Kay Ano nga Importante an Eden ha Imo?

URUSAHON nga iginpipirit han pipira nga eskolar nga an asoy mahitungod han Eden diri sinusuportahan han iba nga bahin han Biblia. Pananglitan, an propesor ha Religious Studies nga hi Paul Morris nagsurat: “Waray na hisguti han iba nga bahin han Biblia an Eden.” Bisan kon nauyon ha iya an iba nga “eksperto,” kabaliktaran ito ha kamatuoran.

Ha pagkamatuod, damu an mababasa ha Biblia mahitungod han hardin han Eden, kanda Adan ngan Eva, ngan han halas. * Kondi an sayop han pipira nga eskolar gutiay la hinduro kon itanding ha kadaot nga nahimo hito. Tungod kay ginpapagawas han mga lider han relihiyon ngan mga kritiko nga diri masasarigan an asoy han Genesis mahitungod ha hardin han Eden, sugad hin iginpapakita nira nga diri masasarigan an bug-os nga Biblia. Ha ano nga paagi?

Basi masabtan an iba nga bahin han Biblia, importante nga masabtan an nahitabo ha Eden. Pananglitan, an Pulong han Dios gindisenyo basi buligan kita nga mabaton an pinakaimportante nga mga pakiana han tawo. An baton han Biblia hito nga mga pakiana agsob nga may koneksyon ha nahitabo ha Eden. Tagda an pipira hini.

● Kay ano nga kita nalalagas ngan namamatay? Hira Adan ngan Eva mabubuhi ha waray kataposan kon padayon hira nga magpapasakop kan Jehova. Mamamatay la hira kon magrebelde hira. Salit han adlaw nga nagrebelde hira, nagtikang hira malagas ngan mamatay. (Genesis 2:16, 17; 3:19) Nawara nira an kahingpitan, ngan an sala ngan an pagkadiri-hingpit na la an naipapasa ha ira mga anak. Ini an siring han Biblia: “Tungod ha usa ka tawo, sinulod an sala ha kalibotan, ngan tungod ha sala an kamatayon; ngan sugad man an kamatayon inagi ha ngatanan nga katawohan, kay an ngatanan nakasala.”—Roma 5:12.

● Kay ano nga gintutugotan han Dios an karaotan? Ha Eden, gintawag ni Satanas an Dios nga buwaon nga may maopay nga butang nga diri iginhahatag ha Iya mga linarang. (Genesis 3:3-5) Hito nga paagi, iya ginkwestyon an katungod ni Jehova ha pagmando. Ginpili nira Adan ngan Eva nga sundon hi Satanas, salit  ginsalikway liwat nira an pagmando ni Jehova, nga baga hin nasiring nga an tawo makakagdesisyon para ha ira kalugaringon kon ano an maopay ngan maraot. Tungod kay hingpit an hustisya ngan kinaadman ni Jehova, maaram Hiya nga usa la an paagi basi husto nga mabaton an akusasyon—palabyon an panahon basi tagan hin higayon an mga tawo nga mandoan an ira kalugaringon sugad han ira karuyag. An karaotan nga resulta hito, ha bahin tungod han padayon nga impluwensya ni Satanas ngan hinay-hinay nga nagbubuhayhag hini nga kamatuoran: An tawo waray kapas ha pagmando ha iya kalugaringon kon waray an Dios.—Jeremias 10:23.

● Ano an katuyoan han Dios para ha tuna? Ha hardin han Eden, iginpakita ni Jehova an suruklan han kahusay han tuna. Iya ginsugo hira Adan ngan Eva nga pun-on an tuna hin mga anak ngan ‘pagtag-iyahon ito,’ basi an bug-os nga tuna magin sugad kahusay han hardin han Eden. (Genesis 1:28) Salit, katuyoan han Dios nga magin paraiso ito nga uukyan han hingpit ngan nagkakaurosa nga pamilya han mga anak nira Adan ngan Eva. An kadak-an nga bahin han Biblia naghihisgot han paagi han Dios ha pagtuman han iya orihinal nga katuyoan.

● Kay ano nga kinanhi hi Jesu-Kristo ha tuna? An pagrebelde ha Eden nagresulta hin kamatayon nira Adan ngan Eva ngan han ira mga anak, kondi an Dios mahigugmaon nga nagtagana hin paglaom. Iya ginsugo an iya Anak nganhi ha tuna basi itagana an gintatawag han Biblia nga lukat. (Mateo 20:28) Ano an karuyag sidngon hito? Hi Jesus “an kataposan nga Adan;” nabuhat niya an waray mabuhat ni Adan. Natipigan niya an hingpit nga kinabuhi sugad nga tawo pinaagi ha pagpabilin nga matinumanon kan Jehova. Katapos, kinaburut-on nga iginhatag niya an iya kinabuhi sugad nga halad, o lukat, basi an tanan nga magtinumanon mapasaylo ha ira mga sala ngan ha urhi magkaada kinabuhi pariho han napahimulosan nira Adan ngan Eva antes hira makasala. (1 Korinto 15:22, 45; Juan 3:16) Salit, gin-garantiyahan ni Jesus nga matutuman gud an katuyoan ni Jehova nga an tuna magin paraiso sugad ha hardin han Eden. *

An katuyoan han Dios matin-aw, ngan diri ito imahinasyon la. Tinuod ito. Sugad la nga tinuod nga lugar an hardin han Eden nga may tinuod nga mga hayop ngan mga tawo, tinuod liwat an saad han Dios para ha tidaraon, ngan matutuman gud ito ha diri na maiha. Makakapahimulos ka ba hito? Nadepende ito ha imo. Karuyag han Dios nga damu unta an makapahimulos hito, bisan adton waray magkinabuhi uyon ha Iya suruklan.—1 Timoteo 2:3, 4.

Han hirani na mamatay hi Jesus, nakiistorya hiya ha usa nga makasasala. Ito nga tawo usa nga kriminal; ngan maaram ito nga takos hiya mamatay. Kondi, kinuha hiya kan Jesus hin pagliaw ngan paglaom. Ano an siring ni Jesus? “Mabunyog ka ha akon ngadto ha Paraiso.” (Lukas 23:43) Kon karuyag ni Jesus makita didto ito nga kriminal—binanhaw ngan may higayon nga mabuhi ha waray kataposan ha paraiso nga pariho han Eden—diri ba sugad liwat hito an iya karuyag para ha imo? Syempre! Ngan ito liwat an karuyag han iya Amay. Salit kon karuyag mo an sugad nga tidaraon, buhata an ngatanan basi makilala an Dios nga naghimo han hardin han Eden.

[Mga footnote]

 [Kahon/Mga Retrato ha pahina 10]

AN TAGNA NGA NAGBUBUGKOS HAN BUG-OS NGA BIBLIA

“Igbubutang ko in away ha butnga nimo [an halas] ngan han babaye, ngan ha butnga han imo katulinan [“binhi,” NW] ngan han iya katulinan [“binhi,” NW]: ngan ini magtutultog han imo ulo, ngan hi ikaw magtutultog han iya tikod.”—Genesis 3:15.

Ito an siyahan nga tagna ha Biblia nga ginyakan han Dios ha Eden. Hin-o an upat nga bahin hito nga tagna: an babaye, an iya binhi, an halas, ngan an binhi hito? Paonan-o hira nagkaada “away”?

AN HALAS

Hi Satanas nga Yawa.—Pahayag 12:9.

AN BABAYE

An organisasyon ni Jehova han iya mga linarang ha langit. (Galasia 4:26, 27) Igintagna ni Isaias nga an “babaye” manganganak hin usa nga espirituwal nga nasud.—Isaias 54:1, Maopay nga Sumat; Isaias 66:8.

AN BINHI HAN HALAS

Adton nagbubuhat han kaburut-on ni Satanas.—Juan 8:44.

AN BINHI HAN BABAYE

An siyahan nga gintutudlok hini amo hi Jesu-Kristo, nga tikang ha organisasyon ni Jehova ha langit. Bahin liwat hini nga “binhi” an espirituwal nga kabugtoan ni Kristo nga magmamando ha langit kaupod niya. Ito nga mga Kristiano nga ginbuboan han baraan nga espiritu an nagkukompwesto han espirituwal nga nasud, ‘an Israel han Dios.’—Galasia 3:16, 29; 6:16; Genesis 22:18.

AN SAMAD HA TIKOD

An masakit nga pagsamad ha Mesias, kondi temporaryo la an epekto hito. Naglampos hi Satanas ha pagpatay kan Jesus dinhi ha tuna. Kondi ginbanhaw hi Jesus.

AN SAMAD HA ULO

An bug-os nga pagtultog kan Satanas. Hahanawon ni Jesus hi Satanas. Kondi antes hito, wawad-on ni Jesus an karaotan nga gintikangan ni Satanas ha Eden.—1 Juan 3:8; Pahayag 20:10.

Para ha halipot nga sumaryo han nangunguna nga tema han Biblia, kitaa an brosyur nga An Biblia—Ano an Mensahe Hito? nga iginpublikar han mga Saksi ni Jehova.

[Retrato ha pahina 11]

Nag-antos hira Adan ngan Eva han maraot hinduro nga resulta han ira sala