“Nalilipay gud ako ha amon Kingdom Hall!” siring ni Nicole, usa nga batan-on nga sister ha Colombia. “Ito an lugar diin nakakaupod ko an akon Kristiano nga kabugtoan.” Sugad ba liwat hito an imo inaabat?

 Ha bug-os nga kalibotan, an mga Saksi ni Jehova nagkakatirok ha mga 63,000 nga Kingdom Hall. Dinhi hini nga mga bilding, komportable nga nakakagsingba kita ha Dios. Pero may iba pa ito nga kapulsanan. Hi David, usa nga regular payunir ha Colombia, nagsiring: “Tungod han aton Kingdom Hall, nagigin mas makaruruyag an aton mensahe. Damu nga bisita an nahipapausa kon nakikita nira nga ginmimintinar naton ito hin maopay.” Diri ini nahituman la. Maduruto kita ha paglimpyo ngan pagmintinar han aton mga Kingdom Hall. Paonan-o naton ini ginhihimo?

 An mga kongregasyon nga nagamit han usa nga Kingdom Hall an may responsabilidad ha pagmintinar hito. Ginhihimo ito han kabugtoan pinaagi han regular nga paglimpyo han ira Kingdom Hall. Regular liwat nira ito nga ginmimintinar ngan gin-aayad an gudti nga mga ruba.

 Basi buligan an mga kongregasyon ha pagmintinar han ira Kingdom Hall, an Local Design/Construction Department (LDC) nagtutoka hin mga brother basi magin mga maintenance trainer. An tagsa nga maintenance trainer nanginginano hin unom tubtob napulo nga Kingdom Hall. Ginbibisita niya ito ngan ginti-train an mga magwarali han kongregasyon kon paonan-o mimintinaron an ira Kingdom Hall. Kada tulo ka tuig, gin-uusisa niya an tagsa nga bilding ngan ginkikita kon may-ada ba ito mga problema ha safety o ha pagmintinar.

 Gin-aapresyar han aton kabugtoan an pag-train ha ira han mga maintenance trainer. Hi Indhumathi, usa nga sister ha India, nagsiring: “Maopay gud an training. Makalilipay hibaroan kon paonan-o namon mamimintinar hin maopay an amon Kingdom Hall.” Hi Evans, usa nga brother ha Kenya, nagsiring: “Nahibaro kami kon paonan-o malilikyan an daku nga gasto pinaagi ha pag-ayad han gudti nga mga ruba antes ito dumaku.”

 An tinuig nga gasto ha paggamit ngan pagmintinar hin Kingdom Hall mahimo umabot hin ginatos tubtob yinukot ka dolyar, a depende kon diin ito nahimumutang, kon ano na ito kaiha, ngan ha kadamu han kongregasyon nga nagamit hito. Diin tikang an pundo para hini?

 An pagmintinar han Kingdom Hall ginsusuportaran pinaagi han mga donasyon. Hi Alexander, usa nga brother ha Kazakhstan, nagsiring: “May bahin han pundo nga ginagamit para ha Internet ngan mga kabaraydan, sugad han tubig ngan koryente. May bahin liwat han pundo para ha ginkikinahanglan nga mga gamit, sugad han tisyu, gloves, garamiton ha panlimpyo, ngan pintura.” An sobra nga kwarta gindudonar ha worldwide work basi makabulig ha mas daku ngan mas mahal nga mga proyekto ha pagmintinar ha bug-os nga kalibotan.

 Kon an usa nga Kingdom Hall nagkikinahanglan hin pagmintinar nga an kantidad sobra ha kasagaran na nga nagagasto ha pagmintinar hito ha duha o tulo ka bulan, an mga tigurang nakonsulta ha LDC maintenance trainer. Kon aprobaran han LDC an proyekto, kasagaran na nga an pundo ginkukuha tikang ha mga donasyon ha worldwide work. Han 2023 nga tuig han pag-alagad, 8,793 nga sugad hini nga mga proyekto an natapos, ngan inabot hin $76.6 ka milyon an gasto. Pansina an duha hini nga mga proyekto.

 Ha Angola, usa nga Kingdom Hall nga 15 ka tuig na nga ginagamit an may pipira nga problema. Kinahanglan balyoan an electrical system, may mga gutak an mga pader, ngan an mga amyaw nagsumat nga an tubig naabot ha ira mga balay. Gin-organisar han LDC an usa nga proyekto basi masulbad ini nga mga problema. An gasto hito nga proyekto inabot hin $9,285. Mapasalamaton an mga amyaw, ngan naimpres hira ha kon paonan-o ito nahimo.

 Ha Poland, an atop han usa nga Kingdom Hall may mga turo, ngan an karpet hito diri na kaya maayad. Gin-aprobaran han LDC an usa nga proyekto basi aydon ngan ig-waterproof an atop ngan balyoan an karpet. An gasto hito nga proyekto inabot hin $9,757. Sugad nga resulta, ini nga Kingdom Hall diri na magkikinahanglan hin daku nga renovation ha sulod hin pipira ka tuig.

 An pagmintinar diri la nakakatipid ha birilhon nga mga donasyon kondi naghahatag liwat hin kadayawan kan Jehova. Hi Shaun, usa nga brother ha Tonga, nagsiring: “Tungod ha aton pagmintinar nga buruhaton, nakakagsingba kita kan Jehova ha malimpyo, mahapsay, ngan nagagamit hin maopay nga Kingdom Hall, ngan napapasidunggan an iya ngaran ha komunidad. Proud kita nga imbitaron an mga tawo ha aton Kingdom Hall.”

 Kita ngatanan makakabulig ha paglimpyo ngan pagmintinar han aton lugar han pagsingba. Hi Marino, usa nga maintenance trainer ha Australia, nagsiring: “Kita ngatanan may bahin hinin maopay gud nga pribilehiyo ha pagmintinar han aton mga Kingdom Hall. Kon ginbubuhat naton ito, daku an aton nahihimo ha pagtipid han mga donasyon basi magamit ito kon diin gud ginkikinahanglan.”

 Hi Joel, usa nga brother ha India, nalilipay ha pagmintinar han ira Kingdom Hall. Hiya nagsiring: “An pagtrabaho kaupod han kabugtoan nakakabulig ha akon nga maimadyin an magigin kahimtang ha bag-o nga kalibotan.” Hi Nicole, nga gin-unabi na, nagsiring: “Hinin bag-o la, binulig ako pag-mop han salog samtang an mga brother may gin-aayad nga ruba ha CR. Bisan kon diri ako an nag-ayad han ruba, nakabulig ako nga malikyan an aksidente.”

 Kon karuyag mo magboluntaryo pagbulig ha pagmintinar han iyo Kingdom Hall, pakiistorya ha mga tigurang ha iyo kongregasyon. Dugang pa, an imo mga donasyon nasuporta ha pagmintinar diri la han iyo Kingdom Hall kondi pati liwat han iba nga mga Kingdom Hall ha bug-os nga kalibotan. Ini nga mga donasyon puydi ihulog ha mga donation box ha iyo Kingdom Hall o ihatag pinaagi han donate.mt1130.com. Damu nga salamat han iyo pagin mahinatagon.