Ginsaysay ni Jesus an mga pitad nga ginkikinahanglan basi magin usa han mga Saksi ni Jehova ngan mababasa ito ha Mateo 28:19, 20. Iginpapakita hito nga mga bersikulo kon ano an kinahanglan buhaton han usa nga tawo basi magin disipulo han Kristo, nga nag-uupod ha pag-istorya, o pagpamatuod, mahitungod kan Jehova.

 Una nga Pitad: Pag-admi kon ano an igintututdo han Biblia. Naghatag hi Jesus hin instruksyon ha iya mga sumurunod nga ‘manhimo hin mga disipulo, tutdoan hira.’ (Mateo 28:19, 20) An pulong nga iginhubad nga “disipulo” literal nga nangangahulogan nga “usa nga nag-aaram.” An Biblia, labi na an mga katutdoan ni Jesu-Kristo nga mababasa dida hito, may-ada han impormasyon nga imo kinahanglan basi magkaada ka makalilipay ngan may katuyoan nga kinabuhi. (2 Timoteo 3:16, 17) Nalilipay kami pagbulig ha imo nga mahibaroan an igintututdo han Biblia pinaagi han amon libre nga programa han pag-aram han Biblia.​—Mateo 10:7, 8; 1 Tesalonica 2:13.

 Ikaduha nga pitad: Buhata an imo nahibabaroan. Nagsiring hi Jesus nga adton mga nahibabaro kinahanglan liwat ‘magtuman han ngatanan nga iya iginsugo.’ (Mateo 28:20) Nangangahulogan ini nga an imo pag-aram han Biblia diri la basta pagkuha hin impormasyon​—bangin kinahanglan ka maghimo hin dagku nga mga pagbag-o ha imo panhunahuna ngan panggawi. (Buhat 10:42; Efeso 4:22-29; Hebreo 10:24, 25) Adton nagtutuman han mga sugo ni Jesus napapagios ha paghimo hin personal nga desisyon nga sumunod ha iya pinaagi ha pagdedikar han ira kinabuhi kan Jehova nga Dios.​—Mateo 16:24.

 Ikatulo nga pitad: Pagpabawtismo. (Mateo 28:19) Ha Biblia, an bawtismo iginpariho ha paglubong. (Ikompara an Roma 6:2-4.) Nagsisimbolo ito ha kamatay han naglabay nga paagi han pagkinabuhi ngan pagtikang han bag-o nga pagkinabuhi. An imo bawtismo usa nga pagpakita ha publiko nga ginbuhat mo na an una ngan ikaduha nga pitad nga iginsaysay ni Jesus ngan naghahangyo ka ha Dios hin limpyo nga konsensya.​—Hebreo 9:14; 1 Pedro 3:21.

 Pakiistorya ha mga tigurang ha kongregasyon. Makikiistorya hira ha imo basi masiguro kon nasasabtan mo an nahiuupod ha bawtismo, kon ginbubuhat mo an imo nahibabaroan, ngan kon kinaburut-on nga nagdedikar ka na han imo kalugaringon ha Dios.​—Buhat 20:28; 1 Pedro 5:1-3.

 Oo. Ginpapadaku namon an amon mga anak “ha disiplina ngan sagdon ni Jehova,” sugad la han iginsusugo han Biblia. (Efeso 6:4) Pero, samtang nagtitikaadulto hira, kinahanglan personal nga magdesisyon hira nga pag-adman, karawaton, ngan buhaton an igintututdo han Biblia antes hira magin kwalipikado para ha bawtismo. (Roma 12:2) An pinakaimportante, an kada tagsa kinahanglan maghimo hin personal nga desisyon may kalabotan ha pagsingba.​—Roma 14:12; Galacia 6:5.