Makausa kada tuig, an mga Saksi ni Jehova ngan an minilyon nga ira bisita ha bug-os nga kalibotan nagkakatirok basi isaurog an Memoryal han kamatayon ni Jesus, sugad han iya ginsugo. (Lucas 22:19) Ini nga okasyon nabulig ha aton nga masabtan an pagkaimportante han ginbuhat ni Jesus han ginhatag niya an iya kinabuhi para ha mga tawo. Ipapakita liwat hini kon ano an kapulsanan han iya sakripisyo para ha aton—yana ngan ha tiarabot.—Juan 3:16.

 Makakaatender ka man ha Memoryal hini nga tuig o diri, paonan-o ka makakapahimulos ha kamatayon ni Jesus? Nagtutdo hi Jesus nga kinahanglan buhaton naton an duha nga importante nga butang:

1.  1. Mahibaro mahitungod ha Dios ngan kan Jesus. Ha iya pag-ampo ha iya langitnon nga Amay, hi Jesus nagsiring: “Nangangahulogan ini hin kinabuhi nga waray kataposan, an ira padayon nga pagkilala ha imo, an amo la nga tinuod nga Dios, ngan ha iya nga imo ginsugo, hi Jesu-Kristo.”—Juan 17:3.

2.  2. Buhata an imo nahibaroan. Ginpabug-atan ni Jesus nga kinahanglan naton iaplikar ha aton kinabuhi an iya mga igintutdo. Pananglitan, ha iya kilala nga Sermon ha Bukid gintapos niya ito pinaagi ha paghatag hin kumendasyon ha bisan hin-o nga “namamati ha [iya] mga pulong ngan nagbubuhat hito.” (Lucas 6:46-48) Ha iba pa nga okasyon, hiya nagsiring: “Kon maaram kamo hini nga mga butang, malipayon kamo kon buhaton niyo ini.”—Juan 13:17.

 Karuyag mo ba mahibaro hin dugang pa mahitungod ha Dios ngan kan Jesus? Gusto mo ba hin praktikal nga sagdon kon paonan-o mo iaaplikar an imo nahibaroan? Aadi an pipira nga mga paagi nga makakabulig ha imo.

 An amon libre nga programa han interactive nga pag-aram ha Biblia nakabulig ha damu nga tawo nga usisahon an Biblia ngan iaplikar ito ha ira kinabuhi.

•   Bisitaha an page nga Pag-aram ha Biblia nga May Magturutdo basi mahibaro hin dugang mahitungod hini nga programa.

•   Kitaa an video nga Mag-i-enjoy Ka ha Imo Pag-aram ha Biblia basi mahibaroan kon paonan-o ginhihimo an pag-Bible study kaupod han mga Saksi ni Jehova.

 An mga Saksi ni Jehova nagkakatirok hin makaduha ka beses kada semana ha ira lugar han pagsingba nga gintatawag nga Kingdom Hall. Hini nga mga katirok, gin-aadman namon an Biblia ngan kon paonan-o namon iaaplikar an mga katutdoan hito ha amon kinabuhi.

 Ini nga mga katirok abrido para ha publiko; puydi umatender bisan an diri Saksi. Depende ha kahimtang ha iyo lugar, puydi ka umatender ha in person o pinaagi ha videoconference.

•   Kitaa an video nga Ano an Ginbubuhat ha Kingdom Hall? basi mahibaroan kon ano an nahitatabo ha amon mga katirok.

•   Basi makabiling hin katirok nga hirani ha iyo lugar bisitaha an page nga Mga Katirok ha Kongregasyon han mga Saksi ni Jehova.

 Damu nga artikulo ngan video hini nga website an makakabulig ha imo nga mahibaro hin dugang pa mahitungod ha mga katutdoan ni Jesus ngan ha kapulsanan han iya kamatayon.

 Pananglitan, basi mahibaroan kon paonan-o nga tungod han kamatayon han usa nga tawo nagin posible nga magpahimulos an minilyon nga tawo, basaha an mga artikulo nga “Paonan-o Kita Gintatalwas ni Jesus?” ngan “Kay Ano nga hi Jesus Nag-antos Ngan Namatay?” o kitaa an video nga Kay Ano nga Namatay hi Jesus?