Hinigugma gud han mga Saksi ni Jehova an ira mga igkasi-tumuroo. (1 Pedro 2:17) Damu ha aton an pariho an inaabat kan Tannis, usa nga sister ha Kenya. Hiya nagsiring, “Karuyag ko gud mahibaroan kon ano an nahitatabo ha akon hinigugma nga kabugtoan ha bug-os nga kalibotan.” Paonan-o hi Tannis ngan an iba pa nga minilyon nga mga Saksi nahibabaro ha kahimtang han ira kabugtoan? Tikang han 2013, nahibabaro kita han ira kahimtang pinaagi han seksyon nga Newsroom han aton website nga jw.org.

 An Newsroom may-ada masasarigan nga mga report mahitungod ha mga Saksi ni Jehova ha mga topiko sugad han pagrelis hin Biblia, pagbulig ha panahon han kalamidad, mga proyekto han pagpanukod, ngan iba pa nga importante nga mga panhitabo. Mahibabaroan naton dida hito an mahitungod han aton mga kabugtoan nga napriso tungod han ira pagtoo. An Newsroom may-ada liwat makapadasig nga mga eksperyensya mahitungod ha mga kampanya han pagsangyaw ngan ha pagsaurog han Memoryal. Hin-o an nagri-research han mga artikulo nga ibabalita, ngan paonan-o ito igin-aandam?

 An Newsroom ginpapanginano han Office of Public Information (OPI). Ini nga departamento aadto ha world headquarters ngan nagtatrabaho ha paggiya han Coordinators’ Committee han Nagmamando nga Lawas. An OPI may-ada sobra 100 nga kabugtoan—damu ha ira an mga remote volunteer—upod na an mga parasurat, researcher, visual artist, ngan parahubad. An iba nagtatrabaho basi kontakon an mga opisyal han gobyerno, propesor ngan titser, ngan an media. Ginbubuligan an OPI han sobra 80 nga Public Information Desk (PID) ha mga sanga nga opisina ha bug-os nga kalibotan.

 Basi maiandam an usa nga balita, ginbubuligan an OPI han mga PID. Kon an aton kabugtoan may-ada napili nga maopay nga istorya, ginri-research nira an topiko ngan nagtitirok hin masasarigan nga impormasyon. Nag-uupod ini han pag-interbyu ngan pakiistorya ha mga eksperto. Katapos nira tirukon an mga impormasyon, ginsusurat an artikulo, gin-i-edit, ginpu-proofread, ginbubutangan mga piktyur, ngan iginpapadara ha Coordinators’ Committee para ha pag-aprobar.

 Ano an gin-aabat han aton mga igkasi-tumuroo mahitungod ha Newsroom? Hi Cheryl, usa nga sister ha Pilipinas, nagsiring, “Nalilipay gud ako nga tikangan an akon adlaw pinaagi han pagbasa han mga balita mahitungod han organisasyon ni Jehova ngan ha iya katawohan.”

 Damu nga magbarasa an nagsumat han ira nakita nga kaibahan han mga balita ha Newsroom ha jw.org. ngan han iba nga balita ha media. Hi Tatiana nga taga-Kazakhstan, nagsiring: “Mapasalamaton ako nga masasarigan ko an mga balita ha jw.org. Husto gud an mga impormasyon hito.” An sister nga taga-Mexico nga hi Alma, nagsiring: “Kompara ha magraot nga mga balita ha media, an mga balita ha Newsroom makapadasig gud.”

 An Newsroom diri la basta masasarigan; nagpaparig-on liwat ito han pagtoo. Hi Bernard nga taga-Kenya, nagsiring: “An Newsroom nakabulig ha akon nga hunahunaon an mga kabugtoan ha bug-os nga kalibotan sugad nga akon pamilya, bisan diin hira naukoy. Nauunabi ko ha akon mga pag-ampo an ira mga ngaran ngan an ira espisipiko nga mga sitwasyon.” An sister nga hi Bybron nga taga-Kenya liwat, nagsiring: “Eksayted ako pirme kon may nakikita ako nga artikulo mahitungod ha pagrelis hin Biblia ha iba nga yinaknan! Ini nga mga artikulo nagpapahinumdom ha akon nga hi Jehova waray pinaurog.”

 Bisan an mga balita mahitungod ha aton mga kabugtoan nga gintitimaraot mahimo makadasig ha aton. “An pagpamalandong han ira kaisog nagparig-on gud han akon pagtoo,” siring ni Jackline nga taga-Kenya. “Pirme ako nangangalimbasog nga mahibaro kon ano an nakabulig ha ira nga makapailob. Nahibaroan ko kon paonan-o an ‘simple’ nga mga butang—sugad han pag-ampo, pagbasa han Biblia, ngan bisan an pagkanta—importante gud basi makapabilin nga marig-on an aton kabugtoan.”

 An sister ha Costa Rica nga hi Beatriz nag-apresyar ha mga balita mahitungod ha mga kalamidad. Hiya nagsiring: “Tungod han Newsroom, nakita ko kon paonan-o an aton organisasyon nagtatagana han mga panginahanglan han aton mga kabugtoan ha madagmit, epektibo, ngan mahigugmaon nga paagi. Salit nakombinse ako nga ini an organisasyon ni Jehova.”

 Mapasalamaton gud kita nga nakakakarawat kita hin updated nga mga balita mahitungod han aton kabugtoan ha bug-os nga kalibotan! Diri ini magigin posible kon waray an iyo mga donasyon para ha bug-os-kalibotan nga buruhaton, nga damu hini an iginhahatag pinaagi han donate.mt1130.com. Salamat ha iyo pagin mahinatagon.