ha akon, Ginoo; kay ako makasasala nga tawo.” Takos gud ba hiya makig-upod ha Usa nga may-ada awtoridad ha paggamit han gahum han Dios ha sugad nga mga paagi?—Lukas 5:6-9.

Mapinairon nga nagsiring hi Jesus: “Ayaw kahadlok; tikang niyan makapangisda ka hin mga tawo.” (Lukas 5:10, 11) Diri ini panahon nga magruhaduha o mahadlok. An pagruhaduha ni Pedro may kalabotan ha praktikal nga mga butang sugad han pangisda waray basihan sugad la nga waray rason an iya kahadlok mahitungod han iya kapakyasan ngan kaluyahan. Hi Jehova an Dios nga ‘nagpapasaylo hin damu gud.’ (Isaias 55:7) Hi Jesus may-ada daku nga buruhaton nga makakaapekto ha katawohan. Magtatagana hi Jehova han ira panginahanglan ha pisikal ngan espirituwal.—Mateo 6:33.

Sinunod dayon hi Pedro, pariho kanda Jakobo ngan Juan. ‘Han pakasaog nira han mga sakayan ha tuna, ginbayaan nira an ngatanan ngan nagsunod ha iya.’ (Lukas 5:11) Nagkaada pagtoo hi Pedro kan Jesus ngan ha Usa nga nagsugo hito. Ito an gimaopayi nga desisyon nga iya nahimo. An mga Kristiano yana nga nangangalimbasog paglampos  han ira pagruhaduha ngan kahadlok ha pag-alagad ha Dios nagpapakita liwat hin pagtoo. Diri gud kawang an sugad nga pagsarig kan Jehova.—Salmo 22:4, 5.

“Kay Ano an Imo Pagruhaduha?”

Mga duha ka tuig katapos makilala ni Pedro hi Jesus, nagbinugsay hiya ha mahangin nga kagab-ihon ha Dagat han Galilea nga gin-unabi ha tinikangan. Syempre, diri naton mahibabaroan an iya ginhuhunahuna. Damu an posible niya hunahunaon! Pananglitan, gintambal ni Jesus an iya ugangan. Nagpahayag hi Jesus han Sermon ha Bukid. Pauroutro nga iginpakita niya nga hiya an Pinili nga Usa ni Jehova, an Mesias, pinaagi han iya katutdoan ngan mga milagro. Paglabay hin mga bulan, sigurado nga naibanan an kaluyahan ni Pedro sugad han iya tendensya nga mahadlok ngan magruhaduha. Ginpili pa ngani hiya ni Jesus nga magin usa han 12 nga apostol! Bisan pa hito, kinahanglan pa gihapon hiya mangalimbasog nga malamposan an iya kahadlok ngan pagruhaduha.

Han hirani na sumirang an adlaw, tigda nga inundang hi Pedro ha pagbinugsay ngan liningkod. Didto ha butnga han mga balud, may-ada nagkikiwa! Sanag ba ito han kahayag han bulan ha mga balud? Diri, diri nag-iiba-iba an posisyon hito. Usa ito nga tawo! Oo, usa nga tawo, ngan naglalakat ito ha bawbaw han dagat! Samtang nagtitikahirani ito, baga hin tidaop ito ha ira. Tungod han kahadlok, naghunahuna an mga disipulo nga usa ito nga klase hin aparisyon. An tawo nagsiring: “Maglipay kamo: ini amo hi ako, ayaw kamo pagkahadlok.” An tawo amo hi Jesus!—Mateo 14:25-28.

Hi Pedro siniring: “Ginoo, kon hi ikaw, tuguti ako pagkadto ha imo ha bawbaw han tubig.” Ha tinikangan, nagpakita hiya hin kaisog. Tungod han kalipay hinin naiiba nga milagro, karuyag niya mapamatud-an pa gud an iya pagtoo. Karuyag niya magin bahin hito. Mahigugmaon nga gintawag hiya ni Jesus. Salit, sinaklang hiya ha ligid han sakayan ngan linusad ngadto ha bawbaw han dagat. Handurawa an inabat ni Pedro samtang naaabat niya nga may-ada hiya marig-on nga natatamakan ngan nakakatukdaw ha bawbaw han tubig. Sigurado nga nahipausa hiya samtang nalakat hiya pahirani kan Jesus. Kondi, tigda nga nagbag-o an iya disposisyon.—Mateo 14:29.

Kinahanglan isentro ni Pedro an iya atensyon kan Jesus. Tungod kay ginpapahinabo ni Jesus, pinaagi han gahum ni Jehova, nga makalakat hi Pedro ha bawbaw han tubig. Ngan nabubuhat ito ni Jesus tungod han pagtoo ni Pedro ha iya. Kondi waray maisentro ni Pedro an iya atensyon. Aton mababasa: “Han iya pagkita han hangin, hiya nahadlok.” Nagkinita hiya han mga balud nga napusak ha sakayan, natapsik tungod han hangin, ngan hiya natarantar. Bangin nahanduraw niya  an iya kalugaringon nga nalulunod dida hito nga danaw. Samtang napupuno hiya hin kahadlok, nawawara an iya pagtoo. Bisan kon hi Pedro ginngaranan nga Bato tungod han posibilidad han iya pagin marig-on, nagtikang hiya lumunod pariho hin bato tungod han iya maluya nga pagtoo. Maopay hiya lumangoy, kondi hito nga takna waray hiya sumarig ha iya abilidad. Hiya nagsinggit: “Ginoo, luwasa ako.” Ginkaptan hiya ni Jesus ngan ginbutong. Katapos, samtang nakada ha bawbaw han tubig, ginpabug-atan ni Jesus kan Pedro inin importante nga leksyon: “Tawo nga gutiay an pagtoo, kay ano an imo pagruhaduha?”—Mateo 14:30, 31.

“Pagruhaduha”—haom gud ito nga pulong! An pagruhaduha mahimo magin mapwersa nga ulang nga nagkukuha han atensyon ha importante nga butang. Kon magpaapekto kita hito, mahimo madaot an aton pagtoo ngan relasyon ha Dios. Kinahanglan mangalimbasog gud kita ha pag-ato hito! Paonan-o? Pinaagi ha pagtipig han atensyon ha husto nga mga butang. Kon pirme naton huhunahunaon an mga butang nga aton nahahadlokan, nakakapanluya, ngan nakakaulang ha aton tikang kan Jehova ngan han iya Anak, magtutubo an pagruhaduha. Kon isentro naton an atensyon kan Jehova ngan ha iya Anak, ha ira ginbuhat, ginbubuhat, ngan pagbubuhaton para ha mga nahigugma ha ira, malalamposan gud naton an nakakadaot nga pagruhaduha.

Samtang nasunod hi Pedro kan Jesus pagsakay ha sakayan, naobserbahan niya nga nagtikawara an makusog nga hangin. Nagin kalmado an Dagat han Galilea. Upod han iya igkasi-disipulo, hi Pedro nagsiring: “Ha kamatuoran, ikaw an Anak han Dios.” (Mateo 14:33) Samtang an kahayag han kaagahon nasanag ha danaw, sigurado nga nagin mapasalamaton gud hi Pedro. Hinbaroan niya nga diri niya sadang tugotan an kahadlok nga magin hinungdan ha pagruhaduha kan Jehova ngan kan Jesus. Oo, damu pa an iya kinahanglan bag-ohon antes hiya magin an Kristiano nga may-ada sugad bato nga mga kalidad nga igintagna ni Jesus. Kondi determinado hiya nga padayon nga mangalimbasog, padayon nga mag-uswag. May-ada ka ba liwat han sugad nga determinasyon? Sigurado nga nasantop mo nga an pagtoo ni Pedro angay gud subaron.

[Retrato ha pahina 22, 23]

Nakita ni Jesus an damu nga mag-opay nga kalidad hinin mapainubsanon nga parapangisda

[Retrato ha pahina 23]

“Ako makasasala nga tawo”

[Retrato ha pahina 24]

“Han iya pagkita han hangin, hiya nahadlok”