Ha panahon han Biblia, gin-gamit han Dios an mga hukom basi talwason an iya katawohan tikang ha kawaray-hustisya. (Hukom 2:18) Iginhuhulagway han Biblia an tiarabot nga Adlaw han Paghukom sugad nga makalilipay nga panahon diin an katawohan tatalwason ni Jehova, an Hukom ha bug-os nga tuna, tikang ha kawaray-hustisya.—Basaha an Salmo 96:12, 13; Isaias 26:9.

Ginpili han Dios hi Jesus nga magin hukom han mga buhi ngan han mga patay. (Buhat 10:42; 17:31) Damu nga tawo an namatay nga waray mahibaro mahitungod ha Dios. Ha Adlaw han Paghukom, babanhawon hira ni Jesus basi mahibaro ngan magsingba ha tinuod nga Dios.—Basaha an Buhat 24:15.

An mga patay babanhawon durante han usa ka yukot ka tuig. (Pahayag 20:4, 12) Kinahanglan nira hin panahon basi hibaroan an mga paagi han Dios ngan sundon hiya. Kabaliktaran ha opinyon han kadam-an, iginpapakita han Biblia nga huhukman an mga tawo uyon ha ira mga buhat katapos han ira pagkabanhaw.—Basaha an Roma 6:7.

May iginhuhulagway liwat an Biblia nga usa nga adlaw han paghukom nga tigda nga mahitatabo antes magtikang an usa ka yukot ka tuig. Ito nga adlaw gintatawag liwat nga kataposan, sugad han ginhisgotan ha nangunguna nga mga artikulo hini nga magasin. Hito nga adlaw, pupoohon han Dios an ngatanan nga magraot ngan diri diosnon nga mga tawo. (2 Pedro 3:7) Salit sadang gud naton pamatud-an an aton gugma ha Dios.—Basaha an 2 Pedro 3:9, 13.