Ginlarang ni Jehova nga Dios an minilyon nga anghel antes pa niya larangon an mga tawo. (Job 38:4, 7) Ini nga mga anghel gamhanan nga espiritu nga linarang nga nag-aalagad ha Dios—usahay ha paggiya ngan pagpanalipod han iya mga surugoon ha tuna. (Salmo 91:10, 11) Yana, ginbubuligan nira an mga tawo nga magpahimulos tikang ha maopay nga sumat nga iginsasangyaw han mga sumurunod ni Jesus.​—Basaha an Pahayag 14:6, 7.

Sadang ba kita mag-ampo ha mga anghel para hin bulig? Diri. An pag-ampo usa nga buhat hin pagsingba nga para gud la ha Dios. (Pahayag 19:10) Tungod kay an mga anghel surugoon han Dios, ha iya la hira nasugot diri ha mga tawo. Salit, ha Dios gud la kita sadang mag-ampo pinaagi kan Jesus.—Basaha an Salmo 103:20, 21; Mateo 26:53.

Pariho ha tawo, an anghel may kagawasan ha pagbuot, salit puydi hira magbuhat hin maopay o maraot. Makasurubo, damu nga anghel an nagrebelde ha Dios. (2 Pedro 2:4) An siyahan ha ira amo hi Satanas; katapos sumunod ha iya an iba pa ngan nagin mga demonyo. Ha urhi, ginpaiwas hi Satanas ngan an iya mga demonyo ha langit ngan iginlabog dinhi ha tuna.—Basaha an Pahayag 12:7-9.

An madagmit nga pagkalyap han karaotan ngan kamadarahog tikang han 1914 tigaman nga hirani na pagwad-on han Dios hi Satanas ngan an mga demonyo. Katapos, ipapahiuli han Dios an tuna ha orihinal nga kahimtang hito.—Basaha an Pahayag 12:12; 21:3, 4.