NANGUNGUNA NGA ARTIKULO | MAHIMO MO MASABTAN AN BIBLIA
Kay Ano nga Kinahanglan Masabtan an Biblia?
“An Biblia usa nga popular nga libro han relihiyon. Kondi libro ito han mga taga-iba nga nasud ngan waray kalabotan ha mga Intsik.”—LIN, TSINA.
“Diri ko ngani masabtan an baraan nga mga libro han akon Hindu nga relihiyon, asay pa ba an pagsabot han Baraan nga Biblia.”—AMIT, INDIA.
“Gintatahod ko an Biblia sugad nga kadaan nga libro ngan nabatian ko nga ito an pinakamasurong. Pero waray pa gud ako personal nga makakita hito.”—YUMIKO, JAPAN.
Gintatahod han damu nga tawo ha bug-os nga kalibotan an Biblia. Kondi bangin gutiay la, kon may-ada man, an ira hinbabaroan mahitungod ha sulod hito. Ito gud an sitwasyon han minilyon nga taga-Asia, pero sugad liwat hito an kahimtang han damu nga tawo ha mga lugar diin iginpapanaltag an Biblia.
Kondi bangin ka magpakiana, ‘Kay ano nga sadang ako magin interesado nga hisabtan an Biblia?’ An pagsabot han sulod hinin sagrado nga libro mabulig ha imo nga:
-
Magin kontento ngan malipayon
-
Maatubang an mga problema ha pamilya
-
Malamposan an mga kabaraka
-
Magkaada mas maopay nga mga relasyon
-
Magin maaramon ha pinansyal
Pananglitan, tagdon naton hi Yoshiko nga taga-Japan. Naghunahuna hiya kon ano an sulod han Biblia ngan nagdesisyon nga basahon ito. Ano an resulta? Hiya nagsiring: “Tungod han Biblia nagkaada katuyoan an akon kinabuhi ngan nagkaada ako paglaom ha tidaraon.” Hiya nagdugang: “May-ada na kapulsanan an akon kinabuhi.” Hi Amit, nga gin-unabi kanina, nagdesisyon nga adman an Biblia. “Nahipausa gud ako,” hiya nagsiring. “An Biblia nagsusulod hin praktikal nga impormasyon para ha ngatanan.”
Daku gud an naibubulig han Biblia ha kinabuhi han minilyon nga tawo. Salit kay ano nga diri ito usisahon ngan kitaon kon paonan-o ito makakabulig ha imo?
