Naghunahuna ka na ba ha pagbasa han Biblia pero nag-alang ka tungod han mga pagbati nga pariho ha gin-unabi ha igbaw? Para ha damu, daku nga buruhaton an pagbasa han Biblia. Kondi, anoman kon mahibaroan mo nga an Biblia makakabulig ha imo nga magin mas malipayon ngan mas tagbaw? Ngan kumusta man kon mahibaroan mo nga may mga paagi basi magin mas makapainteres an pagbasa hito? Maruruyag ka ba nga kitaon kon ano an imo mapapahimulosan ha pagbasa hito?

Tagda an komento han mga nagpahimulos tikang ha ira pagbasa han Biblia.

Hi Ezekiel, nga sobra 20 anyos, nagsiring: “Hadto, sugad ako hin nagdadrayb hin awto nga waray destinasyon. Kondi an pagbasa han Biblia nakabulig ha akon nga magkaada destinasyon o may katuyoan nga kinabuhi. May-ada ito praktikal nga mga sagdon nga akon magagamit kada adlaw.”

Hi Frieda, nga sobra 20 anyos, nagsiring: “Hadto, putong ako. Pero tungod han akon pagbasa han Biblia, nahibaro ako pagkontrol han akon kalugaringon. Nakabulig ini ha akon nga magin mas masayon makiangay ha iba, salit nagdamu an akon kasangkayan.”

Hi Eunice, nga sobra 50 anyos, nagsiring mahitungod ha Biblia: “Nabulig ito ha akon nga magin mas maopay nga tawo ngan liwanan an akon diri duro kaopay nga pamatasan.”

Sugad han hinbaroan hini nga mga magbarasa ngan han minilyon nga iba pa, an pagbasa han Biblia makakabulig ha pagkaada mas malipayon nga kinabuhi. (Isaias 48:17, 18) Makakabulig liwat ito ha imo nga (1) makahimo hin mag-opay nga desisyon, (2) magkaada tinuod nga kasangkayan, (3) maatubang an istres, ngan (4) labaw ha ngatanan, mahibaro han kamatuoran mahitungod ha Dios. An sagdon han Biblia tikang ha Dios, salit diri ka gud magsasayop kon susundon mo ito. An Dios diri gud naghahatag hin maraot nga sagdon.

An importante amo an pagtikang ha pagbasa hito. Ano nga praktikal nga mga sagdon an makakabulig ha imo basi magin mas masayon ngan mas makalilipay an pagtikang ha pagbasa han Biblia?