PRINSIPYO HA BIBLIA: “Padayon nga . . . kinasingkasing nga magpinasayloay kamo bisan kon may hinungdan an usa ha pagreklamo kontra ha iba. Sugad la nga hi Jehova kinasingkasing nga nagpasaylo ha iyo, kinahanglan ito liwat an iyo buhaton.”—Colosas 3:13.

Ano an karuyag sidngon hito? Ha Biblia, an sala iginpapariho ha utang ngan an pagpasaylo iginpapariho ha pagkansela han utang. (Mateo 18:21-35) Usa nga reperensya an nasiring nga ha Kasuratan, an Griego nga pulong nga iginhubad nga ‘pagpasaylo’ nagpapasabot hin “diri pagpabayad han utang pinaagi ha diri pagsukot hito.” Salit kon nagdidesisyon kita nga pasayloon an nakasala ha aton, diri na kita naglalaom hin bisan ano nga bubuhaton han nakasala basi pasayloon naton hiya. An aton pagin andam ha pagpasaylo diri nangangahulogan nga gin-uuyonan naton an sayop nga buhat o ginbabalewaray an kasakit nga aton gin-aabat tungod han iya ginbuhat. Lugod, nagdidesisyon kita nga diri masina bisan kon may makatadunganon kita nga ‘hinungdan ha pagreklamo.’

Praktikal ba ito yana? Sugad nga diri perpekto nga mga tawo, nakakasala kita ngatanan. (Roma 3:23) Salit maaramon nga magin mapinasayloon kita tungod kay ha bisan ano nga panahon mahimo kita makasala ngan magkinahanglan han pagpasaylo han iba. Dugang pa, kon nagpapasaylo kita ha iba, nagpapahimulos liwat kita. Ha ano nga paagi?

Kon nagtitipig kita hin kasina ngan pagdumot—ngan diri nagpapasaylo—ginpapasakitan naton an aton kalugaringon. Tungod hinin negatibo nga mga emosyon, mahimo mawara an aton kalipay, malimitahan an aton kinabuhi, ngan magin miserable kita. Mahimo liwat ini magin hinungdan hin grabe nga sakit. An usa nga report ha Journal of the American College of Cardiology ni Dr. Yoichi Chida ngan ni Andrew Steptoe nga propesor ha sikolohiya nasiring: “Iginpapakita han bag-o nga pag-aram nga an kasina ngan kapungot mahimo magin hinungdan ngan magpaatakar han CHD [coronary heart disease].”

Ha luyo nga bahin, damu an kapulsanan han pagpasaylo. Kon mapinasayloon kita, nakakabulig kita nga matipigan an pagkaurosa ngan kamurayawan. Hito nga paagi, napapanalipdan an aton relasyon ha iba. Labaw ha ngatanan, nasusubad naton an Dios nga mapinasayloon ha mga mabinasulon nga nakasala ngan naglalaom nga magigin mapinasayloon gihapon kita ha iba.—Marcos 11:25; Efeso 4:32; 5:1.